EZEKIEL 41 - Pathien Lekhabu Inthieng (BSI)

¹ Chun, ama chun Pathien biek ina chun a mi ṭhuoi a, chun, kawtkhâr bieng chu ân khi a, hi tieng sîrah tawng ruka lien a na, khing tieng sîra khawm tawng ruka lien bawk a nih; chu chu biekbûk khang tieng ruol a nih.

² A lûtna khang tieng chu tawng sâwm a na; lûtna sîr chu sîr khatah tawng nga a na, sîr danga khawm tawng nga bawk a nih; chun, chu dung tieng chu tawng sâwmliin ân khi a, a khang tieng chu tawng sâwmhniin.

³ Chun, a sûngah a lût a, lûtna kawtkhâr bieng chu tawng hniin ân khi a; a lûtna chu tawng rukin; a lûtna khang tieng chu tawng sariin.

⁴ Chun, pindan chu ân khi a, a dung tieng chu tawng sâwmhniin ân khi a, a khang tieng khawm tawng sâwmhni bawkin; chun, ka kuoma chun, “Hi hi hmun inthiengtak chu a nih,” a ta.

⁵ Chun, in bang chu ân khi a, tawng ruk a na, sîr tinah a in vêl chun, pindan kêmhai khang tieng chu tawng li pei a na.

⁶ A sîr pindanhai chu pathum a na, pakhat chungah a dang, chuong ang peia sâwmthum chena indawt peiin; Inpui banga chun inbûkna nei lova, chutaka chun inbûkna an nei thei lemna dingin, a vêla pindan kêmhai ta ding hrima ruot inpui banga filawrhaia chun an vân bûk a.

⁷ Pindan kêmhai chun in chu an vêl sâng deu deu chun an lien deu deu a; in sîr vêl chun a pindan inzâwnpui ang peiin a lien tung pei a; chuongchun, in vêlin a sûngpui chu a chin deu deu pei a, in sîra chun leilâk a fe tung pei a; chuongchun, mi chun pindan hnuoihnung taka inthawka a chunghnung taka chun pindan lailung hraw tlangin a fe a nih.

⁸ Chun, in chun a vêlin a rei sukkho a nei ka hmu bawk a; chun, pindan kêmhai lungphûmhai chu luonghmawl tling tawng ruk a nih.

⁹ Chun, pindan kêmhai bang sazie chu a puotiengah tawng nga a nih; chun, chutaka la mahla chu pindan kêmhai a sûnga umhai sîr thlâk chu a la nih.

¹⁰ Chun, inpui lungrem le pindan kêmhai inkâr chu sîr tinah a in vêl suokin, tawng sâwmhnia lien a um a.

¹¹ Chun, pindan kêmhai kawtkhârhai chu chu hmun la âwl tieng chun hawng a na, kawtkhâr pakhat chu hmârtieng nghain, kawtkhâr dang chu simtieng nghain; chun, chu hmun âwl chu a khang tieng chu a vêlin tawng nga a nih.

¹² Chun, in thlangtieng panga hmun âwl hmaa in chu tawng sâwmsaria lien a na; chun, chu in chu a bang sazie chu a vêlin tawng ngaa sa a nih, a dung tieng chu tawng sâwmkuo a nih.

¹³ Chun, in chu tawng zaa seiin ân khi a; chun, hmun daidana um le a in le, chutaka banghai le chun tawng za chu a nih;

¹⁴ chun, in hmai khang tieng saktieng panga hmun âwla um chu tawng za a nih.

¹⁵ Chun, chu hnungtienga um hmun âwla in seizie chu ân khi a; chutaka a dawdanhai le, sîr khat le sîr khingtienga dawdanhai le chun tawng za a nih; chun, biekin sûngril lem, huon sûng tuollaia tuolpûkhai, a kawtkhâr bienghai, thingphêka inthuo a na;

¹⁶ a tukver inkhâr zinghai, a sâwng thuma a dawdanhai a vêlin a um a; a inpui kawt lûtnaa inthawk, a vêla thingphêka remin ṭuonga inthawka tukver chen rem a nih;

¹⁷ chuongchun, tukverhai chu inthuo an na; kawtkhâr lu chung hmun, in sûngril lem le puo lem, a vêlin a puo le sûngah banghai chun, inkhi thlapa inkhum a nih.

¹⁸ Chun, cherubhai le intûm thinghaia chei a na; intûm thing chu cherub le cherub inkâra chun a um a, chun, cherubhai chun hmai pahni seng an nei a;

¹⁹ chuongchun, sîr khata chun intûm thing tieng chun mihriem hmai chu a ngha a, chun, sîr khingtienga chun intûm thing tieng ngha ma chun sakeibaknei tuoi hmai chu a ngha a; in chu a vêlin chuong ang taka siem suok vawng chu a nih.

²⁰ Hnuoia inthawka kawtkhâr lu chung chen chun cherubhai le intûm thinghaia siem a na; biekin bang chu chuong ang chu a nih.

²¹ Biekin thua chun, a kawtkhâr bienghai chu kil li nei an na; chun, hmun inthieng tak hmaa chun, thinga siem maichâm ang a um a.

²² Chun, maichâm chu thing a na, ân sâng tieng chu tawng thum a na, a sei tieng chu tawng hni a nih; a kihai le, a mawnghai le a banghai chu thing ruok a nih; chun, ama chun ka kuomah, “Hi hi Lalpa hmaa dawkân chu a nih,” a ti a.

²³ Chun, biekin le hmun inthieng tak chun kawtkhâr pahni a nei a.

²⁴ Kawtkhârhai chun, phêk hran pahni, phêk hni inthlep a nei a, kawt- khâr pakhat ta dingin, phêk hni, kawt- khâr dang ta dingin phêk hni bawk.

²⁵ Chun, an chunga chun, biekin sûtpui kawtkhârhaia chun cherubhai le intûm thinghai lim siem an na, bang chunghaia siem ang bawk khan; chun, tuolpûk puotieng hmaa chun thingpum lientak tak a um a.

²⁶ Chun, tukver inkhârhai le, tuol-pûka chun sîr khata le sîr khingtienga khawm chun intûm thinghai chu an um a; pindan kêmhai le thingphêk satakhai chu chuong ang chu a nih.