EZEKIEL 40 - Pathien Lekhabu Inthieng (BSI)

Zâwlneiin inlârnaa Biekin a hmu thu

¹ Kan sal intâng kum sâwmhni panga kum, chu kum kum ṭantir, chu thla ni sâwm ni, khawpui chu suksieta a um hnung kum sâwm pali kum, chu ni le le chun Lalpa kut chu ka chungah a um a, chungtienga chun a mi ṭhuoi ta a.

² Pathien thil hmulâwknaa chun Israel ramah a mi ṭhuoi a, tlâng insângtak, a simtienga chun khawpui riruong chu a um a, chutaka chun a mîn ṭhum ta a.

³ Chun, chu tieng chun a mi ṭhuoi a, chun, ngai ta, mi pakhat, a hmêlput dân chu dârsen ang, a kuta ziza hruol le, inkhina luonghmawl chawi a um a; dâi kawtkhâra chun ama chu a ngîr a.

⁴ Chu mi chun ka kuomah, “Mihriem naupa, i mithai khan en la, i nahai khan lo ngai bawk la, ka în hmutir dinghai che po po chunga chun i lungril sie rawh; i kuoma kân hmutir theina ding chea hi tienga hung ṭhuoi i ni hrim a; chuongchun, i hmuhai po po chu Israel sûngkuo kuoma chun puong rawh,” a ti a.

⁵ Chun, ngai ta, in puotienga chun bang chu a vêlin a um a; chu mipa kuta inkhina luonghmawl chu tawng ruka sei a na, tawng khat le kutphabawk seng a nih; chun, a in sa tieng chu ân khi a, luonghmawl khat a na; ân sâng tieng khawm chu luonghmawl khat bawk.

⁶ Chun, saktieng ngha dâi kawtkhâra chun a hung a, chutaka kailâwnhaia chun a hang fe a; dâi kawtkhâr tuolpûk chu ân khi a, luonghmawl khat a na, tuolpûk dang khawm chu luonghmawl khat bawk a nih.

⁷ Chun, vêngna pindan tinhai chu luonghmawl khata sei, luonghmawl khata lien a nih; vêngna pindan inkâr chu tawng nga a na; dâi kawtkhâr tuolpûk chu, a in tieng panga tuolpûka chun luonghmawl khat a nih.

⁸ In tieng panga a dâi kawtkhâr tuolpûk khawm chu ân khi a, tawng riet a nih.

⁹ Chun, dâi kawtkhâr tuolpûk chu ân khi a, tawng riet a nih, chun, kawtkhâr bieng chu tawng hni; chun, a dâi kawtkhâr tuolpûk chu in tieng panga chun a um a.

¹⁰ Chun, dâi kawtkhâr vêngna pindanhai chu, saktieng hi tieng panga chun pathum a na; pathum chu intie seng an na; chun, a kawtkhâr bienghai khawm chu hi tieng le saw tienga chu intie an nih.

¹¹ Chun, a kawtkhâr kawt lien khangtieng chu ân khi a, tawng sâwm a na; a kawtkhâr seizie chu tawng sâwmpathum;

¹² chun, vêngna pindan hmaa a rei sîr chu hi tieng sîrah tawng khat, khing tieng sîra chun tawng khat bawk; chun, vêngna pindanhai chu hi tieng sîra chun tawng ruk, khing tieng sîra chun tawng ruk bawk.

¹³ Chun, vêngna pindan chunga pakhata inthawkin pindan dang chunga dâi kawtkhâr chu ân khi a; a khang chu tawng sâwmhni panga a na, kawtkhâra inthawka kawtkhâr dang chenin.

¹⁴ Chun, tuolpûk chu ân khi a, tawng sawmhni a na; huon sûng tuollai dâi kawtkhâr chen chu a tuol zâwl chu a nih.

¹⁵ Chun, lûtna dâi kawtkhâr tuolthlâka inthawka dâi kawtkhâr tuolpûk sûngril lem tuolthlâk chen chu tawng sâwmnga a nih.

¹⁶ Dâi kawtkhâr chun a vêlin, pindan kêm kawtkhâr bieng tienga chîn inzui pei tukverhai a nei a. Chuong ang bawkin a tuolpûk sûngtieng a vêlin tukverhai an um bawk a, a banhaia chun intûm thing lim a um a.

