HEBRAIHAI 2 - Pathien Lekhabu Inthieng (BSI)

Sandamna Ropui

¹ Chuleiin, naa ei ihriethai kha ṭhahnemngaitakin ei pawisa nâwkzuol ding a nih, chuong naw chun, intawl hmang hlau rawi ei tih.

² Vântirkohai hmanga thu hril hman kha a lo det a, bâwsietna le thuâwi nawna tinrênghai chun thungna feltak a hmu pei si chun,

³ hieng ang lâwma sandamna ropui hi inthlathlam inla, iengtin am tlân suok thei hlak ei ta? Chu Sandamna thu chu Lalpa hmanga a tîra hril a ni ta a, a hretuhai chun an mi sukdet pêk pei a.

⁴ Pathien khawmin inchiknahai le thilmakhai le, thilthawtheina tinrênghai le, ama dit zâwng ang peia Thlarau Inthieng thil semhai le chun, anni chu a hrietpui a.

Sandamna Intluntu

⁵ Khawvêl la hung um ding, a chanchin ei hril chu vântirkohai hnuoia chu a sie nawh,

⁶ Nisienlakhawm, mi tu amani chun khâwlai âm ani chu hieng thu hi inhriettirin a hril ta lem a: “Mihriem hi ieng am a ni a, i hriet zing hlak a na? Mihriem naupa khawm hi ieng am a ni a, i kan hlak a na?

⁷ Ama chu vântirkohai nêka inhnuoiin i siem hri a, Ropuina le chawimawina în khumtir a, I kutsuok chungahai chun hotuah i siem bawk a;

⁸ “A ke hnuoiah iengkim i sie a,” tiin. Chuongchun, a hnuoiah iengkim a sie leiin a hnuoia sie naw iengkhawm a nei nawh. Amiruokchu, tuhin chu iengkim a hnuoiah umin ei la hmu hri nawh.

⁹ Nisienlakhawm, Isu vântirkohai nêka inhnuoia siema la um hri chu thina tuor leia ropuina le chawimawina inkhumtira umin ei hmu ta lem a nih; Pathien lunginsietna leia thîna chu mi tin ân tempêkna dingin.

¹⁰ A ta dinga iengkim uma, a zâra iengkim um bawk ta ding chun, nau tamtak ropuinaa a ṭhuoi lût chun, an sandamna siemtu kha tuornahai leiin sukfamkim chu a âwm hrim si a.

¹¹ A sukthiengtu le a isukthienghai chu an rêngin Mi pakhata suok an ni si a; chuleiin, ama chun anni chu “Unauhai,” ti ân zak naw a:

¹² “Ka unauhai lai i hming hril ka ta, Um khâwmhai laia chun, Hla sakin inpâk ka ti che,”tiin.

¹³ Chun, “Amaah ka ringna innghat ka tih,” a ti nâwk a. Chun, “En ta u, kei le, Pathien mi pêk naupanghai hi,” a ti nâwk bawk a.

¹⁴ Chuongchun, naupanghai hi tisa le thisen changtuhai an ni ni tâwl leiin, ama khawmin chuong ang bawk chun chuong thilhai chu a chang ve ta a; thînain thîna thuneitu (chu chu Diebol a nih), a sukbohmang theina ding le,

¹⁵ thîna ṭi leia dam sûnga suoka um po pohai chu a sansuok theina dingin.

¹⁶ A iṭhangpui hlakhai chu vântirkohai an ni dêr si naw a, Abraham thlahai an nih a iṭhangpui hlak chu.

¹⁷ Chuongchun, mihai ta dingin suol thuphachawina siempêk dingin, Pathien tieng thilhaia chun, Thiempu Laltak, mi lâinatthei le ringum tak a ni theina dingin, iengkima a unauhai anga hung um chu a ṭûl hrim a nih.

¹⁸ Ama ngei chun thlêmna tuokin a lo tuor ta leiin, thlêmna tuokhai chu a ṭhangpui thei a nih.