EZEKIEL 26 - Pathien Lekhabu Inthieng (BSI)

Tura siet ding thu hrillâwkna

¹ Kum sâwm pakhatna, chu thlaa ni khat ni chun Lalpa thu chu ka kuomah a hung tlung a,

² “Mihriem naupa, Tura chun Jerusalem chunga chun, E he, hnam tinhai dâi kawtkhâr chu a tliek a ni ta hi; tuhin keia kuom tieng a hung inher ta a, kei chu hluosip nâwkin um ka ta; tuhin ama chu suksiet a ni hi, a ti leiin,

³ Lalpa Pathien chun hieng hin a tih: Ngai ta, aw Tura, nang ka dodâl che a nih; tuipuiin a fâwnhai chu a hung insuoktir angin, hnam tamtakhai chu nangma do ding chein ka siem ding a nih.

⁴ Chun, anni chun Tura kul banghai chu suksieng an ta, a in insânghai chu sukchim an tih; kei khawma a pilvut chu amaa inthawkin zietthlâng ka ta, ama chu lungpui fil ruouah siem ka tih.

⁵ Tuipuia lênhai keimarna hmun hung nîng a ta, Lalpa Pathien chun, ka hril ta si a, a tih; chuongchun, hnamhai ta ding chun râllâk sum hung nîng a tih.

⁶ A naunuhmeihai rama umhai chu kâwl hnâma sukhlum nîng an ta, Lalpa chu ka nih ti mi hre tâng an tih.

⁷ Lalpa Pathien chun hieng hin a ti si a: Ngai ta, hmartienga inthawkin, lalhai lal Babulon lal Nebukadnezzar chu, sakawr tawlailîrhai leh, pâwl ruol le mi tamtak leh Tura chunga hin hung ṭhuoi ka ta.

⁸ Rama i naunuhmei umhai chu ama chun kâwlhnâmin that a ta; kul bâwl khum a ti che a; hnuoi dêngpâwng khum a ti che a, phaw chawihai inhuol khumtir a ti che.

⁹ I kul chu epin a kâpna khâwlhai chu rem a ta; i in insânghai chu a hreipuihaiin sukchim a tih.

¹⁰ A sakawrhai tam lei chun pilvut chun hung inkhum an ti che a; khawpuia lûtna siema uma, mihai an lût anga, i dâi kawtkhârhaia chun a hung lût pha chun sakawr tawlailîrhai, tawlailîrhai le sakawr chung chuong mihai ri chun i kul bang chu inhnîng a ta.

¹¹ A sakawrhai ketinhai chun i kawtthlêrhai po po hung chîl a ta; i mihai chu kâwlhnâmin that a ta, i hrâtna bulpui lungphunhai khawm chu hnuoi chungah tlûng an tih.

¹² I hausaknahai chu râllâk sumah siem an ta, i sumdâwngna thilhai khawm chu lâng an tih; i kulhai chu hung suksieng an ta, i in inhawitak takhai chu sukse bawk an ta, i lunghai, i thinghai i thil nawihai chenin tuihai laia chun sieng an tih.

¹³ Chun, i hlahai ri chu intâwptir ka ta: i ṭingṭang rihai khawm chu hriet ni ta naw nih.

¹⁴ Chuongchun, lungpui fil ruouah siem ka ti cheu a, lênhai keimarna hmun hung nîng i tih; chun, bâwl khawm ni nâwk ta naw ti ni; kei Lalpa hin ka lo hril ta si a, Lalpa Pathien chun a tih.

¹⁵ “Lalpa Pathien chun Tura kuomah hieng hin a tih; I sûnga chun thatna chu siem a ni pha, hliem chu an inrûm pha chun, i tlûkna ria chun thlierkârhai chu an inthin naw ding am a nih?

¹⁶ Tuipuia lalhai po po chu an lalṭhungphahaia inthawk chun ṭhung thlâng an ta, an lal puonhai chu sieng an ta, an silfên cheimawihai chu hlîp an ta, anni chu inthinnain inthuom tâng an tih; leihnuoi chungah ṭhung an ta, ieng lai khawmin inthin an ta, nangma chu mak tîng an ti che.

¹⁷ Chun, nangmaa chun sûnna hla phuok an ta, i kuoma chun, ‘Khawpui hmingthang, tuipuia chêng mihai ihluo, Ama le a hluotuhai khawm tuipuia hrât, A hluotuhai po po chunga an ṭiumna inumtir thei hiel chu, Iengtiziea suksieta um el am i ni ta leh!

¹⁸ I tlûkna nia chun thlierkârhai chu inthin ngei an tih, Anih, i fe hmang tâk lei chun tuipuia thlierkârhai chu beidawng an tih,’ tîng an tih.

¹⁹ “Lalpa Pathien chun hieng hin a ti si a: khawpui hluo lova umhai anga, khawpui râusana uma ka siem pha che chun; li inthûk chu i chunga chun ka hung lâka, tui nasatakhai chun ân khum pha che.

²⁰ Chun, tienlaia mihai vânsama ṭumhai kuoma chun ṭhuoi ka ti che a, vânsama lo fe thla tahai lai, tienlaia inthawka râusana um tah hmuna hai, leihnuoi hnuoi tieng panga chêng dingin siem ka ti che a; hluo ni ta ngai hrim hrim naw ti ni; chun, mi hring rama chun i ropuina chu sie bawk ta naw ning;

²¹ nang chu ṭiumah siem lem ka ti che a, um ta naw ti ni; zawngin um hlak la khawm, hmu hrim hrim ni ta naw ti nih, Lalpa Pathien chun a tih,” tiin.