EZEKIEL 14 - Pathien Lekhabu Inthieng (BSI)

Milim betu, zâwlnei râwntuhai chunga rorêlna

¹ Chun, Israel upa ṭhenkhat ka kuomah an hung a, ka hmaa chun an ṭhung a.

² Chun, Lalpa thu chu ka kuomah a hung tlung a,

³ “Mihriem naupa, hieng mihai hin an milimhai chu an lungrilhaia chun an lâk tlat a, an hmaihmaa chun an suolna tlûkna lunghai chu an sie ta a; annihai thu indawn hin ka la um rawp ding am a nih?

⁴ Chuleiin, an kuoma chun thu hril la, an kuomah, ‘Lalpa Pathien chun hieng hin a ti a nih, Israel sûngkuo laia mi tukhawm a milimhai chu a lungril sûnga la tlat a, a hmaihmaa a suolna tlûkna lung sietu zâwlnei kuoma hung si chu, keima Lalpa ngeiin a milimhai tamzie ang peiin dawn ka tih;

⁵ an milimhai leia keimaa inthawka an invâkhmang vawng tâk leiin, Israel sûngkuo chu an lungrilhai ka lâk theina dingin’ tiin.

⁶ Chuleiin, Israel sûngkuo kuoma chun hril la, ‘Lalpa Pathien chun hieng hin a tih; Hung kîr unla, in milimhaia inthawkin fe hmang ro; chuongchun, in tirdakumnahai po po chu nghatsan ro.

⁷ Israel sûngkuoa mi tin amanih, Israel rama mikhuol inzin mikhuol amanih khawm keimaa inthawka pêthrana, a milimhai chu lungrila la tlata, a hmaihmaa a suolna tlûkna lung sie a, ama ta dinga ka kuoma thu indawn dinga zâwlnei kuoma hung si chu; kei Lalpa ngeiin, keiin dawn ka tih;

⁸ chu mipa chunga chun ka hmai innghat ka ta, thuvara inchikna dingin thilmakah siem ka ta, ka mihaia inthawk chun ama chu sât thlâng ka tih; chun, Lalpa chu ka ni ti mi hre tâng in tih.

⁹ Chun, zâwlnei chu hlêmin a um a, thu a hril chun, kei Lalpa hin chu zâwlnei chu ka hlêm a na, ama chunga chun ka kut inlet ka ta, ka mi Israelhai laia inthawkin ama chu sukbohmang ka tih.

¹⁰ Chun, an suol maw chu phur an ta; zâwlnei suolna chu mi ama kuomah zawngtu suolna ang ngei chu nîng a tih;

¹¹ Israel sûngkuo chu keimaa inthawka an fe pêt ta nawna ding le, an bawsietnahai po po leia anni an insukpawrche ta nawna dingin; amiruokchu, ka mihai an hung ni theia, an Pathien ka ni theina dingin, Lalpa Pathien chun a tih,’ tiin,” a ta.

Pathienin Jerusalem a hremna indikzie

¹² Chun, Lalpa thu chu ka kuomah a hung tlung a,

¹³ “Mihriem naupa, bawsietna thil chu thawin ram chu ka chungah lo suol ta sienla, chun, keiin a chungah ka kut inletin, bei a ringsan chu suksein, a chunga chun ṭâmna tirin, amaa inthawk chun ramsa le mihriemhai khawm lo sât thla ta lang;

¹⁴ hi mi pathumhai Noa, Daniel le Job hai meu khawm hi a sûnga chun umhai sien, an felna chun anni hringna chau chu an sanhim ding a nih, Lalpa Pathien chun a tih.

¹⁵ Chun, chu ram chu ramsa tuorhlaumhai chun fe thlengin, sukse hai sien, râusana umin, ramsahai lei chun mi fe paw ngam lovin umhai sien;

¹⁶ a sûnga chun hieng mi pathumhai hi um hai sienkhawm, Lalpa Pathien chun, ‘kei ka hring angin, naupa amanih, naunu amani khawm sanhim naw ni hai a, anni le anni chau insanhim an ta; ram chu râusan nîng a tih’, a tih.

¹⁷ Annawleh, chu ram chunga chun kâwlhnâm ka hung intlungtir a, ‘Kâwlhnâm, ram chu fe thleng rawh’, tia, amaa inthawka ramsa le mihriemhai ka sât thlâk chun,

¹⁸ hieng mi pathumhai hi a sûnga chun um sienkhawm, Lalpa Pathien chun, ‘kei ka hring angin, naupa amanih, naunu amanih sanhim naw ni hai a, anni le anni chau insanhim an tih,’ a tih.

¹⁹ Annawleh, rama chun hripui ka tir a, a chunga chun, ramsa le mihriemhai chu sât thla dinga, thisenin ka lunginsenna ka bunthlâk chun,

²⁰ Noa le Daniel le Job chu a sûnga chun um hai sienkhawm, Lalpa Pathien chun, ‘kei ka hring angin, naupa amanih, naunu amanih chu sanhim naw ni hai a, an felnain anni le anni chau chu in sanhim an tih,’ a tih.

²¹ Lalpa Pathien chun hieng hin a ti si a; ‘Ka rorêlna natak palihai kâwlhnâm, ṭâmna, ramsa tuorhlaumhai le hripuihai hi Jerusalem chunga, amaa inthawka ramsa mihriemhai râwthmang dinga ka tir pha chun ieng ang lâwma nasa zuol am a ni ding chu?

²² Amiruokchu, ngai ta, chutaka chun a mahla lâksuok la ni rawp an ta, an naupasalhai le an naunuhmeihai chu; ngai ta, in kuoma chun hung suok an ta, an umdân le an thilthawhai chu lo hmûng in tih, chun, Jerusalem chunga thil ṭha naw ka hung intlungtir thua le a chunga ka hung intlungtir po po thua chun sukthlamuongin um in tih.

²³ An um dânhai le an thilthawhai i hmu pha chun sukthlamuong an ti che a, a sûnga ka ithaw tahai po po chu a san um lovin ka thaw nawh ti hre tâng in tih,’ Lalpa Pathien chun a tih,” tiin.