Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

FESUOKNA 20 - Pathien Lekhabu Inthieng (BSI)


Thupêk Sâwm
( Dt 5.1-21 )

1 Pathienin hieng thuhai po po hi a hril a,

2 “Lalpa in Pathien, Aigupta ram, suok in nina ina inthawka ṭhuoi suoktu cheu ka nih.

3 Kei naw chu pathien danghai i nei ding a ni nawh.

4 Milim siem fâwm, chungtieng vâna mi amanih, hnuoitieng leihnuoia mi amanih, hnuoi hnuoitienga tuia mi amanih, a ieng angpui khawm i ta dingin i siem ding a ni nawh.

5 an kuoma chun kûnin an rawng i bâwl ding a ni nawh: Lalpa i Pathien hi Pathien thîkthusetak, pahai khawhlona chu nauhai chunga hung intlungtir hlaktu, a mi theidatuhai chu an thla suon thum le suon li chen chunga khawm, hremna intlungtir hlaktu le

6 a mi hmangaituhai le ka thupêk hai zâwmtuhai sâng tamtak chunga zângaina inentirtu chu ka ni si a.

7 Lalpa i Pathien hming a thlâwnin i sâm mei mei ding a ni nawh; ama hming a thlâwna sâm mei meitu chu Lalpa chun suol lovah a ngai naw ding a ni si a.

8 Châwlni chu vawng inthieng dingin hre zing rawh.

9 Ni ruk sûng sin thâwng i ta, i sin po po chu thâwng i tih.

10 Ni sari ni ruok chu Lalpa i Pathien kuoma châwlni a nih; chu ni chun ieng sin khawm i thaw ding a ni naw a, nang khawmin, i naupa khawmin, i naunu khawmin, i siehlawpa khawmin, i siehlawnu khawmin, i ran ruol khawmin, i kawtkhâr sûnga khuolzintu khawmin a thaw ding a ni bawk nawh:

11 ni ruk sûngin Lalpa chun vân le hnuoi, tuipui le an sûnga um po po le chun a siem zo vawng a, a ni sari ni chun a châwl si a; chuongchun, Lalpain châwlni chu mal a sâwm a, ân ser ta a.

12 I nu le pa chawimawi rawh: Lalpa i Pathienin a pêk che rama hin i nihai chu a sâwt theina dingin.

13 Tuol i that ding a ni nawh.

14 I uire ding a ni nawh.

15 În rûk ding a ni nawh.

16 I vênghai chungah hrietpuina inkhêl i hril ding a ni nawh.

17 I vênghai in în hnar ding a ni nawh; i vênghai nuhmei amanih, a siehlawpa amanih, a siehlawnu amanih, a bâwngchal amanih, a sabengtung amanih, i vênghai thil nei hrim hrim chu în hnar ding a ni nawh,” tiin.


Mipuihai ṭîna
( Dt 5.22-33 )

18 Mipui po po chun vâninrûmhai, ṭêktlahai, tawtawrâwt ri le, tlâng khu suok chu an hmu chun mipui chu an inthin a, hlatakah an ngîr a.

19 Anni chun Mosie kuomah, “Nangin kan kuomah thu hril la, ngai kan tih; Pathien ruok chun kan kuomah thu hril naw raw se. Chuong naw chun thîng kan tih,” an ti a.

20 Mosie chun mipui kuomah, “Ṭi naw ro. Pathien ṭiumna chu in hmua in suol nawna dingin nangni infiena ding cheuin ama chu a hung a ni si a,” a ti a.

21 Mipui chu hlatakah an ngîr a, Mosie chun Pathien umna inthim samup tieng chu a va hnai ta a.


Maichâm dânhai chu

22 Lalpa chun Mosie kuomah, “Hieng ang hin Israel mihai kuomah hril rawh: Nangni ngeiin vâna inthawka ka hung biek ta cheu ti in hmu a.

23 Keima le biek ding pathien danghai in insiem ding a ni naw a, in ta dingin tangkaraw pathienhai, rângkachak pathienhai in siem ding a ni bawk nawh.

24 Ka kuomah leihnuoiin maichâm siem i ta, chu chunga chun râwhmang thilinhlânhai, inremna thilinhlânhai le, i berâmhai le i bâwngchalhai chu hung inhlân i ta; ka hming hriet zing dinga ka tina chun i kuomah hung ka ta, mal sâwm ka ti che.

25 Lung maichâm i mi siempêk chun, lung cherhai hmangin i bâwl ding a ni nawh; a chungah hriemhrei în let chun i sukpawrche a nih.

26 I saruokna chu hmu a ni nawna dingin, kailâwnhaiin ka maichâma chun i hang kai ding a ni bawk nawh.

Hmar OV (Re-edited) Bible (Millennium) - Pathien Lekhabu Inthieng 

Copyright © Bible Society of India, 2016.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