EZEKIEL 32 - Pathien Lekhabu Inthieng (BSI)

Pharao chunga sûnna hla

¹ Kum sâwmpahnina, thla sâwmpahnina, chu thlaa ni khat ni chun, Lalpa thu chu ka kuomah a hung tlung a,

² “Mihriem naupa, Aigupta lal Pharao ta dingin sûnna hla siem la, a kuoma chun hril rawh; Nang chu hnamhai lai chun sakeibaknei vânglaiah în ngai a, Amiruokchu, tuipuia rûlpui ang chu i nih; I vadungpuihaia chun i hung inper a, I kehaiin tuihai chu i hung chawkvir a, An vadungpuihai chu i hung suksiet ta a.

³ Lalpa Pathien chun hieng hin a ti a nih: Mipui tamtakhai le chun i chungah ka lên hung keiphar kan ta, Ka lêna chun hung fûn dawk kan ti che.

⁴ Chun, hnuoi chungah mâksan ka ti che a, Ram palailakah peihâwn ka ti che a; Chunglêng vatehai po po chu i chungah in umtir ka ta, Nangmaa chun hnuoi pumpuia ramsahai chu suktlai ka tih.

⁵ Tlânghaia chun i sa chu sieng ka ta, Phairuomhai chu i nge in suksip ka tih.

⁶ Chun, în hlieuna ram chu tlânghai chen rauin i thisenin buok ka ta, Tui luongnahai chu nangmaa suksipin um an tih.

⁷ Nang chu ka hung sukriral zo pha che chun, Vân chu inkhum ka ta, Arasihai chu inthimtir ka tih. Nisa chu sûmin inkhum ka ta, thla khawma a varna insuo naw nih.

⁸ Vâna thil var tlêhai po po chu i chunga chun sukthim ka ta, I ram chunga chun inthim inlêngtir ka tih Lalpa Pathien chun a tih.

⁹ “Rambung i hriet ngailohai laia, hnamhai laia i bohmangna kân tlungtir pha chun, hnam tamtakhai lungrilhai chu suklungsen ka tih.

¹⁰ Anih, hnam tamtakhai chu nangmaa chun mak intitir ka ta, nangma leiin an lalhai chu nasatakin ṭîng an tih, an hma ngeia ka kâwlhnâm kân let pha chun; inthin zing an ta, i tlûk ni chun mi tin chu mâni hringna ding sengin inthin an tih.

¹¹ Lalpa Pathien chun hieng hin a ti si a; Babulon lal kâwlhnâm chu i chungah hung tlung a ta.

¹² Mi thilthawthei tak kâwlhnâmhaia chun i mipuihai chu intlûktir ka tih; hnamhai ṭisimhai chu an ni vawng a; Aigupta chapona chu suksieng an ta, A mipuihai po po sukbohmang ni bawk an tih.

¹³ Tui tamtakhai kâwla ramsahai po po khawm chu sukbohmang ka ta, Mihriem ke chun anni chu sukbuoi ta ngai naw ni hai a, Ramsa ketinhai khawm chun anni chu sukbuoi ta naw bawk an tih.

¹⁴ “Chun, an tuihai chu hung sukvâr ka ta, An vadung tuihai chu hriek angin inluongtir ka tih, Lalpa Pathien chun a tih.

¹⁵ Aigupta ram chu suksiet le râusan le, Ram hausa, sukruoka umah ka siem a, Chutaka umhai chu an rênga ka hrem pha chun, Lalpa chu ka nih ti mi hre tâng an tih.

¹⁶ “Hi hi ṭap hla an isûnna ding chu a nih; chu chun hnam tin naunuhmeihai chun sûn an ta, Aigupta le a mipuihai po po ta dingin sûn an tih, Lalpa Pathien chun a tih,” tiin.

¹⁷ Kum sâwmpahnina, chu thla ni sâwm panga ni chun, Lalpa thu chu ka kuomah a hung tlung a,

¹⁸ “Mihriem naupa, Aigupta mipui ta ding chun ṭap inrûm la, vânsama lo fe thla tahai le chun, hnuoi khingtieng panga chun, hnam hming inthangtak tak naunuhmeihai le, ama leh pei thla rawh.

