FESUOKNA 18 - Pathien Lekhabu Inthieng (BSI)

Jethroin Mosie a kan

¹ Chun, Jethro, Midian mihai thiempu, Mosie tarpupa chun Mosie le a mi Israelhai ta dinga Pathienin thil a thawpêkzie, Aiguptaa inthawkin Israelhai chu Lalpain a hung ṭhuoi suokzie chu a lo hriet a.

² Chun, Jethro, Mosie tarpupa chun, Mosie nuhmei, Zippora, a itirhmang ta hnung le,

³ a naupasalhai pahni chu a ṭhuoi a; chuhai pakhat hming chu Gersom a nih, “Hrietlo rama inzin ka ni ta a” a ti si a:

⁴ Chun, a dang hming chu Eliezer a nih, “Ka thlatu Pathien chu ka ṭhangpuitu a na, Pharao kâwlhnâma inthawkin a mi sansuok ta a” a ti bawk a.

⁵ Chun, Jethro, Mosie tarpupa chu, a naupasalhai le, a nuhmei leh Mosie kuomah, thlalêra a riebûk, Pathien tlânga chun a hung a.

⁶ Ama chun Mosie kuomah, “Kei i tarpupa Jethro hi, i nuhmei le a naupasalhai pahni le chun i kuomah ka hung a nih,” tiin thu ân cha a.

⁷ Mosie chu a tarpupa tuok ding chun a fe suok a, inza taka chibai bûkin ama a fâwp ta a; chun, an chanchin an indawntuo an indawntuo a, puon ina chun an lût ta a.

⁸ Mosie chun, Israelhai leia Pharao chunga le Aigupta mihai chunga Lalpa thil thaw ta po pohai, lampuia an chunga rimsikna hung tlunghai le, Lalpain anni a sansuokzie chu, a tarpupa Jethro chu a hril ta a.

⁹ Aigupta mihai kuta inthawka sansuokin, Israelhai chunga Lalpain thilṭha a thaw po pohai chunga chun Jethro chu a lâwm hle a.

¹⁰ Jethro chun, “Aigupta mihai kuta inthawk le, Pharao kuta inthawka sansuoktu cheu Lalpa chu inpâkin um raw se; Aigupta mihai kuta inthawka a mihai sansuoktu chu.

¹¹ Tuhin pathienhai po po nêkin Lalpa chu a ropui lem ti ka hriet, chapotaka anni an sawisak lai ngeia Aigupta mihai kut hnuoia inthawka a mihai chu a sansuok leiin,” a ti a.

¹² Chun, Mosie tarpupa Jethro chun inthâwinahai le pumrawhmang thilinhlânhai Pathien ta dingin a lâk a; chun Aron chu Israel upahai po po leh Pathien hmaa Mosie tarpupa le bei fa dingin an hung ta a.

Rorêltu dinghai ruotna

¹³ A zînga chun Mosie chu mipui ro rêlpêk dingin a ṭhung a; mipui chu zîngkâra inthawk zântieng chenin Mosie vêla chun an ngîr ta a.

¹⁴ Mosie tarpupa chun mipui kuoma a thilthaw po po chu a hmu chun, “Mipui ta dinga i thaw hi ieng thil am a na? Iem a ti a nang i khât bakin în ṭhung a, mipui chu i vêlah zîngkâra inthawk zântieng chena an ngîr hi?” a ti a.

¹⁵ Mosie chun a tarpupa kuomah, “Mipui chu Pathien ti zâwng indawn dinga ka kuoma an hung leiin a nih.

¹⁶ Thubuoi an nei pha ka kuomah an hung a; chun, a vênghai le mi dang kâra thu chu ka rêl a, Pathien dân ziekhai le a dânhai chu ka lo inhriettir hlak a nih,” a ti a.

¹⁷ Mosie tarpupa chun a kuomah, “Hi thil i thaw hi a ṭha naw ie.

¹⁸ Nang le i kuoma mipui umhai hi lân sukchâu ngei ngei in tih; i ta dingin hi thil hi a rik talaw si a; nanga khât bak chun i thaw thei nawh annawm.

¹⁹ Tuhin, ka thu hi lo ngâi ta, thurâwn hang pêng ka ti che: Pathien chu i kuomah um sienla, Pathien hmaah nang chu mipui aiawtu ni la; nangin Pathien hmaah thubuoi chu intlun pei bawk la:

²⁰ chun, dân ziekhai le dânhai chu anni inchûktir i ta, an sin thaw dinghai le, kawng an hraw ding chu anni kâwkhmu bawk i ta.

²¹ Chunawa khawm mipui laia inthawk mi thei thei, Pathien ṭi mi, mi indikhai, hlêpna felnaw theida mihai thlang suok la, anni chu sâng khat chunga rorêltu, za khat chunga rorêltu, sâwmnga chunga rorêltu, sâwm chunga rorêltuhai ni dingin sie rawh.

²² Ieng lai khawmin anni chu mipui ro chu inrêltir la, thubuoi lien takhai bak hung intlun an ta, thubuoi chînhai chu annîn lo rêl el an ta; chuongchun, i ta dingin awl lem a ta, i rikphur chu an phurpui ding che annâwm.

²³ Pathienin hieng angtaka thu a pêk chea, hi thil hi i thaw chun, nang khawmin pei sâwt i ta, mipui po po khawm hi an hmun sengah thlamuongtakin fêng an tih,” a ta.

²⁴ Mosie chun a tarpupa thu chu a ngai a, a hril po po chu a thaw ta a.

²⁵ Mosie chun Israel mihai laia inthawkin mi thei deu deu a thlang suok a, anni chu mipui luhai ni dingin, sânghai, zahai, sâwmngahai le sâwmhai chunga rorêltuhaiah a sie ta a.

²⁶ Anni chun ieng huna khawm mipui ro chu an rêlpêk a, thubuoi intakhai chu Mosie kuomah an hung intlun a, thubuoi chînhai ruok chu annîn an lo rêl ta a.

²⁷ Chun, Mosie chun a tarpupa chu ân fetir a; a umna ram tieng chun a fe ta a.