EZEKIEL 23 - Pathien Lekhabu Inthieng (BSI)

Nuhmei, zuorpui pahnihai

¹ Lalpa thu chu ka kuomah a hung tlung nâwk a:

² “Mihriem naupa, Nuhmei pahni, nu pakhat naunuhmeihai chu an um a;

³ Aiguptaa chun nawchizawr sin an thaw a, an tleirâwla inthawkin nawchizawr sin chu an thaw a, an nênehai chu hmet a na, chuongchun, an nunghâk inthieng lai nêne chu hmet zêk a na.

⁴ An hminghai chu, a upa lem chu Ohola a na, a sangnu chu Oholiba a nih; ka ta an hung ni a, naupasalhai le naunuhmeihai an hung nei ta a. Chun, an hming thua chun Ohola chu Samaria a na, Oholiba chu Jerusalem chu a nih.

⁵ Chun, Ohola chun ka ta a ni sûng khawm chun nawchi a zawr a; a dit zâwnghai a tuolbâwm Assuria mihai ân saipuia,

⁶ a dum pâwla incheihai, ram awptuhai le rorêltuhai le tlangvâl ditumtak tak sakawr chung chuong mi sakawr chunga chuonghai chu.

⁷ An kuoma chun a nawchizawrna chu a pêk a, an rêng chun Assuria mi ditumtak takhai an na, chun, tukhawm ân saipui taphawthai chu, an milimhaia chun ama chu ân sukpawrche ve pei ta a.

⁸ Aiguptaa umna nihaia inthawk ta khan a nawchizawr chu a ma naw a, a tleirâwl lai an lo zâlpui a; a nunghâk inthieng nêne hmûrhai chu an lo sukhliem ta si a; chuongchun, an hurna chu a chunga chun an lo bunthlâk ta a.

⁹ Chuleichun, a hmangaihai kutah, ân saipui Assuria mihai kuta chun ka pêk suok ta a.

¹⁰ Chuonghai chun a saruokna chu an hlîmpêk a, a naupasalhai le a naunuhmeihai chu an lâkpêk a; ama le chun kâwlhnâmin an that a, ama chu nuhmeihai laia ṭawngnaa hmang a lo ni ta a, ama chunga chun rorêlna chu an lo sukthlûk ta si a.

¹¹ “Chun, a unaunu Oholiba khawm chun hi hi a hmu zing a, anachu, ama chu a mi insaipuinaa chun ama nêk hin nasatakin ân suksiet lemin, a nawchizawrnaa khawm chun a unaunu nawchizawrna nêkin a nasa lem a.

¹² Ama chun Assuria mihai, ram awptuhai, rorêltuhai, a tuolbâwmhai chu, ropuitaka incheihai, sakawr chung chuong mi sakawr chunga chuonghai, an rênga tlangvâl ditumtak takhai chu ân saipui a.

¹³ Chun, ama chu an sukpawrche ti ka hmu a, an pahni chun lampui thuhmun an hraw leiin.

¹⁴ Chun, a nawchizawrna chu a sukzuol pei a, bang chunga chun mihriemhai lim zieka umhai chu a hmu si a; Kaldaihai lim sen mawia incheia ziek,

¹⁵ an kâwnghaia kâwngkhitnaa inkhit an luhaia lukâwm sukdum kâwma, hang en khawma lalhai ang, an piengna rama Kaldaia Babulon mi nina nei chie ruok an nih.

¹⁶ Chun, a hmu phingle chun ama chun ân saipui a; Kaldaia chun an kuomah mitirhai a tir a.

¹⁷ Chun, Babulon mi chu a kuoma inditna khuma chun a hung a, an nawchizawrna chun ama chu an sukpawrche a, anni le chun a lo pawrche ta a, a lungril chun anni chu a ngei ta hle a.

¹⁸ Chuongchun, a nawchizawrna chu langchangtaka a thaw a, a saruokna a hlîm chun, ka lungril chu amaa inthawk chun ân her a, a unaunua inthawka ka lungril a lo inher ta ang bawk khan.

¹⁹ Nisienlakhawm, Aigupta rama nawchizawr thil a thaw lai, a tleirâwl lai nihai chu hre zingin, a hurnahai chu a la belsa ta rawp a.

²⁰ An tisa khawm sabengtunghai tisa ang, an thilsuok khawm sakawrhai thilsuok ang, an mi lepchiehai chu ân saipui a.

²¹ Chuongchun, Aigupta rama i tleirâwl lai nênehai an hmeta, a hmûrhai an hmet zêk lai a, i tleirâwllai hurna chu i ngai a.

²² “Chuleiin, Oholiba, Lalpa Pathien chun hieng hin a tih; Ngai ta, i dit zâwnghai chu i chungah hung inṭuongtir ka ta; i lungrilin a hransanhai chu, sîr tina chun i chungah inhungtir ka tih;

²³ Babulon mihai, Kaldai mihai po po le, Pekod mihai, Soa mihai, Hoa mihai, anni le Assuria mihai po po leh; tlangvâl ditumtak takhai, ram awptuhai, rorêltuhai, an rêngin lal nauhai, mi hming inthanghai, an rêngin sakawr chunga chuong mihai chu.

²⁴ Chun, nanga chunga chun hriemhreihai, sakawr tawlailîrhai, tawlailîrhai, mipui inkhâwm nasatak leh hung do an ti che a; a vêlin, thîr lukhumhai, âwmphawhai le phawhai le an hung ep ding che a nih; chun, an kuoma chun rorêlna dân ang peiin i chungah rorêlpêk an ti che.