¹⁷ Chun, huon sûng tuollai puo lema chun a mi ṭhuoi a, chun, ngai ta, pindanhai le lungpha, a vêla huon sûng tuollai dinga an siem chu a um a; lungpha chunga chun pindan sâwmthum a um a.

¹⁸ Lungpha chu dâi kawtkhârhai sîra chun a um a, dâi kawtkhârhai le inchen chie, lungpha hnuoihnung lem chu a nih.

¹⁹ Chun, dâi kawtkhâr hnuoihnung lema tuolthlâka inthawka, a huon sûng tuollai sûngril lem tuolthlâk khangtieng chu ân khi a, a saktieng le a hmârtieng chu tawng za khat ve ve a nih.

²⁰ Chun, a huon sûng tuollai puo lem dâi kawtkhâr, hmârtienga ngha chu, a chu dungtieng le chu khangtieng chu ân khi a.

²¹ Chun, vêngna pindanhai chu hi tieng sîrah pathum, khingtieng sîrah pathum bawk a nih; chun, a kawtkhâr bienghai le a tuolpûkhai chu a dâi kawtkhâr pakhatna tie seng chu a na; a dung tieng chu tawng sâwmnga a na, a khang tieng chu tawng sâwmhni panga.

²² A tukverhai le, a tuolpûk le, chutaka intûm thinghai chu, saktieng panga ngha dâi kawtkhâra mi tie seng kha an nih; chun, sirbi pasariin a hang tlung a, chun, tuolpûk chu sûngtienga chun a um a.

²³ Chun, dâi kawtkhâr dang zâwna chun, tuollai sûng sûngril lema dinga dâi kawtkhârhai a um a; saktieng panga le hmârtieng panga chun dâi kawtkhâra inthawka dâi kawtkhâr chen chun tawng za khatin ân khi a.

²⁴ Chun, sim tieng panga chun a mi ṭhuoi a, simtienga dâi kawtkhâr chu ka hmu a, chuongchun, hi inkhina dân ang pei hin chutaka a kawtkhâr bienghai le a tuolpûkhai chu ân khi a.

²⁵ Khâng tukverhai ang bawk kha, a keikul haia le chun chutaka chun tukverhai a um a, a seizie chu tawng sâwmnga a na, a khang tieng chu tawng sâwmhni panga a nih.

²⁶ Chun, a hang kaina dinga chun sirbi pasari a um a; a tuolpûkhai chu chuonghai hmaa chun a um a; chun, chutaka a kawtkhâr bienghai chunga chun intûm thinghai, hi tiengah pakhat, khing tiengah pakhat bawk a um a.

²⁷ Chun, simtieng panga chun a huon sûng tuollai sûngril lema dâi kawtkhâr chu a um a; chun, simtienga a dâi kawtkhâra inthawka dâi kawtkhâr chu tawng za khatin ân khi a.

²⁸ Chun, simtienga dâi kawtkhâra chun huon sûng tuollai sûngril lema chun a mi ṭhuoi a; hieng inkhina dân hin simtienga dâi kawtkhâr chu ân khi a;

²⁹ hieng inkhina dân ang hin a vêngna pindanhai, kawtkhâr bieng- hai le tuolpûkhai chu ân khi a; chun, a vêlin a tuolpûkhai le chun tukverhai a um a; tawng sâwmngaa sei, tawng sâwmhni pangaa lien a nih.

³⁰ Chun, a vêlin tuolpûkhai tawng sâwmhni pangaa sei, tawng ngaa lien a um a.

³¹ Chun, a tuolpûkhai chun huon sûng tuollai puo lem tieng a nghaa, a kawtkhâr bienghai chunga chun intûm thinghai an um a; a hang kainaa chun kailâwn pariet a um a.

³² Chun, saktieng panga huon sûng tuollai sûngril lema chun a mi ṭhuoi a, chun, hieng inkhina ang pei hin dâi kawtkhâr chu ân khi a,

³³ a vêngna pindanhai, a kawtkhâr bienghai, a tuolpûkhai chu hieng inkhina dân ang hin ân khi a; chun, a tuolpûkhaia le a vêlin tukverhai an um a, tawng sâwmngaa sei, tawng sâwmhni pangaa lien a nih.

