FESUOKNA 34 - Pathien Lekhabu Inthieng (BSI)

Lung phêk siem nâwk thu

¹ Lalpa chun Mosie kuomah, “A hmasa angtak khan lung phêk pahni sak la; chun, a phêk hmasa i sukkawihai chunga thuhai kha, chu phêkhai chunga chun ziek ka tih.

² Zîngkâr inzo hieu la, zîngkâr chun Sinai tlângah hung la, tlâng sîpa ka kuoma chun nang ngei hung rawh.

³ Tukhawm nang leh an hung ding a ni naw a, tlâng chung po poa chun tukhawm hmu an ni bawk ding a ni naw a; chun, tlâng hmaa chun berâm ruolhai amanih, bâwng ruolhai amani khawm tla bawk naw raw hai se,” a ti a.

⁴ Chuongchun, Mosie chun a hmasahai ang tak chun lung phêk pahni chu a sak ta a; chun, zîngkâr inhmatakin a tho a, Lalpain thu a pêk ang chun, lung phêk pahni chu a kutin a chawi a, Sinai tlânga chun a hang fe ta a.

⁵ Lalpa chu sûma chun a hung thla a, ama kâwla chun a hung ngîr a, Lalpa hming chu a puong ta a.

⁶ Lalpa chun a hmatieng a lekhêl a, “Lalpa chu, Lalpa chu Pathien, lainatnaa sip, mi lunginsietthei, lunginsen intak, zângaina le thutak hau,

⁷ sâng tamtak chunga hmangainaa sip, khawhlona le bawsietna le suolna ngaidam hlak, thiemnawa ngaihai ruok chu iengti khawma inthla el ngailo, pahai rîtlona nauhai, nauhai nauhai nâwk le suon thumna le suon lina chen chunga thung hlaktu a nih,” tiin a puong ta a.

⁸ Mosie chu inhmâwtakin hnuoi tieng a lu a kûn a, chibai a bûk ta a.

⁹ “Tuhin nanga mithmuah lunginsietna ka hmu ta chun, Aw Lalpa, ka ngên che, Lalpa chu keini lai fe ve raw se; mi kâwmaw ni de hai sien khawm, kan khawhlona le suolna chu mi ngaidam la, i rochan dingin nangin mi la rawh,” a ti a.

Thuthlung Sukthar nâwkna

¹⁰ Lalpa chun, “Ngai ta, thuthlung ka siem hi. Ieng hnam lai khawm le hnuoi chung po poa la thaw ngai dêr lo, i mihai po po hmaah thilmakhai thâwng ka tih. Anni laia i umna mi po po chun Lalpa sinthaw chu hmûng an tih, nangmaa thil ka thaw ding chu râpthlâktak a ni si a.

¹¹ “Vawisûn thu ka pêk che hi zâwm rawh. Ngai rawh, Amor mihai, Kanaan mihai, Hit mihai, Periz mihai, Hiv mihai le Jebus mihai chu i hmaa inthawkin ka hnawt suok ding a nih.

¹² I chungah fimkhur rawh, chuong naw chun i fêna tieng ram hluotuhai leh thuthlung siem rawi i ta, nangni laia châng ni rawi a tih.

¹³ Amiruokchu, an maichâmhai chu kei chim in ta, an milimhai chu vaw nawi vawng in ta, an pathiennu Asera lim khawm chu phûr thlûng in tih:

¹⁴ pathien dang hrim i biek ding a ni nawh, Lalpa, a hming el khawm ‘Thîkthusie’ chu Pathien thîkthusetak a ni si a.

¹⁵ A ram hluotuhai le chun thuthlung siem hlau rawi i tih: an pathienhai hnawta an inzawr a, an pathienhai kuoma inthâwina an nei phain, mi pakhatin fiel a ti che a, an inthâwina chu fa rawi i tih.

¹⁶ An naunuhmeihai chu i naupasalhai inneitir i ta, an naunuhmeihai chun an pathienhai hnawta an inzawr phain, i naupasalhai chu an pathienhai leh inuiretir rawi an tih.

