EZEKIEL 7 - Pathien Lekhabu Inthieng (BSI)

Tâwpna a hung tlung

¹ Chu nawa khawm, Lalpa thu chu ka kuomah a hung tlung a,

² “Nang mihriem naupa, Israel ram kuoma chun Lalpa Pathien chun hieng ang hin a tih; Tâwpna, tâwpna chu ram kil lia inthawkin a hung tlung tah.

³ Tuhin tâwpna chu i kuoma chun a um a, i chunga chun ka lunginsenna chu ka hung tir ding a nih; i umdânhai ang peiin i chungthu rêl ka ta, i tirdakumnahai leiin hrem ka ti che.

⁴ Ka mit chun hla naw ni che a, lunginsietna khawm nei naw ning che; nisienlakhawm, i um dânhai leiin hrem ka ti che, i tirdakumna chu nangmaah a um si a; chun, Lalpa chu ka nih ti mi hre tâng i tih.

⁵ “Lalpa Pathien chun hieng hin a tih; Thil ṭha naw, ṭha naw tak meu; en ta a hung a nih.

⁶ Tâwpna a hung tlung a, tâwpna chu a hung tlung tah; i chunga chun a hung tho a, ngai ta, a hung a nih.

⁷ Aw ram hluotu, i chungrikna chu a hung tlung tah; a hun chu a hung tlung a, a ni chu a hnai tah, tlâng chunghaia hlimna khêk rihai ni lovin, buoina ni chu.

⁸ Tuhin sâwt nawteah ka lunginsenna chu i chungah hung bunthlâng ka ta, i chunga ka lunginsenna chu sukpuitling ka tih; i um dânhai ang peiin i chungah ro rêl ka ta, i tirdakumnahai po po leiin hrem ka ti che.

⁹ Ka mit chun hla naw ni, lunginsietna nei bawk naw ning; i um dânhai ang peiin i chungah hung intlungtir ka ta; i tirdakumnahai chu nangmaah a um si a; chun, kei Lalpa hin ka hrem che a nih ti hre tâng i tih.

¹⁰ Ngai ta, ni chu, ngai ta, a hung tlung; i chungrikna chu a fe suok ta a, hmawl chu ân dâwn a, chapona chu a kumûm tah.

¹¹ Thawluinaa inthawkin rîtlona hmawl a hung suok a, a tu el khawm um sawng thei naw ni a, an mipuihai khawm, an hausaknahai khawm; anni lai chun a ṭhabik ti khawm um naw nih.

¹² A hun chu a hung tlung a, a ni chu a hung hnai tah; inchawtu chu hlim naw sienla, a zawrtu khawma pawiti bawk naw raw se; mi po po chungah lunginsenna chu a um si a.

¹³ An dam zing sûng chun, a zawrtu chu zawra um tah kuoma chun a kîr nâwk âwm si naw a; hi thilhmulâwk hin mipui po po a huom vawng a; tukhawm kir nâwk naw ni a, tukhawm ama suolnaa chun dam muolsuo naw nih.

¹⁴ Tawtawrâwt chu an mût ta a, mi po po chu an inringtir vawng ta a; nisienlakhawm, tukhawm indonaa chun an fe naw a; ka lunginsenna chu mipui po po chunga chun a um si a.

Israel suol hremna

¹⁵ “Kâwlhnâm chu puotieng a um a, ṭâmna le hripui chu sungtienga chun a um a; loa um chu kâwlhnâmah thîng a ta, khawpui sûnga um chu hripui le ṭâmna chun fa zo a tih.

¹⁶ Nisienlakhawm, chutaka lo suokthleng chu suokthleng an ta, vaṭhu angin tlângahai chun um an ta, an rêng el chun sûn an tih, mi tinin mâni suolna seng chu.

¹⁷ Kuthai po po chu hrât lovin um an ta, khûphai po po chu tui anga zawiin um an tih.

¹⁸ Saiip puonhaiin inchei an ta, ṭitnain anni chu inkhum a tih; an hmaihai chunga chun inzakna um a ta, an luhai po po chunga chun lukâwkna um a tih.

¹⁹ An tangkahai chu kawtthlêrhaia chun dehâwn an ta, an rângkachakhai khawm chu thil thieng naw ang hung nîng a tih; an tangka le rângkachak chun Lalpa lunginsenna nia chun anni chu sansuok naw ni a; an lungril chu suktlaiin, an phîng khawm chu sukkhawp bawk naw ni hai, an suolnaa tlûkna lung a ni tâk leiin.

²⁰ An incheina mawina chu inlalsaknân an hmang a; nisienlakhawm, an tirdakumna limhai chu an siemin, an pawrchena thilhai limhai le chun; chuleiin, an ta ding chun thil thiengnawah ka siem tah a nih.

²¹ Man dingin ramdang mihai kutah pêng ka ta, mi rilohai kuomah râllâk dingin; chuongchun, sukpawrchêng an tih.

²² Ka hmai chu an kuoma inthawkin la hmang ka ta, ka hmun inthieng chu sukpawrchêng an tih; inru hmanghai chu a sûngah lût an ta, sukpawrchêng an tih;

²³ Khaidiet chu siem rawh; ram chu thisen insuo thusiein a sip a, khawpui sûng chu inpâwngnêknain a sip si a.

²⁴ Chuleichun, awi naw mi ṭha nawtakhai chu hung ṭhuoi ka ta, an inhai chu neipêk an tih; mi hrâthai chapona chu suktâwp bawk ka ta; chun, an hmun inthienghai chu sukpawrche nîng an tih.

²⁵ Bohmangna chu a hung tlung mêk a, inremna chu zawng an tih; anachu um naw ni.

²⁶ Sietna chunga siet nâwk zuolna hung tlung a ta, thuthang chunga chun thuthang um a ta; chun, zâwlnei thilhmulâwkhai chu zawng an ta, nisienlakhawm, thiempua inthawkin dân le, mi hluihaia inthawkin thurâwn chu bohmang tâng a tih.

²⁷ Lal chu lusûnin um a ta, hotu khawm chu beidawngnain inthuom a tih; chun, rama mipuihai kuthai chu sukbuoi nîng a ta; an um dânhai ang peiin an chungah thâwng ka tih; chun, an ngaithana ang peiin rorêlpêk ka ta; chun, Lalpa ka ni ti mi hre tâng an tih,” tiin.