Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

EZEKIEL 16 - Pathien Lekhabu Inthieng (BSI)


Jerusalem ringum nawna

1 Lalpa thu chu ka kuomah a hung tlung nâwk a,

2 “Mihriem naupa, Jerusalem chu a tirdakumna chu hre dingin siem la,

3 Lalpa Pathien chun Jerusalem kuomah hieng ang hin a tih, ti rawh; ‘I piengna le i hnam ram chu Kanaan mihai ram a na; Amor mi chu i pa a na; Hit mi chu i nu a nih.

4 I pieng dâna chun, i pieng ni chun i laihrui chu ât a ni naw a, nang chu sukfai ding chein tuia sâwp khawm i ni bawk naw a; chia saw hrim khawm i ni naw a, dawm khawm i ni bawk naw a.

5 I chunga lunginsietna nei dingin le, hieng thilhai hi thawpêk ding chein, tu mit khawma a lunginsiet naw che a; amiruokchu, khawhnâwmah hnawt suok i ni ta lem a; chuong ang chun i pieng ni chun i mi nina chu tenin a lo um ta a.

6 Chun, i sîra ka khêl lai a, i thisena insukpawrche vawnga ka hmu chein, i kuoma chun, “I thisena khânga um kha ni la khawm, dam rawh,” ka ti a.

7 Ramhnuoi hnader anga pung dingin ka siem che a, i hung pung ngei a, i hung ropui a, incheina ṭha bîktak ang chu i hung ni ta a; i nênehai a hung in siem a, i sam dâm khawm a hung ṭo a, amiruokchu, saruok le ruok i la ni tlat el a.

8 Chun, i sîr ka hung khêl a, ka hung en che chun, ngai ta, i hun chu hmangaina hun a ni ta a; ka puon chu i chunga chun ka keiphar a, i saruokna chu kân khum ta a; anih, i kuoma chun kân khâm a, nangma le chun thuthlung ka lo siem ta a, Lalpa Pathien chun a tih; chun, ka ta i hung ni ta a.

9 Chun, tuiin kân sil che a; anih, i thisen chu nangmaa inthawk chun ka sâwpfai vawng a, hriek ka nâl che a.

10 Puon cheimawiin kân thuom che a, seal vun kekawk kân buntir che a, puonzai inhmiin ka hrên che a, tuktulungêk puonin ka tuom che kha.

11 Incheina thuomhaiin ka chei che a, i kuta chun bânbunhai kân buntir che a, i rîngah khaidiet leh.

12 Chun, i hnârah hnârbê le, i nahaia chun nabêhai le, i lu chungah lukhum mawitak ka sie a.

13 Chuongchun, rângkachak le tangkaruoa cheiin i um a; i silfênhai khawm, puonzai inhmi dâm, tuktulungêk puon dâm le puon cheimawi dâm an nih; beiphit indîtak le khuoizu le hriek chu i fâk a; i hung hmêlṭha êm êm el a; chun, lalnu khawm chu i hung tling pei ta a.

14 I mawina leiin i hming chu hnamhai laia chun ân darsuok a; kân lalna leia i chunga ka lo sie ta chu, ṭhat famkimna a ni si a.’ Lalpa Pathien chun a tih.

15 “Nisienlakhawm, i hmêl ṭhatna chu i ring a, i hming inthangna lei chun nawchizawrah i um ta a; nangma hung khêltu taphawthai chunga chun i châkna chu i phal a; ama ta a ni ta a.

16 I silfênhai chu i lâk a, i bâwlhmunhai chu ze dang dangin i chei a; a chunga chun nawchizawrna thil chu i thaw ta a; chuong ang thil chu um nâwk ta ngai naw ni a, chuong ang chu a la ni ngai bawk nawh.

17 Ka rângkachak le ka tangka în cheina hluhai ka pêkhai che chu i lâk a, mihriemhai limhaia chun i siem a, anni le chun nawchizawrna thil chu i thaw ta a;

18 i puon cheimawihai chu i lâk a, anni chu în khum a; an hmaa chun ka sahriekhai le riminhnikhai chu în tung a;

19 ka bei ka ipêk che, beiphit indîtak, hriek le khuoizu leh, ka châwmna che chu, an hmaa chun riminhnika dingin i sie ve bawk a, chuong chu a nih, Lalpa Pathien chun a tih.

20 Chu nawa khawm chun, naunuhmeihai le naupasalhai i mi neipêkhai chu i lâk a, an kuomahai chun fâkzoa um dingin inthâwinain i hmang a.

21 I nawchizawrna chu thil chîn tham a ni ding maw? Ka nauhai i that a, meia infethlengtir dinga an kuoma i pêk hi!

22 I nawchizawrna le i tirdakumnahai poa hin i tleirâwl lai nihai, saruok le ruoka i um a, i thisena în sukpawrche lai kha i hriet zing ta naw a nih.