¹⁹ Mawinaa hin tu am i khêl a? Fe thla la, sertan lohai laia chun zâl rawh.

²⁰ Kâwlhnâma thata umhai laia chun tlu vêng an ta, kâwlhnâm kuoma chun pêk a ni ta a, ama le a mipuihai po po le chun hnûk hmang rawh.

²¹ Mi hrât khawkhêng laia mi hrât chun hremhmuna inthawk chun, ama ṭhangpuituhai le chun lo bieng an ta; an fe thla ta a, an zâl zing a; chuong sertanlo, kâwlhnâma thata lo um tahai chu.

²² Assuria chu a pâwlhai leh chutaka chun a um a; a thlânhai chu ama vêlahai po po chun a um a; an rêng chun kâwlhnâma lo tlu tah, thata lo um tah an nih;

²³ chuonghai thlânhai chu vânsam kilkhâwrtakahai chun siein a um a, an rêng chun kâwlhnâma lo tlu tah, thata lo um tah, mi hringhai rama ṭitumna lo inumtirtuhai chu an nih.

²⁴ Elam khawm chu a mipuihai po po leh a thlân sîrvêlahai chun an um a; an rêng chun kâwlhnâma lo tlu tah, thata lo um tahai, hnuoi khingtieng panga sertan lova lo fe thla ta a, mi hring rama chun an ṭitumna chu lo inumtir ta a, vânsama fe tahai le an inzakna chu lo phur tahai chu an nih.

²⁵ A pâwlhai po po leh thata lo um tahai laia chun a khum chu an lo daw ta a; an thlânhai chu ama sîrvêlahai chun a um a; an rêng el chun sertanlo, kâwlhnâma lo tlu tahai an nih; an ṭitumna chu mi hring rama chun inumtirin a lo um ta a, vânsama lo fe tahai le chun an inzakna chu an phur a; thata lo um tahai laia chun ama chu sie a lo ni ta a.

²⁶ Mesek le Tubal le an mipuihai po po leh an um a, an thlânhai chu a sîrvêlahai chun a um a, an rêng el chun sertanlo, kâwlhnâma lo tlu tah an na, mi hring rama chun an ṭitumna chu an lo inumtir ta a.

²⁷ Anni chu mi thilthawtheihai, sertanlova lo tlu taa, an indona hriemhreihai le hremhmuna lo fe thla taa, an luhai hnuoia an kâwlhnâmhai lo siea, an suolnahai chu an ruhaia umhai laia chun anni chu zâl ve naw ni hai a; mi hring rama chun mi hrâthai ṭisimhai chu an lo ni ta si a.

²⁸ Nisienlakhawm, nang chu sertanlohai laia chun suknawi nîng i ta, kâwlhnâma thata lo um tahai laia chun zâl vêng i tih.

²⁹ Edom chu a um a, a lalhai le a rorêltuhai po po chu an thilthawtheinain kâwlhnâma lo tlu tahai laia chun inzâltirin an um a; anni chu sertanlohai laia chun zâl an ta, vânsama lo fe tahai laia chun.

³⁰ Hmârtienga rorêltuhai an rêngin, Zidon mihai po po leh, thata umhai laia lo fe thla tahai chu an um a; an thilthawtheinaa ṭitumnahai an lo inumtirhai po poa chun an inzak a; kâwlhnâma thata lo um tahai le chun sertan lovin an zâl ta a, chun, vânsama lo fe tahai le chun an inzakna chu an phur a.

³¹ Pharao chun anni chu hmûng a ta, a mipuihai po po chunga chun ama chu thlamuong a tih; Pharao le a sipai pâwl kâwlhnâma thata lo um tahai po po ngei kha, Lalpa Pathien chun a tih.

³² Mi hring rama chun a ṭitumna chu ka sie ta si a; kâwlhnâma thata lo um tahai laia chun, sertan lohai kuoma chun inzâltirin um a tih; Pharao le a mipuihai po po ngei chu, Lalpa Pathien chun a tih,” tiin.