²⁵ I chunga chun ka îtthîkna chu sieng ka ta, i chunga chun lunginsen pumin thâwng an tih; i hnâr le i nâhai chu la hmang an ta; i la mahlahai chu kâwlhnâmah tlûng an tih; i naupasalhai, i naunuhmeihai chu lâng an ta, i la mahlahai chu meiin kâng hmang vawng a tih.

²⁶ Chun, nang khawm i silfênhai chu hlîppêk an ti che a, în cheina man tamhai chu la hmang an tih.

²⁷ Chuongchun, Aigupta rama i nawchizawrna hung lâk le, i hurna chu nangmaa inthawka bo ta dingin siem ka ta; chuongchun, anni chu i mithai chun mel ta ngai naw ni a, Aigupta chu hre zing ta bawk naw ti nih.

²⁸ Hieng hin Lalpa Pathien chun a ti si a: Ngai ta, i theidahai kuta le, i lungrilin a hransanhai kuta chun ka pêk suok ding che a nih;

²⁹ theida hlêng an ti che a, i sinthaw inrimna po po chu la hmang vawng an ta, saruok le silfên boin mâksan an ti che; chun, i hurna saruokna chu hlîm nîng a ta, i hurna le i nawchizawrna chu.

³⁰ Hieng thilhai hi i chungah thawin a um ding a nih; khawhri be mihai hnung chu châkin i lo hnawt ta a, an milimhai chun i lo insukpawrche ta si leiin.

³¹ I unaunu lampuia chun i lo fe ta a; chuleiin, ama no chu i kutah ka pêk ding a nih.

³² “Lalpa Pathien chun hieng hin a tih: I unaunu no tung lientak chu i dâwn ding a nih, Hmusita nuisanin um i ta, hrilinsîm ni bawk i tih, A keng râwn hle si a;

³³ Lungngaina le inruinain sip tâng i ta, Râusanna le maktina no, i zuorpuinu Samaria no le chun Dâwn khawm dâwn ngei i ta, thlâksuok i ta,

³⁴ Chutaka a nâwihai chu, sawi i ta, I nênehai chu sukhliem i tih; Ka lo hril ta si a, Lalpa Pathien chun a tih.

³⁵ “Chuleiin, Lalpa Pathien chun hieng hin a tih: Kei i mi lo theinghil ta a, i hnungah i mi pei ta a, chuleiin, i hurna le i nawchizawrnahai chu nangin phur rawh,” tiin.

³⁶ Chu nawa khawm chun Lalpa chun ka kuomah a hril a, “Mihriem naupa, Ohola le Oholiba chungthu hi i rêl ding am? an tirdakumnahai chu anni hril la.

³⁷ An lo uire ta si a, an kuthaia chun thisen a kai a; an milimhai chun uiretna thil chu an lo thaw ta a; chun, an naupasalhai an mi neipêkhai khawm chu, an kuomah fâk zoa um dingin meia chun an infethlengtir a.

³⁸ Chu naw khawm chu hi hi ka chungah an thaw bawk a; a ni pângngaia ma chun ka hmun inthieng chu an sukpawrche a, ka châwlnihai khawm chu an lo bawsiet ta a.

³⁹ An milimhai kuoma an nauhai an that laiin, chu nia ma chun ka hmun inthieng chu sukpawrche dingin an hung si a; chun, ngai ta, ka in sûnga chun chuong ang chun an thaw a nih.

⁴⁰ Chu nawa chun, hlataka inthawka hung ding mihai ta ding chun mi i tir a, an kuoma chun mitir chu tir a na; chun, ngai ta, an hung ta a; chuong ta ding chun în sâwp a, i mithai i nâl a, incheinahaiin în chei a;

⁴¹ lal khum a hmaa dawkân buotsaia um chunga chun i ṭhung a, chu chunga chun ka riminhnikhai le ka hriek chu i sie kha.

⁴² Chun, mipui râwl inhawitihai chu a kuoma chun a um a; chun, mi chi narânhai le chun thlalêra inthawkin zu inrui mihai chu hung ṭhuoi an na. An kuthaia chun bânbunhai chu a thuoin an inbuntir a, an luhai chunga chun lallukhum mawitakhai le chun.

⁴³ Chun, kei chun uirea a upa lemnu kuoma chun, ‘Tuhin anni chun ama le uiretna thil chu an thawin, ama khawma anni le a thaw ding am aw?’ ka ti a.

⁴⁴ Nuhmei nawchizawr hlak kuoma an lût hlak angin, anni chu ama kuoma chun an lût ta a; chuongchun, nuhmei hur, Ohola le Oholiba kuoma chun an lût ta a.

⁴⁵ Mi felhai chun, anni chu uirenu chunga rorêl ang le, nuhmei thisen insuotu chunga rorêl angin rorêlpêk an tih; uirenuhai an na, an kutahai chun thisen a kai bawk si leiin.

⁴⁶ Lalpa Pathien chun hieng hin a ti si a; An chungah mipui inkhâwm hung ṭhuoi ka ta, anni chu a suk a tunga vawrlênga suksiet dingin an kuomah pêng ka tih.

⁴⁷ Chun, mipui inkhâwmhai chun anni chu lungin dêng an ta; an kâwlhnâmhai chun that an ta; an naupasalhai le an naunuhmeihai chu that an ta, an inhai chu meiin raw hâwp an tih.

⁴⁸ Chuongchun, hurna chu chu rama inthawka bo dingin siem ka ta, nuhmeihai po po chu in hurna ang thaw lo dinga inchûktir an ni theina dingin.

⁴⁹ Chun, in hurna chu in chungah thung an ti cheu a, in milimhai suolna chu phur in ta, chun, Lalpa Pathien chu ka nih ti mi hre tâng in tih,” tiin.