INPÂKNA HLABU 107 - Pathien Lekhabu Inthieng (BSI)

BU 5 NA Buoinaa inthawkin Lalpain a sansuok

(107—150)

¹ Aw Lalpa kuomah lâwmthu hril ro, ama chu a ṭha si a; A ngilneina khawm kumkhuoin a um ding a ni si a,

² Lalpa mi intlanhai chun chuong ang chun hril raw se, Dotu kuta inthawka a întlan,

³ Ram tina inthawka a ṭhuoi khâwm, Sak le thlang, sim le hmâra inthawkhai dâm chun.

⁴ Thlalêra ram ṭâwl lampuia chun an invâk an invâk a, Mihriem umna khuo hrim hrim an hmu naw a.

⁵ Phîngṭâm le dangchârin, An hringna chu an sûngah a chau ta a.

⁶ Chu phingleh an buoinaa chun Lalpa chu an ko ta a, Ama chun an lunginzîngnaa inthawk chun a sanhim a.

⁷ Mihriem umna khuoa an fe theina dingin, Lampui tlûntakah a ṭhuoi ta a.

⁸ Aw, mihriemhai hin Lalpa chu a ngilneina lei le, Mihriem nauhai chunga a thilmak thawhai lei hin inpâk hai sien aw!

⁹ Ama chun hringna thil châk êm êm chu a sukkhawpin, Hringna phîngṭâm chu ṭhatnain a sukkhawp si a.

¹⁰ Inthim hnuoia le thina hlima ṭhung a, Rinumna le thîra khuophai chu;

¹¹ Pathien thuhai chungah an hel a, Achunghnungtak remruot chu an ngainêp leiin.

¹² Ama chun an lungril chu inrimnain a sukhnuoi a, An tlu a ṭhangpuitu ding hrim an um si naw a.

¹³ Chu phingleh an buoinaa chun Lalpa chu an ko a, Ama chun an lungzîngnaa inthawk chun a sandam a.

¹⁴ Inthim hnuoi le thina hlima inthawk chun a ṭhuoi suok a, An khuopnahai chu a suktan ta a.

¹⁵ Aw mihriemhai hin Lalpa chu a ngilneina lei le, Mihriem nauhai chunga a thilmak thawhai lei hin inpâk hai sien aw!

¹⁶ Ama chun dâr kawtkhârhai chu a suksiet a, A kalna thîrtluonhai chu a sukbawng ta si a.

¹⁷ Mi invêthai chu an bawsietna lei le, An rîtlonahai leiin an insukrinum hlak a.

¹⁸ An hringna chun fâk ding tinrêng hi a tirdak hlak a, Thina kul kawtkhârhai chu an hnai hlak a.

¹⁹ Chu phingleh an buoinaa chun Lalpa chu an ko a, Ama chun an lungzingnaa inthawk chun a sandam hlak.

²⁰ A thu chu a tirsuok a, anni chu a sukdam hlak a, An bohmangna dinghaia inthawk chun a sanhim hlak.

²¹ Aw mihriemhai hin Lalpa chu a ngilneina lei le, Mihriem nauhai chunga a thilmak thawhai lei hin inpâk hai sien chu aw!

²² Anni chun lâwmthu hrilna inthâwinahai chu inhlân hai sienla, A thilthawhai chu hlaa sakin hril raw hai se.

²³ Ṭhenkhat tuipuiah lawnglienhaia zu fein, Tuipui hrâttakhai chungah sum an dâwng a.

²⁴ Chuonghai chun Lalpa thilthawhai le, Tui inthûktaka a thilmak thawhai chu an hmu hlak.

²⁵ Ama chun thu a pêk a, thlipui ân hrângtir a, Chu chun a tuifâwnhai chu a suksâng hlak.

²⁶ Vân tieng an hung tuol tuol a, inthûktakah an ṭum nâwk tuol tuol hlak, Lunginzîngna leiin an hringna chu ân tuihmang hlak.

²⁷ Zurui angin an thle an thle a, an pêm nawk nawk hlak a, Um ngaina hrim hrim an hriet ngai nawh.

²⁸ Chu phingleh an buoinaa chun Lalpa chu an ko a, Ama chun an lungzîngnaa inthawk chun a ṭhuoi suok hlak.

²⁹ Thlipui chu a sukma ṭhuop a, Chuongchun, a tuifâwnhai a re ṭhup hlak.

³⁰ Chun, a re ta leiin an lâwm hlak a; Chuongchun, ama chun an ngaitak likilkawia chun a ṭhuoi tlung hlak.

³¹ Aw, mihriemhai hin Lalpa chu a zainêmna lei le Mihriem nauhai chunga a thilmak thawhai lei hin inpâk hai sien chu aw!

³² Anni chun mihai inkhâwmnaah ama chu inpâk sienla, Upahai ṭhungnaa chun inpâk raw se.

³³ Ama chun vadungpuihai chu thlalêrah ân changtir hlak a, Tuihnârhai chu hnuoi ṭâwlah ân changtir bawk hlak.

³⁴ Ram ṭha chu ram ṭâwl chawkah ân changtir hlak a, A sûnga umhai rîtlona leiin.

³⁵ Thlalêr chu dîlah ân changtir hlak a, Ram ṭâwl chu tuihnârahai ân changtir bawk hlak.

³⁶ Chutaka chun phîngṭâmhai chu ân umtir hlak a, Umna ding khuo an buotsai a.

³⁷ Lohai an nei a, grêp huonhai an siem a, A ra hung punghai chu an hmu theina dingin.

³⁸ Anni chu mal a sâwm hlak a, nasataka sukpungin an um a, An ranhai chu a kiem a phal ngai naw a,

³⁹ Chun, nêksâwrna dâm, rinumna dâm, lungngai dâm leiin, An kiem ta sawt sawt a, an kûn ta thlawk thlawk a.

⁴⁰ Ama chun mi lienhai chungah hmusitna a bunthlâk hlak a, Thlalêr lampui hrim hrim um nawnaa chun ân vâktir ân vâktir a.

⁴¹ Nisienlakhawm, rimsihai chu rinumnaa inthawkin hmun insângah a dawm kai hlak a, Ran ruol angin sûnghai a siempêk hlak.

⁴² Mi indiktakhai chun chu chu hmûng an ta, lâwm an tih, Rîtlona po po chun a bau hip a tih,

⁴³ Tukhawm a var taphawt chun chuong chu vawng ṭhâng an ta, Lalpa ngilneina chu ngaituong an tih.