EZEKIEL 43 - Pathien Lekhabu Inthieng (BSI)

Lalpa ropuinain Biekin a suksip

¹ Chu hnunga chun dâi kawtkhâr, saktieng ngha dâi kawtkhâra chun a mi ṭhuoi ta a;

² chun, ngai ta, saktienga inthawk chun Israel Pathien ropuina chu a hung tlung ta a; chun, a râwl khawm chu tui tamtak ri ang a nih; chuongchun, a ropuina chun hnuoi chu a var ta a.

³ Chun, thilhmulâwk ka ihmu tah, khawpui chu sukse dinga a hung laia thilhmulâwk ka hmu ang tak, chu thil hmulâwk chu Kebar vadung panga thilhmulâwk ka hmu ang kha a nih; chuongchun, ka hmaiin hnuoi ka sik ta a.

⁴ Chun, dâi kawtkhâr, saktieng nghaa inthawk chun Lalpa ropuina chu ina chun a hung lût a;

⁵ Thlarau chun a mi dawm kâng a, huon sûng tuollai sungril lema chun a mi ṭhuoi ta a; chun, ngai ta, Lalpa ropuina chun in chu a suksip ta a.

⁶ Mi pakhat ka sîra a ngîr zing lai chun, ina inthawk chun mi pakhat hin ka kuomah thu hrilin ka hriet a;

⁷ ka kuoma chun, “Mihriem naupa, hi hi ka lalṭhungpha hmun le ka kehai innghatna hmun, Israel thlahai kuoma chatuona ka chêngna ding chu a ni hi. Israel sûngkuo chun ka hming inthieng chu sukpawrche ta naw ni hai a, anni khawmin, an lalhai khawm, an hurnain amani, an bâwlhmunhaia an lalhai ruonghai khawmin amanih sukpawrche naw ni hai,

⁸ an tuolpûk chu ka tuolpûk kâwla siein, an kawtkhâr bieng chu ka kawtkhâr bieng sîrah, anni le keia kâra chun bang chau a uma chu; an tirdakumna an lo thaw tahai chun ka hming inthieng chu an lo sukpawrche ta a; chuleiin, ka lunginsenna chun anni chu ka kâng hmang ta a.

⁹ Tuhin an hurna le an lalhai ruonghai chu keimaa inthawka hlatakah sie hmang hai sienla, anni lai chun chatuonin chêng tâng ka tih.

Biekina invawng dânhai le maichâm chu

¹⁰ “Nang mihriem naupa, Israel sûngkaw kuoma chun in kha inentir rawh, an suolhai leia an inzak theina dingin; chuongchun, a riruong kha inkhitir rawh.

¹¹ Chun, an thil lo thaw tahai po po kha an inzâpui a ni chun in riruong, a hmêlput dân, a fe suokna, a lûtna, a hmêl umziehai po po le chutaka dânhai po po leh inhriettir la, an mithmu ngeia chun ziek la, chu chu hmêl put dân po po chu an vawng zinga, dânhai po po khawm chu an kawla an zâwm theina dingin.

¹² Hi hi in dân chu nîng a tih; tlâng sîp chunga a huop chin chin chu hmun inthiengtak nîng a ta; Ngai ta, hi hi in dân chu nîng a tih.

¹³ “ Chun, hieng hi tawnga inkhia maichâm lienzie chu a nih; (tawng chu tawng le kutpha bawk a nih) a mawng chu tawng khat nîng a ta, a khang tieng khawm tawng khat bawk; a rei sira a tlâng chu a vêlin khâp khat nîng a ta, hi hi maichâm mawng chu nîng a tih.

¹⁴ Chun, hnuoi ân ṭhutnaa inthawk chun a rei hnuoihnung lem chen chun tawng hni nîng a ta, a khang tieng chu tawng khat; chun, a rei chîn lema inthawka a rei lien lem chen chu tawng li nîng a tih, chun, a khang tieng chu tawng khat.

¹⁵ Maichâm chunghnung lem chu tawng li nîng a ta; maichâm thuk le a chung tienga chun kihai pali um a ta.

¹⁶ Maichâm thuk chu tawng sawmpahnia sei, tawng sâwmpahni maa lien nîng a tih, a sîr palia chun intiet seng nîng a tih.

¹⁷ A sîrhai pali chun a rei chu tawng sâwmpalia sei a, tawng sâwmpali maa lien nîng a tih; a tlâng chu a vêlin tawng chenve nîng a ta; chu mawng chu tawng khat lai ni bawk a ta; a sirbihai chu saktieng nghâng a tih.

¹⁸ Chun, ka kuomah a hril a, “Mihriem naupa, Lalpa Pathien chun hieng hin a tih: A chunga pumrawhmang thilinhlân an inhlân a, thisen a chunga an the ni chun, hieng hi maichâm thuthlunghai chu nîng a tih.

¹⁹ Levi mi thiempuhai, Zadok thlaa mi ngei chu, keia rawngbâwl dinga kei a mi hnaihai kuoma chun suol thilinhlâna dingin bâwngchal tuoi pêng i tih, Lalpa Pathien chun a tih.

²⁰ Chun, chu thisen chu lâng i ta, a kihai pali chun nâl i ta, a rei ki lia le, a tlâng a sîrvêl poa hai le chun; chuongchun, sukthieng i ta, ama ta ding chun intlanna siem i tih.

²¹ Suol thilinhlân dinga bâwngchal khawm chu lâng i ta, chu ina hmun ruot hmun inthieng tuola chun râwng i tih.

²² Chun, a ni hni nia chun suol thilinhlân ding chun kêlchal demkailo inhlân i tih; bawngchal hmanga maichâm sukthieng a ni ang bawk khan, maichâm chu sukthieng nîng a tih.

²³ Chun, sukthiengna thil chu i thaw zo pha chun bâwngchal tuoi demkailo le, a ruol laia berâmchal demkailo chu inhlân i tih.

²⁴ Chun, nang chun Lalpa kuomah hung ṭhuoi i ta, thiempuhai chun an chunga chun chi lo thêng an ta, chuongchun, Lalpa kuomah pumrawhmang thilinhlân dingin inhlân an tih.

²⁵ Ni sari sûng chu ni tin, suol thilinhlân dingin kêl buotsai i ta; chun, bâwngchal tuoi le berâmchal a ruol laia mi demkailo i buotsai bawk ding a nih.

²⁶ Ni sari sûng chu maichâm ta ding chun intlanna siempêk an ta, sukthieng an tih, chuongchun, inhlânthieng an tih.

²⁷ Chun, nihai chu an hmang zo pha, ni rietnaa inthawk chu, thiempuhai chun in pumrawhmang thilinhlânhai chu maichâma chun thâwng an ta, in inremna thilinhlânhai le chun; chuongchun, lo pawm ka ti cheu, Lalpa Pathien chun a tih,” tiin.