23 “Chun, i rîtlona po po hnunga chun (i chung a rik, i chung a rik! Lalpa Pathien chun a tih),

24 hmun langsârtak takhai chu i ta dingin i bâwl a, kawtthlêr tinahai chun hmun insângtakhai chu i ta dingin i siem ta a.

25 Lam tluongpui tinahai chun i hmun insânghai chu i bâwl a, i mawina chu tirdakumnain în changtir a, mi a hung khêl taphawt che kuoma chun în hlîm a, i hurna chu i sukpung ta a.

26 I tuolbâwm, tisa ropuina, Aigupta mi le khawm chun i lo uire ta a; lunginsennaa mi chophâwk dingin i hurna chu i sukpung ta a.

27 Chuleichun, ngai ta, i chungah ka kut kân let a, i bu pângngai chu ka suktlâwm ding a nih, chun, Philistin naunuhai, i lampui tirdakum inzapuituhai, nangma theidatuhai duthusâmah pe suok ka ti che.

28 Mumal boa i um lei khan Assuria mihai kuoma khawm nawchizawrah i lo insiem ta a; anih, an kuoma chun nawchizawr thil chu i lo thawa chu i lungawi tâwk si naw a.

29 Chu nawa khawm chun Kanaan rama chun, Kaldai ram chenin i hurna chu i sukpung a; chu khawm chun i la lungawi tâwk naw a.

30 Hieng thil, nuhmei châk tawm tawmhai sin i thaw hi hmuin, ‘I lungril chu a va khawhlo de!’ Lalpa Pathien chun a ti a nih.

31 Lampui tluong tinahai chun i hmun langsârhai chu i bâwl a, kawtthlêr tinahai chun i hmun insânghai chu i siem bawk a; hawman khawm i lâk nawnaa hin nawchizawr el ang khawm i ni nawh.

32 Nuhmei uirenu, mâni pasal nêka mikhuolhai la lemtu!

33 Nawchizawrhai po po kuoma chun miin thilpêkhai an pêk hlak a, nang ruok chu i hmangaihai po po chu thilpêkhai i pêk a, anni chu i tham a, i châknaa ding chun sîr tina nangma kuoma an hung theina dingin.

34 I nawchizawrnaa hin nuhmei danghai nêka danglamna a um a, nang chu mi tukhawma nawchi zawr dingin an hung zui naw chea hin; nang chun a man chu i pêk lem a, nangma kuoma chun a man chu pêk a ni naw a, chuleiin, i danglam a nih.

35 “Chuleiin, aw nang nawchizawr, Lalpa thu chu lo hre rawh:

36 Lalpa Pathien chun hieng ang hin a tih; i hmangaituhai kuoma i châkna zâra chun i saruokna chu hmusuok a na, i tirdakumna chu bunsuok a ni bawk lei le; i pawrchena milimhai po po le, an kuoma i lo pêk tah i nauhai thisen po po lei chun,

37 ngai ta, chuleichun, i hmangaihai po po chu ko khâwm ka ta, inhawi i lo chênpuihai po po le, i lo hmangai tahai po po le, i lo theida tahai po po le chun, kil tina inthawkin, i chungah hung ṭhuoi khâwm ka ta, i saruokna po pohai chu an hmu theina dingin an kuoma chun i saruokna chu hâwk ka tih.

38 Chun, nuhmei inneina dân bawse le, mâni nau thisen insuo chunga rorêl angin i chungah rorêl ka tih; i chunga chun îtthîkna le lunginsenna thisen chu hung intlungtir ka tih.

39 Chun, anni kuta chun pe bawk ka ti che a, i hmun langsârhai chu peisieng an ta, i hmun insânghai chu sukchim an tih; i puon sil chu hlîppêk an ti che a, în cheina thil hluhai chu lâng an tih; chuongchun, saruok le ruokin mâksan an ti che.

40 Nangma chunga chun inkhâwmpuina nei bawk an ta, lunghaiin dêng an ti che a, an kâwlhnâmhaiin sunthleng bawk an ti che.

41 I inhai chu meiin râwng an ta, nuhmei tamtak mithmua chun i chunga rorêlna chu sukthlûng an ta; chun, nawchizawr anga um chu ma dingin siem ka ti che a, chun, hawman khawm pe ta ngai hrim hrim naw ti ni.

42 Chuongchun, ka lunginthakna chu i chungah hrîtthlâng ka ta, ka îtthîkna chu nangmaa inthawk chun fe hmang tâng a ta, to ṭawk ṭawk ka ta, lunginsen nâwk ta naw ningah.

