EZEKIEL 17 - Pathien Lekhabu Inthieng (BSI)

Mupui le Grêp tekhina

¹ Lalpa thu chu ka kuomah a hung tlung a,

² “Mihriem naupa, thukhirkhân sie suok la, Israel sûngkuohai kuoma chun tekhithu hril rawh;

³ Lalpa Pathien chun hieng hin a ti a, Mupui ropuitak, thla ropuitak le chang seitakhai nei, hmula sip, ze hran hran nei chu Lebanona chun a hung a, sidar thing zîka chun a hung a;

⁴ a zîk insâng tak chu a chuk tan a, Kanaan rama chun a put hmang ta a; sumdâwng mihai khawpuia chun ân thlâk ta a.

⁵ Chun, chu ram thlai chi chu a lâk bawk a, leihnuoi ṭhataka chun a phun ta a; tui tamtak kâwla chun a sie a; phahrâm thing angin a sie a.

⁶ Chun, a hung inṭhang chun, grêphrui inhnuoitaka inzâm mi a hung na, a kâuhai chu ama tieng chun ân zâm lêt a, a zunghai chu ama hnuoia chun an um a; chuongchun, grêphrui a hung na, kâuhai a hung nei a; dâwnhai a hung insuo ta a.

⁷ Chun, mupui dang ropuitak thla ropuitakhai le hmul tamtak nei a um bawk a; chun, ngai ta, grêphrui chun a zunghai chu ama tieng chun ân kawmtir a, a kâuhai khawm chu ama tienga bawk chun ân dâwn suoktir a, tui a buok zing theina dingin. A phunna hmuna inthawk chun,

⁸ tui tamtakhai sîrah hnuoi ṭhatna hmuna chun phunsawn a ni ta a, kâuhai a hung insuo a, ra a hung nei a, grêphrui ṭhatak a hung ni theina dingin.

⁹ Hril rawh, Lalpa Pathien chun hieng hin a ti a nih; a puitling ding am a nih? A hna inder tharhai po po chu a vuoi theina dingin a zunghai chu a phâwi dawkin, a rahai chu a sât thlâk naw ding am a nih? A zunghaia phâwi dawktu ding mi tam rak le thilthawtheina nasatak khawm ngai chuong naw nih.

¹⁰ Anih, ngai ta, phunin um de sienkhawm a puitling ding am a nih? Sak thliin a hung mût pha chun, a vuoi vawng el naw ding am a nih? A ṭona hmuna inthawk ngei chun vuoi a tih,” tiin.

¹¹ Chu nawa khawm chun Lalpa thu chu ka kuomah a hung tlung a;

¹² “Sûngkaw hel hmanghai kuoma chun thu hril la, ‘Hieng thilhai hi ieng tina am a na ti in hriet naw maw?’ tiin, hril rawh, ngai ta, Babulon lal chu Jerusalema chun a hung a, chutaka lal le, chutaka lal nauhai chu a ṭhuoi a, ama kuomah Babulona chun a fepui ta a;

¹³ chun, lal chi khawm chu a ṭhuoi a, ama le chun thuthlung a siem ta a, chun, ama khawm chun inkhâmna hnuoiah a hung ṭhuoi a, rama mi thilthawtheihai chu a lâk hmang a;

¹⁴ lalram chu a hung inhnuoi a, ama khâta ân dawm kâng thei nawna dingin, chu a thuthlung chu a zâwm lei chaua a ngîr theina dingin.

¹⁵ Amiruokchu, mi tamtak le sakawrhai an pêk theina dingin, ama aiawtu chu Aigupta rama tirin, ama chunga chun a hel ta a. A hlawtling ding am a nih? Chuong ang thilthawtu chun a pumpel ding am a nih? Thuthlung chu bawse siin a pumpel ding am a nih?

¹⁶ Ka hring zing angin, Lalpa Pathien chun a tih; ama chu lala siemtu, a inkhâmna a hmusit le, a thuthlung a bawsietpêk lal umna hmun, ama kuomah Babulon sûng ngeia chun thîng a tih.

¹⁷ Mi tamtak chu sât thla dinga kulhai bâwla, tlângpâwnghai siema an um pha chun, Pharao le a sipai pâwl thilthawtheitakhai le, a pâwl ropuitakhai chun indonaa dingin iengkhawm thawpêk naw ni hai.

¹⁸ Thuthlung chu bawsein, inkhâmna chu a lo pêk ta a, amiruokchu, hieng thilhai po po hi a la thaw ta rawp si a; pumpel naw hrim hrim a tih.

¹⁹ Chuleiin, Lalpa Pathien chun hieng ang hin a tih; Ka hring zing angin ka inkhâmna a hmusit le, ka thuthlung a bawsiet ta chu ama lu chunga ngei chun hung intlungtir ngei ngei ka tih.

²⁰ Chun, a chunga chun ka lên chu keiphar ka ta, ka chânga chun ama chu âwk a ta, ama chu Babulonah hung ṭhuoi ka ta, chutaka chun a bawsietna, ka chunga a lo bawsietna chu a kuomah phût ka tih.

²¹ Chun, a pâwlhai po po laia a tlân hmanghai po po chu kâwlhnâmah tlûng an ta, chun, a la um zinghai khawm chu kil tinah sukdar ni bawk an tih; chun, kei Lalpa hin ka lo hril ta a nih ti hre tâng i tih.

²² “Lalpa Pathien chun hieng hin a tih; sidar lêr zîk insâng chu lâng ka ta, phun ka tih; a lêr zîktaka inthawk chun a kâu dâwng chu ektliek ka ta, tlâng insângtak le langsârtak chungah phun ka tih;

²³ Israel insângna tlânga chun phun ka ta; kâuhai hung insuong a ta, ra hung nei a ta, sidar thing ṭhatak hung nîng a ta; a hnuoia chun vate tinrênghai chu chêng an ta; chutaka a kâuhai hlima chun chêng an tih.

²⁴ Chun, chu lova thing po pohai chun kei Lalpa chun thing insâng chu ka keihnuoi a, thing inhnuoi chu ka suksâng tah, thing hring chu ka sukṭâwl a, thing ṭâwl chu ka sukhring tah ti hrieng an tih; kei Lalpa chun ka hrilin ka thaw ta a nih,” tiin.