³⁴ A tuolpûkhai chun huon sûng tuollai puo lem tieng a ngha a, a kawtkhâr bienghaia chun, hi tieng le khing tienga khawm intûm thinghai an um a, chun a hang kaina chu sirbi pariet a nih.

³⁵ Chun, hmâr tieng dâi kawtkhâra chun a mi ṭhuoi a; ama chun hieng inkhina dân ang hin ân khi a;

³⁶ a vêngna pindanhai, a kawtkhâr bienghai, a tuolpûkhai chu; chun, chutaka chun a vêlin tukverhai a um a, a dung tieng chu tawng sâwmnga, a khang tieng chu tawng sâwmhni panga a nih.

³⁷ Chun, kawtkhâr bienghai chu huon sûng tuollai puo lem tienga chun a na, chun, chutaka kawtkhâr bienghaia chun, hi tieng sîra le khing tieng sîra khawm chun intûm thinghai an um a; a hang fe kaina chu sirbi pariet a nih:

³⁸ Chun, dâi kawtkhârhaia kawtkhâr bienghai sîra chun pindan le kawtkhârhai an um a; chutaka chun, pumrawhmang thilinhlânhai chu an sâwp hlak.

³⁹ Chun, dâi kawtkhâr tuolpûk lût- naa chun, hi tieng sîrah dawkân pahni, khing tieng sîrah dawkân pahni bawk, pumrawhmang thilinhlân dâm, suol thilinhlân dâm, bawsietna thilinhlân dâm thatna dingin a um a.

⁴⁰ Chun, hmârtieng dâi kawtkhâra lûtnaa hang fe a, sîr khat a puotienga chun, dawkân pahni a um a; chun, a sîr khata chun, dâi kawtkhâra tuolpûka ṭhangsaa chun dawkân pahni bawk a um a.

⁴¹ Hi tieng sîrah dawkân pali, khingtieng sirah dawkân pali bawk; dâi kawtkhâr sîra chun an um a; chuong dawkân pariethai chunga chun inthâwinahai chu an that hlak.

⁴² Chun, pumrawhmang thilinhlânna dingin lung a saka sak, tawng khat le a chenvea sei, tawng khat le a chenvea lien, tawng khata insâng dawkân pali an um a; chuong chunga chun inthawina le pumrawhmang thilinhlân ding an thatna ding hriemhreihai chu an sie a.

⁴³ Chun, in sûnga chun a vêlin kuoikimhai kutpha bawka lienhai chu inbûk an na; chun, dawkânhai chunga chun inthâwina sa chu a um a.

⁴⁴ Chun, dâi kawtkhâr sûngril lem puoa chun a mi ṭhuoi lût a; Ngai ta, pindan pahni huon sûng tuollai sûngril lema chun an um a; hmartieng kawtkhâr bula chu a nghat dân chu sim sawng a na, simtieng dâi kawtkhâr sîra pakhat chu a nghat dân hmâr sawng a nih.

⁴⁵ Chun, ka kuoma chun, “Hi pindan, a nghat dân sim sawng hi in enkawl sin kawltu thiempuhai ta ding a nih.

⁴⁶ Pindan a nghat dân hmar sawng hi thiempuhai, maichâmhai sin enkawlna kawltuhai ta ding chu a nih; chuonghai chu Zadok naupasalhai, chuonghai chu Levi naupasalhai laia ama rawng bâwl dinga Lalpa kuom hnaia hunghai chu an nih.

⁴⁷ Chun, huon sûng tuollai chu ân khi a, tawng zaa sei, tawng zaa lien, kil li inchen a nih; chun, maichâm chu in tuola chun a um a.

⁴⁸ Chun, in tuolpûka chun a mi ṭhuoi a, tuolpûk kawtkhâr bienghai chu ân khi a, hi tieng sîrah tawng nga, khing tieng sîrah tawng nga bawk; chun, kawtkhâr khingtieng chu hi tieng sîrah tawng thum, khing tieng sîrah tawng thum bawk a nih.

⁴⁹ Chun, tuolpûk seizie chu tawng sâwmhni a na, a lien tieng chu tawng sâwmpahni a nih; chun, an hang kainaa chun sirbi sâwm a um a; chun, kawtkhâr bieng sîrhaia chun sûtpuihai a um a, hi tieng sîrah pakhat, khing tieng sîrah pakhat bawk.