EZEKIEL 21 - Pathien Lekhabu Inthieng (BSI)

Lalpa kâwlhnâm tâtngei chu

¹ Chun, Lalpa thu chu ka kuomah a hung tlung a,

² “Mihriem naupa, i hmai chu Jerusalem tieng innghat la, i thu chu hmun inthieng tieng inthla la, Israel ram chunga chun thu hril rawh;

³ chun, Israel ram kuoma chun hieng hin hril la, Lalpa chun hieng hin a tih: Ngai ta, nang hi ka dodâl che a, a bâwma inthawk chun ka kâwlhnâm chu phawi dawk ka ta, nangmaa inthawka mi fel le mi rilohai khawm chu sât thlâng ka tih.

⁴ Nangmaa inthawka mi fel le mi rilohai chu ka sât thlâk ding a nih ti hmuin, simtienga inthawka hmârtieng chenin, ka kâwlhnâm chu tisa po po chu doin a bâwma inthawk chun phawi suok nîng a ta;

⁵ chun, tisa tin chun kei Lalpa ngeiin ka kâwlhnâm chu a bâwma inthawkin ka phawi a nih ti hrieng an ta; thun nâwk ni ta ngai naw nih.

⁶ Chuleiin, inthuok huoi la, nang mihriem naupa, i kâwng chu namin rinumtitakin an mithmua chun inrûm rawh.

⁷ Chun, i kuomah, ‘Ieng am i thuokindawng pui leh?’ an ti pha chun, ‘Chanchinhai leiin, a hung tlung mêk si a,’ tîng i ta; chun, lungril tin chu intui a ta, kut po pohai chu hung châu an ta, thlarau tin chu hung châuhâwp an ta, khûphai po po khawm chu tui angin hung zawi an tih; ngai ta, a hung mêk a, thaw khawm a ni ngei ding a nih, Lalpa Pathien chun a tih, tîng i tih,” a ta.

⁸ Chun, Lalpa thu chu ka kuomah a hung tlung a,

⁹ “Mihriem naupa, thu hril la, Lalpa chun hieng hin a tih ti rawh: Kâwlhnâm, kâwlhnâm tâtngeiin a um a, Nâwttlêt a ni bawk a.

¹⁰ A that a that theina dinga tâtngei a na, Kâwlinlep ang a ni theina dingin nâwttlêt a ni bawk a! Hlimna ei la siem rawp ding am a nih? Ka naupa hmawl chun thing tinhai chu a hung hmusit a.

¹¹ Chun, hmang a ni theina dingin nâwttlêt dinga pêk a na; Kâwlhnâm chu, tâtngei a na, Anih, thattu kuta pêk dingin nâwttlêtin a um a nih.

¹² Mihriem naupa, khêk la, inrûm rawh; ka mihai chunga tlung a na, Israel lalhai po po chungah a tlung si a; anni chu ka mihai leh kâwlhnâm kuoma chun pêkin an um a; Chuleiin, i êlpui chu ben rawh.

¹³ Fiena a um si a; iengtin am ni tâng a ta, Hmawl a hmusittu khawm a um ta naw ding si chun? Lalpa Pathien chun a tih,

¹⁴ “Chuleiin, nang mihriem naupa, thu hril la, i kuthai chu ben la, a ṭum thumnaa chun kawlhnâm chu nawn ni sienla, thina khawp hliemna kâwlhnâm chu; thi khawp raua hliem mi pakhat ropuitak kâwlhnâm a nih; an pindanhaia lût chu.

¹⁵ An dâi kawtkhârhai po poah chun kâwlhnâm inzum chu kân nghat a, an lungrilhai chu a hung intui a, mi tamtak an tlûk theina dingin. E, kâwlinlep anga siem a ni chu aw! dettaka chel a ni ta a.

¹⁶ Inkeikhâwm la, changtieng fe la, vân tlar la, vawi tieng fe la, chu tieng chun i hmai chu innghat la.

