INPÂKNA HLABU 105 - Pathien Lekhabu Inthieng (BSI)

Israel laia Pathien thilmak thawhai

¹ Aw, Lalpa kuomah lâwmthu hril unla, a hming lam ro; Mi tin lai chun a thilthaw chu inhriettir ro.

² Ama chawimawiin hla sak unla, ama inpâkin sak ro; A thilmak thaw po po thu chu titi ro.

³ A hming inthieng chu suong ro, Lalpa zawngtuhai lungril chu hlim raw se.

⁴ Lalpa le a hrâtna chu zawng unla, A hmêl chu zawng rawp ro.

⁵ A thilmak thawhai chu hre zing ro, A thilmakhai le a baua a rorêl suokhai chu:

⁶ Aw, a siehlaw Abraham nauhai, Jakob thla, a ithlanghai.

⁷ Ama chu Lalpa ei Pathien chu a nih, A rorêlhai chu hnuoi chung po poa hin a um.

⁸ A thuthlung chu kumkhuoin a hriet hlak a, Suon sâng khat chena a thu lo pêk chu;

⁹ Abraham kuoma a thuthlung le, Isak kuoma a înkhâmna chu.

¹⁰ Chu ma chu thuruot ni dingin Jakob kuomah a sukdet a, Israel kuoma kumkhawtluong thuthlung dingin;

¹¹ “Kanaan ram hi i kuomah pêng ka ti che, I rochan puol ding chu,” tiin;

¹² Mi tlâwmte chau, an ni lai khan, Anih, tlâwmte chau chu rama chun mikhuol an ni nâwk nghâl si a.

¹³ Hnam tum tum kuomah an fe lawn an fe lawn a, Ram tum tuma inthawkin mi tum tumhai kuomah.

¹⁴ Tu inêksâwr khawm a phal naw a, Anih, anni leiin lalhai khawm a kâwk a,

¹⁵ “Ka hriek nâlhai chu tâwk naw unla, Ka zâwlneihai pawi hrim hrim khawm tâwk naw ro,” tiin.

¹⁶ Chu rama tla dingin ṭâm a ko a, Fâk ding hrim hrim ân um nawtir ta a.

¹⁷ An hmaah mi a tir a, Josef chu siehlaw dinga zawrin a um a,

¹⁸ A kehai chu kawlin an sukna a, Thîr khaidiet bunin a um ta a.

¹⁹ A thu a tlung hmakhat chun, Lalpa thu chun ama chu a fie hlak a.

²⁰ Laltak chun mi a tir a, a sût a, Ân suo ta a, mi tin rorêltu ngei chun.

²¹ A sûnghai chungah hotua le, A sum po po chunga rorêltuah a siem a;

²² A mi lienhai chu a nuom nuoma a khuop ding le, A upahai sukvar dingin.

²³ Israel khawm chu Aigupta ramah a fe a, Jakob ruok chu Ham rama chun a um ta hri a.

²⁴ A mihai chu nasatakin a sukpung a, Anni dotuhai nêkin a sukhrât ta lem a.

²⁵ A mihai theida dingin an lungril ân lêttir a, A siehlawhai chunga vervêktaka thaw dingin.

²⁶ A siehlaw Mosie chu a tir a, A mi thlang Aron leh.

²⁷ Anni chun ân chiknahai chu anni lai an inentir a, Ham rama chun thilmakhai an inentir a.

²⁸ Ama chun inthim a tir a, a sukthim ta a, Chuongchun, a thuhai chu an sêl ta naw a.

²⁹ An tuihai chu thisena ân changtir a, An ngahai chu a sukhlum ta a.

³⁰ An ram chu uin a sip ta a, An lalhai pindana chen khawm.

³¹ Ama chun thu a hril a; chuongchun, tho tamtak an hung a, Hrik khawm an ram sûng po poah an hung bawk a.

³² An kuomah ruo aiah riel a pêk a, An rama chun mei chawk zawr zawr a pêk ta bawk a.

³³ An grêp hruihai le an theichang kûnghai a sukhlum a, An rama thinghai chu a sukthliek ta bawk a.

³⁴ Ama chun thu a hril a; chuongchun, khâuhai an hung a, Tuktulunghai leh, tiem seng ruollo tawp el hin.

³⁵ Chuonghai chun an rama thlai tinrênghai chu an fâk zo a, An hnuoi rahai khawm an fâk zo ta bawk a.

³⁶ An rama nau lutîr um po po a sukhlum a, An hrâtna po po ra hmasatakhai chu.

³⁷ Chuongchun, tangka le rângkachak leh a ṭhuoi suok a, Ama hnamhai laia chun mi hrât naw pakhat khawm an um dêr nawh.

³⁸ An suok lai chun Aiguptahai chu an lâwm a, Anni chu an hung ṭî ta leiin.

³⁹ Ama chun hlietu dingin sûm ân zâmtir a, Zâna êntu dingin mei a pêk bawk a.

⁴⁰ An hnih a; chuongchun, vamîm a hung ṭhuoi a, Vân buin anni chu a sukkhawp ta a.

⁴¹ Lungpui chu a hawng a; chuongchun, tui a hung suok zur zur a, Hmun ṭâwlahai chun vadung ang el hin a luong ta a.

⁴² A thu inthieng kha a hriet zing si a: A siehlaw Abraham le khan.

⁴³ Chuongchun, a mihai chu hlimtakin a ṭhuoi suok ta a, A mi thlanghai chu hla sak pei pumin.

⁴⁴ Chun,hnam tin ramhai chu an kuomah a pêkpêk a, Anni chun mi tin thaw suoksa chu an hluo ta a;

⁴⁵ A thuruothai chu an zâwm thei a, A dânhai chu an vawngṭhat theina dingin. Lalpa chu inpâk ro.