EZEKIEL 22 - Pathien Lekhabu Inthieng (BSI)

Jerusalem suolnahai

¹ Chu nawa khawm chun Lalpa thu chu ka kuomah a hung tlung a;

² “Nang mihriem naupa, khawpui thisen insuo hmang chungthu hi i rêl ding am a nih, i rêl ding am a nih? A tirdakumnahai po po chu inhriettir vawng rawh.

³ Chun, hieng hin tîng i ta, Lalpa Pathien chun hieng hin a tih; Khawpui a sûnga a hun a hung tlung theina dinga thisen insuotu le, ama insukpawrchena dinga milimhai siemtu chu!

⁴ I thisen i lo insuotahaia chun thiemlo chang i lo ni ta a; milim i lo siemahai chun nang chu i lo insukpawrche ta bawk a; i nihai chu hung hnai dingin i siem a, i kumbi ruothaia chun i hung tlung ṭêp ta bawk a, chuleiin, hnamhai laia chun hrilinsîmah ka siem che a nih, rambunghai po poa nuizabûr dinga leh.

⁵ Chuong nanga hnaia umhai le nanga hlata umhai chun, nang buoinaa sip le, hmingse ta chu nuisan an ti che a.

⁶ Ngai ta, Israel lalhai mi tin chu a thilthawtheina ang peia, thisen insuo dingin i sûnga chun a um a nih.

⁷ I sûnga chun nu le pa chu hmusitin an um a; i sûnga chun mikhuolhai chu nêksâwrin an sawisa a; i sûnga chun pa neilohai le hmeithai chu an sukkhawhlo ta a.

⁸ Nang chun ka thil inthienghai chu i hmusit a; ka châwlnihai khawm chu i lo bawsiet ta a.

⁹ I sûnga chun thisen insuo dingin mi bautamhai an um a; i sûnga chun tlâng sâng chungahai chun an fâk bawk a; i sûnga chun hurna thil khawhlo khawm chu an lo thaw ta a.

¹⁰ I sûnga chun an thlatuhai saruokna chu an hlîmpêk a; i sûnga chun nuhmei inthieng naw lai zâlpui an um a,

¹¹ Mi pakhat chun a tuolbâwm nuhmei chunga chun thil tirdakum chu a thaw a; mi dang chun hurtakin a monu chu a sukpawrche bawk a; mi dang chun i sûngah a pa naunu, a farnu chu ân tlâwm bawk a.

¹² I sûnga chun thisen insuo dingin thamnahai an lâk a; a pung hnawtna le a pung chu i lâk a; nêksâwrnain i tuolbâwmhai chunga chun duâmtakin i lo hlêp ta a; kei i mi lo theinghil tah a nih, Lalpa Pathien chun a tih.

¹³ Chuleiin, ngai ta, i hlêpna ringum lo, i lo thaw tah le, i sûnga i thisen i lo insuo tâk chunga chun ka kuthai ka ben el a nih.

¹⁴ Nangma chu ka sawisak nihaia che chun i kuthai chu a hrât tâwkin, i lungril chun a tuor zo ding am a nih? Kei Lalpa hin ka hril ta a, thaw ngei bawk ka tih.

¹⁵ Hnamhai laia chun sukdar ka ti che a, rambunghaia chun sukdar bawk ka ti che; i tirdakumna chu nangmaa inthawk chun sukbohmang tâng ka tih,

¹⁶ Chun, hnamhai mithmua chun nangma le nangma ngei chu insukhmingsieng i ta; chun, Lalpa chu ka nih ti mi hre tâng i tih,” tiin.

¹⁷ Lalpa thu chu ka kuomah a hung tlung a;

¹⁸ “Mihriem naupa, Israel sûngkuo hi ka ta dingin êksie an ni tah; pûm meia chun an rêng chun darsen dâm, rângva dâm, thîr dâm, suon dâm an na; tangkaraw êksie chu an nih.

¹⁹ Chuleiin, Lalpa Pathien chun hieng hin a tih; Êksie chu in hung ni tâk leiin ngai ta u, Jerusalem sûnga hin kei khâwm ka ti cheu.

²⁰ Tangkaruo dâm, dârsen dâm, thîr dâm, rângva dâm, suon dâm pûmmeia an mût dinga suktui dinga an lâk khâwm angin, ka lunginsenna le ka ṭiumnain la khâwm ka ti cheu a, chutaka chun sieng ka ti cheu a, suktui ka ti cheu.

²¹ Anih, la khâwm ka ti cheu a, ka lunginsenna meiin râwng ka ti cheu; chuongchun, chutaka chun intui in tih.

²² Tangkaruo chu pûmmeia ân tui angin chuong ang chun chutaka chun intui in tih, chuongchun, kei Lalpa hin in chungah ka lunginsenna chu ka hung bunthlâk a nih ti hre tâng in tih,” tiin.

²³ Chun, Lalpa thu chu ka kuomah a hung tlung a:

²⁴ “Mihriem naupa, amanu kuoma chun hril la; Ram thienglo le, lunginsenna nia a chunga ruo tlâk nawna ang chu i nih, ti rawh.

²⁵ Sakeibaknei inrûmin a sa fâk ding ân rûm khum angin, a sûnga chun a zâwlneihai chu phierrûkna a um a; mi tin hringin an fâk zo a, thil hluhai le thil rohai chu an lâk a, a sûnga chun hmeithai tamtak an siem a.

²⁶ A thiempuhai chun ka dâna chun thawluina an hmang a; ka thil inthienghai chu an sukpawrche a; thil pângngai le thil inthieng khawm chu an ṭhe hran naw a, chuongchun, mihai khawm chu thil inthieng le thienglo chu hre hran dingin an siem naw a; ka châwlnia inthawkin an mithai an hup a; anni laia chun sukhmingsiet ka ni tah a nih.

²⁷ A sûnga a lalhai chu satene an sa fâk ding innghir khumhai ang chu an na; thisen insuoa, mi hring sukbohmanga hlâwkna indik lo an hmuna dingin.

²⁸ Chun, a zâwlneihai chun an kuoma aisân inkhêlhai le, teplohai chu hmuin anni ta ding chun chirhak sukhnâk lo chun an chârkhum a; Lalpain thu a hril naw sa khawma, Lalpa Pathien chun hieng hin a tih, an ti a.

²⁹ Chu ram mipuihai chun nêksâwrna an hmang a, inrûk an chîng bawk a; anih, tlasamhai le mi rimsihai chu an suklungngai a; mikhuol chu indik lotakin an nêksâwr a.

³⁰ Anni lai chun mi, ram chu ka suksiet nawna dinga dâi chu siem ṭha ding le, ram ta dinga, ân âwngnaa ka hmaa ngîr ding ka zawng a, nisienlakhawm, tukhawm ka hmu naw a,

³¹ Chuleiin, ka lunginsenna chu an chunga chun ka bunthlâk a, ka lunginsenna mei chun anni chu ka kâng hmang ta a; an lampuihai chu anni lu chunga ngei chun ka hung intlungtir ta a, Lalpa Pathien chun a tih,” tiin.