¹⁷ “Siemfâwm pathien hrim in siempêk ding a ni nawh.

¹⁸ “Chawlṭhanglo bei ruoiṭhe chu nei zing i tih. Ni sari sûng chu, thu ka pêk ang che khan, Abib thla hun ruota khan fâng i tih; Abib thlaa chun Aiguptaa inthawkin i hung suok a ni si a.

¹⁹ Sul hung kêu hmasa po po, bâwng le berâm, a pieng hmasa hmasatak a chal po po chu ka ta an nih.

²⁰ Sabengtungte hmasa tak chu berâmtein intlan i tih; în tlan naw chun a rîng her bawng i tih. I naupasal nau lutîr po po chu intlan i tih. Tukhawm ka hmaah kut ruokin a hung inlang ding a ni nawh.

²¹ “Ni ruk sûng sin thâwng i ta, ni sari ni ruok chun châwl i tih; hnuoi inlet huna le busîk huna khawm châwl i tih.

²² Chun, hapta kâr ruoiṭhehai, bupui tlung hmasa sîklai le kum tâwpa lâk khâwm zo ruoiṭhehai chu hmang i tih.

²³ Lalpa Pathien, Israel Pathien hmaa chun i mi pasalhai chu kum khatah ṭum thum an inlang ding a nih.

²⁴ Hnamhai chu i hmaah hnawt suok ka ta, i ramrihai chu ka suklien ding a ni si a; kum khat sunga ṭum thum, Lalpa i Pathien hmaa inlang dinga i fe laiin, i ram chu tukhawmin inhnarin lâk tum naw ni hai.

²⁵ “Ka inthâwina thisen chu chawl ṭhang bei leh în hlân ding a ni nawh. Fekân ruoiṭhe inthâwina chu zîngkâr chena dingin hla ding a ni bawk nawh.

²⁶ I hnuoi ra thar hmasatak chu Lalpa i Pathien inah i hung lâk ding a nih. Kêlte chu a nu nênetuiah i suong ding a ni nawh,” tiin.

²⁷ Chun, Lalpa chun Mosie kuomah, “Hieng thuhai hi ziek rawh, hieng thuhai dungzui hin Israel le nanga kuomah thuthlung ka siem si a,” a ti a.

²⁸ Chutaka chun Mosie chu Lalpa le chun ni sâwmli le zân sawmli a um a; bei hlak a fâk naw a, tui khawm a dâwn bawk naw a. Thuthlung thuhai, thupêk sâwmhai chu lungphêkhai chunga chun a ziek ta a.

Tlânga inthawk Mosie a hung ṭum

²⁹ Chun, Mosie chu Thuthlung phêkhai pahni chu a kuta chawiin Sinai tlânga inthawkin a hung thla a; tlânga inthawka a hung thlâk lai chun, Pathien ân biekpui leiin a hmai vun chu a lo var ti a hriet naw a.

³⁰ Aron le Israel mihai po poin Mosie chu an en a, a hmai vun a lo var pup el ti an hmu chun a kâwl hnaia fe chu an ṭi ta a.

³¹ Mosie ruok chun anni chu a ko a, Aron le mipui ṭhuoituhai po po chu a kuomah an hung kîr a, Mosie chun a lo biek tâwl a.

³² Chun, chu hnunga chun Israel mihai po po chu an hung hnai a, Sinai tlânga Lalpain a kuoma a hril po po chu thupêkin anni chu a pêk ta a.

³³ Mosie chun anni a biek zo chun, hmai inkhumnain a hmai ân khum a.

³⁴ Amiruokchu, Mosie chu Lalpa kuomah ama be dinga a lût po leh a hmai inkhumna chu, a hung suok nâwk hmakhat a lâkthlâk zing a: chun, a hung suok a, a kuoma thu pêka um chu Israel mihai kuoma chun a hril a;

³⁵ chun, Israel mihai chun Mosie hmai, Mosie hmai vun var chu an hmu ta a. Lalpa kuoma ama be dinga a fe nâwk hmakhat chun, Mosie chun a hmai inkhumnain ân khum nâwk hlak a.