43 I tleirâwl lai nihai kha i hriet zing ta naw a, amiruokchu, hieng thilhaia hin i mi suklungsen a; chuleiin, ngai ta, kei khawma i nun suol maw chu i lu chungah hung intlungtir ka tih, Lalpa Pathien chun a tih; chun, pawrchenahai po po belsain hi khawhlona hi thaw ta naw ti nih.

44 “Ngai ta, mi tukhawm thuvarhai hmangtu chun hi thuvar hi i chungah hung hmang an tih, ‘A naunu khawm a nu ang bawk,’ ti hi.

45 Nang chu i nu naunu, a nauhai le a pasal khawm dawnsaklo naunu chu i na, nang chu i zuorpuihai, mâni nauhai le pasalhai khawm dawnsaklohai unaunu chu i na; in nu chu Hit mi a na, in pa khawm Amor mi a nih.

46 I zuorpui upa lem le a naunuhmeihai chu i vawitienga chêng Samaria hi a na; chun, i zuorpui naupang lem i changtienga chêng chu Sodom le a naunuhmeihai hi an nih.

47 An lampuihai chu i hrawin, an tirdakumnahaia chun i lungawi tâwk naw a; amiruokchu, hun sâwt nawtê sûngin i um dân po poah anni nêk hmanin i se lem a.

48 Ka hring zing angin, Lalpa Pathien chun a tih, ‘nang le i naunuhaiin, nangin i thaw angin i zuorpui Sodom chun amanih, a naunu khawmin amani khawm a thaw naw a.

49 Ngai ta, hi hi i zuorpui Sodom suolna chu a nih; ama le a naunuhaia chun chapona, bei ditkhawp, hausaka inhawitirna a um a, mi tlasamhai le mi rimsihai chu a ṭhangpui chuong nawh.

50 An chapo a, ka hmaa chun tirdakumna an thaw a, chuleiin, ṭha ka ti ang peiin anni chu ka lâk hmang ta a.

51 Samaria khawm chun i suol zâtve khawm a thaw naw a, nang ruok chun anni nêkin i tirdakumna chu i sukpung nasa lem a, chuleiin, tirdakumna i thawhai po po chun i zuorpuihai chu felah în langtir tah a nih.

52 I zuorpuihai fel lema în langtirna hin nang ngeiin i muolphona chu phur rawh, anni nêka tirdakumna nasa lem thawha i suolnahai leiin anni chu nanga nêkin an fel lem a nih, i zuorpuihai chu fel lema în langtir leiin.

53 “An sal nina chu inlet ka ta, Sodom le a naunuhmeihai sal nina, Samaria le a naunuhmeihai sal nina le, anni laia i salhai sal nina khawm inlet ka tih,

54 an ta dinga thlamuongtu nia i thil lo thaw tahai po poa khan în zak a, i muolphona chu i phur theina dingin.

55 I zuorpuihai Sodom le a naunuhmeihai le Samaria le a naunuhmeihai chu an um dân hmasaa bawk kîr nâwk an ta, nang le i naunuhmeihai khawm in um dân hmasaa bawk kîr nâwk in tih.

56 I chapo ni khan i zuorpuinu Sodom chu i ṭawngse hnâwkna ni lo am a nih,

57 i rîtlona suklang a ni hma khan? Tuhin amanu angin Suria naunuhmeihai le a vêla umhai po po le, Philistin naunuhai i kîmvêla hmusittuhai che hrilsiet i hung ni ta hi.

58 I hurna le i tirdakumna hremna chu i phur a nih, Lalpain a tih.


Thuthlung kumhlun

59 “Lalpa Pathien chun hieng hin a tih: thuthlung bawsea, inkhâmna hmusita nangin i lo thaw ta ang khan nanga chunga khawm thâwng ka tih.

60 Nisienlakhawm, i tleirâwl lai nihaia nang le ka thuthlung chu hre zing ka ta; chun, nang le chun chatuon thuthlung indin ka tih.

61 I unauhai, i unu le i sangnu i pawmlût pha chun naunuhmeihai dingin anni chu i kuomah pêng ka tih, i thuthlung lei ruok chu ni lovin.

62 Chun, ka thuthlung chu nang leh sukdet ka tih, chun Lalpa ka nih ti mi hre tâng i tih.

63 Thil i lo thawtahai po poa ka ngaidam pha che chun i hriet zing a, i hmai a mâwk a, în zak leia i bau i kâk dêr ta nawna dingin, Lalpa Pathien chun a tih,” tiin.

Hmar OV (Re-edited) Bible (Millennium) - Pathien Lekhabu Inthieng 

Copyright © Bible Society of India, 2016.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