EZEKIEL 29 - Pathien Lekhabu Inthieng (BSI)

Aigupta siet ding thu hrillâwkna

¹ Kum sâwmna, thla sâwmna, chu thlaa ni sâwmpahni ni chun, Lalpa thu chu ka kuomah a hung tlung a,

² “Mihriem naupa, Aigupta lal Pharao tieng chun i hmai innghat la, Aigupta ram po po le, ama chunga chun thu hril la,

³ hieng hin ti rawh; Lalpa Pathien chun hieng hin a tih: ‘Ngai ta, Aigupta lal Pharao, Rûlpui a vadungpuihai laia bawk a, Ka vadungpui hi keia ta bîk a na, Keima ta dingin ka siem tah,’ titu, ka dodâl che a nih.

⁴ I khâka chun ngakuoihaiin inkuoitir ka ta, I vadungpuia ngahai chu i phuhlipa chun inkawptir tâwl ka tih; Chuongchun, i phuhlipa kawp i vadungpuia i ngahai po po le chun, I vadungpuia inthawk chun hung la suok ka ti che a.

⁵ Thlalêra chun peihâwna umin mâksan ka ti che, Nang le i vadungpuia ngahai po po le chun; Ram hmun âwng chunga chun tlâng i ta, Lâk khâwm ni ta naw ti ni a, phûm khawm ni ta naw ti nih. Hnuoia ramsahai le chunglêng vatehai ta dingin, Bu dingin ka pêk ta che a nih.

⁶ “Chun, Aigupta ram hluotuhai po po chun, Israel sûngkuo phairuong kuonghai an ni ve leiin, Lalpa chu ka nih ti mi hre tâng an tih.

⁷ I kuta an chel lai che chu în tleng dawk a, an liengkohai po po i sukthlêrpêk a; chun, an innghai pha che khawma, în tâwl hmang a, an kâwnghai chu inhnîng dingin i siem a.

⁸ Chuleiin, Lalpa Pathien chun hieng hin a tih: Ngai ta, i chungah kâwlhnâm hung inlet ka ta, nangmaa inthawkin sahai le mihriemhai chu sât thlâng ka tih.

⁹ Chun, Aigupta ram chu ram sie le râusan hung ni tâng a ta; ama chun, Vadungpui chu ka ta a na, keia siem a nih, a ti tâk lei khan, Lalpa chu ka nih ti mi hre tâng an tih.

¹⁰ Chuleiin, ngai ta, ka dodâl che a nih; i vadungpuihai khawm chu; Aigupta ram chu se letdêr le râusanah Suene in insânga inthawka Ethiopia ramri chenin ka siem ding a nih.

¹¹ Mihriem ke chun fethleng ta naw ni a, sa ke khawm chu fethleng ta bawk naw ni; chun, kum sâwmli sûng chu hluoin um bawk ta naw nih.

¹² Aigupta ram chu ram râusana umhai laia chun râusanah siem ka ta, a khawpuihai khawm chu suksieta um khawpuiahai kum sâwmli sûng chu râusanin um a tih; chun, Aigupta mihai chu hnamhai laia chun sukdar ka ta, rambunghaia chun anni chu sukdar ka tih.

¹³ Lalpa Pathien chun hieng hin a ti si a. Kum sâwmli tâwpa chun Aigupta mihai chu sukdara an umna hnamhai laia inthawk chu kei khâwm ka ta;

¹⁴ chun, Aigupta sal nina chu hung intlungtir nâwk ka ta, an piengna Pathros rama chun inkîrtir nâwk ka ta; chutaka chun lalram inhnuoi nîng an tih.

¹⁵ Lalrama chun ân hnuoi tak nîng a ta; hnamhai chunga chun ama le ama chu indawm sâng ngai ta naw ni a; hnamhai chunga ro an rêl nâwk ta nawna dingin anni chu suktlâwm ka tih.

¹⁶ Anni chu enkawl dinga an hung kîr pha, suolna chu hriet zing dinga siemin, Israel sûngkuoa chun ringumna hrim um ta naw ni a; chun, Lalpa Pathien chu ka ni ti mi hre tâng an tih, ” tiin.

¹⁷ Kum sâwmhni pasarina, thla hmasatakah, chu thlaa ni khat ni chun, Lalpa thu chu ka kuomah a hung tlung a,

¹⁸ “Mihriem naupa, Babulon lal Nebukadnezzar chun Tura dodâlin a sipai pâwlhai chu rawngbâwlna nasatakin sin ân thawtir a; lusîp tin chu a kawl a, liengko tin chu ân khawk bawk a; ama dodâla a sinthawnaah Turaa inthawkin, ama le a sipaihai khawm chun hlaw iengkhawm an hmu naw a;

¹⁹ chuleiin, Lalpa Pathien chun hieng hin a tih: Ngai ta, Aigupta ram chu Babulon lal Nebukadnezzar kuomah ka pêk ding a nih; a mipuihai chu ṭhuoi hmang a ta, a râllâk sumhai chu lâng a ta, a râlman chu lâng a ta; a sipaihai ta dinga hlaw ding nîng a tih.

²⁰ Keia ta dinga sin an lo thaw ta leiin, a sinthaw mana thungna ding chun Aigupta ram chu ka pêk tah a nih, Lalpa Pathien chun a tih.

²¹ “Chu nia chun Israel sûngkuoa chun ki hung inder suok dingin thâwng ka ta, anni laia chun bau kâkna chu pêng ka ti che a; chun, Lalpa ka nih ti mi hre tâng an tih,” tiin.