¹⁷ Kei khawma ka kuthai ben tuong ka ta, lunginsenna chu sukdei ka tih; kei Lalpa chun ka ti ta a nih, ti rawh,” a ta.

¹⁸ Lalpa thu chu ka kuomah a hung tlung nâwk a,

¹⁹ “Nang mihriem naupa, Babulon lal kâwlhnâm chu a hung theina dingin lampui pahni ruot bawk rawh; An pahni chun ram pakhata inthawkin hung suok an ta; hmun pakhat inchik an ta, khawpui lûtna lam tluongpui laia chun inchik an tih.

²⁰ Ammon thlahai Rabba kuoma le inhumhimna Juda rama Jerusalema kâwlhnâm hungna dingin lampui ruot la;

²¹ Babulon lal chu lampui inṭhena lai, lampui pahnihai inchinna taka chun, dawi hmang dingin a ngîr zing si a; hnungtieng hmatieng thalhai chu a hêm vêl a, milimhai chu a râwn a, sathin chu a en bawk a.

²² A changtieng kuta chun Jerusalem ta dinga, kâphmunhai siemna ding le, thattuhai ta ding bau kâk ding le, khêka râwl insuo ding le, dâi kawtkhârhai epa kâphmunhai siem ding le, hnuoi dêng pâwnghai siem a, kulhai bâwl ding thu aisânna chu a um a.

²³ An kuoma ṭawngsiehaia lo inkhâm ta khawm chu an mithmu chun an ta dingin aisânna teplo nîng a tih; amiruokchu, chu chun suolna chu hriet zing dingah a hung lâk a, anni chu lâk an ni theina dingin.

²⁴ Chuleiin, Lalpa Pathien chun hieng ang hin a tih: in bâwsietnahai chu hmusuokin a um a, insuolnahai chu hriet zing dingin in siem ta leiin, thil in thaw taphawthaia chun in suolnahai chu hung inlang vêng an tih, hriet zingna dinga chun i hung um ta leiin, kuta lâk nîng i tih.

²⁵ Chun, nang aw thi khawp raua hliem mi rilo, Israel lal, ama ni chu a hung tlung mêk a, a tâwpnaa hremna huna hin;

²⁶ Lalpa Pathien chun hieng hin a tih: Lallukhum chu sawn la, lallukhum chu la hmang rawh; hi hi a pângngai zing ni ta naw ni; ân hnuoi chu chawisâng la, ân sâng chu sukhnuoi rawh.

²⁷ Inletling ka ta, letling ka ta, letling ka ta, hi khawm hi um ta naw ni a, a thuneitu a hung hmakhat chun; chun, ama kuoma chun pêng ka tih.

Ammon mihai chunga rorêlna

²⁸ “Chun, nang mihriem naupa, thu hril la, Ammon thlahai le anni vaulâwkna, chungthua chun Lalpa Pathien chun hieng hin a tih, ti rawh: Kâwlhnâm, kâwlhnâm chu thatna dingin phawi a ni a, kâwlinlep ang ela tle zawr zawr dinga nâwt tlêt a nih.

²⁹ an hremna nuhnungtak ding hun, mi rilo tâwpkhâwkhai ringa innghat ding ni tlung mêk zing laiin thilhmulâwk teplo hmupêk chein aisânna khêlhlip an hrilpêk che a nih.

³⁰ A bâwma chun thun kîr nâwk el rawh. Siema i umna hmunah, i piengna ram ngeia chun i chungah ro rêl ka tih.

³¹ I chunga chun ka lunginsenna chu hung bunthlâng ka ta, ka lunginsenna mei chu i chunga chun hung mût ka tih; chun, mi hrânghai, that dân thiemtakhai kuta chun pesuok ka ti che.

³² Nang chu meia thingthu ding chau ni tâng i ta; i thisen chu rama chun um a ta; nang chu hriet zing ni ta bawk naw ti ni, kei Lalpa hin ka hril ta si a,” tiin.