EZRA 1 - Pathien Lekhabu Inthieng (BSI)

Kura thupuong

¹ Persia lal Kura inlal kum khatna chun, Jeremia baua Lalpa thuhril chu a hung tlung theina dingin Lalpa chun Persia lal Kura lungril chu a chawktho ta a, chuongchun, a ram po poa chun thu inhriettirna a siem a, a zieka ziek khawmin a sie bawk a,

² “Persia lal Kura chun hieng ang hin a hril, ‘Leihnuoia ram po pohai chu Lalpa vâna Pathien chun a mi pêk a; Juda rama Jerusalema chun a ta dinga in bâwl dingin a mi phût bawk a nih.

³ A mi po pohai, nangni laia mi tukhawm kuomah a Pathien chu um raw se! Juda rama Jerusalema chun hang fe sienla, Lalpa Israelhai Pathien (ama chu Jerusalema um Pathien chu a nih) in chu hang bâwl raw se.

⁴ Chun, mi tukhawm ân pêmna hmun khâwlaia khawm mâksan a um chun, ama hmuna mihai chu tangkaruo le, rângkachak le, thuomhnawhai le, ranhaiin nuomthua pêk bâkah ṭhangpui raw se,’ ” tiin.

Sal intânghai Jerusalemah an kîr

⁵ Chun, Juda le Benjamin pahnam luhai le thiempuhai le, Levi mihai, Jerusalema um Lalpa in bâwl dinga hang fe dinga Pathienin an lungril a chawkthohai taphawt chu an tho ta a.

⁶ Chun, an vêla mi po pohai chun, inhâwktaka an inhlân po po bâka chun, tangka dâm, rângkachak dâm, thuomhnawhai dâm, ranhai dâm le thil hlutakhaiin an kuthai chu an sukhrât a.

⁷ Lal Kura khawm chun Lalpa ina bûr le bêlhai, Nebukadnezzarin Jerusalema inthawka a hung lâk a, a pathien ina a siehai chu a hung lâk suok a.

⁸ Persia lal Kura chun, chuonghai ngei chu sum enkawltu Mithredath kutin a hung lâk suok a, Juda ram lal Sesbazzar kuoma chun a tiempêk ta a.

⁹ Chun, hi hi chuonghai nizât chu a nih; rângkachak thlêng lien sâwmthum, tangkaraw thlêng lien sâng khat, chemtê sâwmhni pakuo;

¹⁰ rângkachak no sâwmthum, tangkaraw no a chi dang za li le sâwm khat le bûr le bêl dang hrim hrim sâng khat leh.

¹¹ Rângkachak le tangkaraw bûr le bêl po pohai chu sâng nga le za li an nih. Hienghai po po hi Sesbazzar chun, sal intânghai Babulona inthawka Jerusalema an hung ṭhuoi ruol chun a hung lâk ve a nih.