FESUOKNA 24 - Pathien Lekhabu Inthieng (BSI)

Thuthlung sukdetna

¹ Lalpa chun Mosie kuomah “Nang le Aron, Nadab le Abihu le, Israel upahai sâwmsari leh Lalpa kuomah hung ro; chun, hlataka inthawkin chibai bûk ro.

² Lalpa kâwl hnaia chu Mosie khâtin hung sienla, mi danghai ruok chu hung hnai naw hai sien, mipui chu ama ruolin hang fe bawk naw raw hai se,” a ti a.

³ Mosie chu a hung a, Lalpa thu po po le dânhai po po chu mipui a hril ta a. Mipui po po chun thu thuhmunin an dawn a, “Lalpain thu a hril po po chu thâwng kan tih,” an ti a.

⁴ Mosie chun Lalpa thuhai po po chu a ziek a, zîngkâr inhmatakin a tho a; tlâng hnuoia chun maichâm le lungphun sâwmpahni, Israel hnam sâwmpahni aiawin a phun ta a.

⁵ Chun, Israel mi tlangvâlhai chu a tir a, Lalpa kuomah rawhmang thilinhlân an inhlân a, inremna thilinhlân dingin bâwngchalin an inthâwi bawk a.

⁶ Mosie chun a thisen zâtna chu a lâk a, maihûnhaiah a sie a; a thisen zâtna dang chu maichâma chun a the a.

⁷ Chun, thuthlungna lekhabu chu a lâk a, mipui hrieta chun a tiem ta a; anni chun, “Lalpain a hril taphawt chu thâwng kan ta, thuawitakin um kan tih,” an ti a.

⁸ Chun, Mosie chun thisen chu a lâk a, mipui chu a the a, “Hieng thuhai po po chungthua Lalpain thisen thuthlung a siempêk cheu hi en ta u,” a ti a.

⁹ Chun, Mosie le Aron, Nadab, Abihu le, Israel upa sâwmsari chu an hang fe a;

¹⁰ chun, Israel Pathien chu an hmu a, a kehai hnuoia chun sapphir lung rem ang tletak, a tlêtzie chu vân thil ni âwm tak hrim hi a um a.

¹¹ Israel mipui hotuhai chungah chun Pathienin a kut ân nghat naw a; Pathien chu an hmu ngei a, an fâkin an dâwn a.

Sinai tlânga Mosie chanchin

¹² Lalpa chun Mosie kuomah, “Tlângah ka kuomah hung la, chutaka chun um rawh; dân le thupêk le anni inchûktirna dinga ka ziekhai, lung phêk pahni chu pêng ka ti che,” a ti a.

¹³ Mosie le a rawngbâwltu Josua chu an tho a, Mosie chu Pathien tlânga chun a hang fe ta a.

¹⁴ Upahai kuoma chun, “Hitaka hin keini mi lo nghâk ro, in kuoma kan hung nâwk hmakhat chu: chun, ngai ta u, Aron le Hur hi in kuomah an um a, tukhawmin thubuoi a nei chun an kuomah lo fe raw se,” a ti a.

¹⁵ Chun, Mosie chu tlânga chun a hang fe a, tlâng chu sûmin ân khum ta a.

¹⁶ Lalpa ropuina chu Sinai tlânga chun a um zing a, ni ruk sûng sûmin ân khum a; ni sari ni chun sûm laia inthawk chun Mosie a ko ta a.

¹⁷ Israel mihai mita Lalpa ropuina inlang dân chu, tlâng sîpa chun kânghmangna meichawk ang a nih.

¹⁸ Mosie chu sûm zîng hnuoia chun a lût a, tlânga chun a hang fe ta a. Mosie chu ni sâwmli le zân sâwmli tlânga chun a hang um ta a.