EZEKIEL 13 - Pathien Lekhabu Inthieng (BSI)

Zâwlnei tehlêmhai inthiemlova an um

¹ Lalpa thu chu ka kuomah a hung tlung a,

² “Mihriem naupa, Israel rama zâwlnei, anni lungrila inthawk ela thuhrillâwkhai hril hlaktuhai kuoma chun thu hril la, ‘Lalpa thu chu lo ngai ta u,’ ti rawh.

³ Lalpa chun hieng hin a tih: zâwlnei invêt, iengkhawm hmu si lova mâni ngaidân ngawt zâwmtu chu a chung a rik!

⁴ Aw Israel, i zâwlneihai chu hmun ṭâwpa sihalhai ang an ni ta a.

⁵ A âwnga chun in hang fe naw a, Lalpa nia indonaa ngîrna dingin Israel sûngkaw ta ding chun paldâi in siem bawk naw a.

⁶ An hmulawkna chu ân diknaw a, Ai sâna an hril lâwkhai chu khêl vawng a nih. Lalpain anni chu a tir naw sain, tiin an thu chu sukdet ni ngei dingin mihai an inbeiseitir a.

⁷ Keiin ka hril naw a, ‘Lalpa chun a hril a nih,’ in ti hin thilhmulâwk teplo chu in hmu a, aisânin thukhêl chu in hrillâwk a ni nâwm a nih?” tiin.

⁸ Chuleiin, Lalpa Pathien chun hieng hin a tih: “Teplo mei mei in hril a, khêlhai chu in hmu leiin, ngai ta u, nangni chu ka dodâl cheu a nih. Lalpa Pathien chun a tih.

⁹ Aisânna thukhêl le, zâwlnei teplo mei mei hmutuhai chunga chun ka kut chu um a ta; ka mihai inkhâwmnaa chun ṭhang ve naw ni hai a, Israel sûngkaw chanchin inzieknaa chun ziek ni bawk naw ni a; Israel rama chun lût bawk naw ni hai a; chun, Lalpa Pathien chu ka ni ti mi hre tâng in tih.

¹⁰ ‘Inremna,’ tiin ka mihai chu an ṭhuoi suol a; inremna chu a um naw a, chun, miin bang a siem lai chun, ngai ta, chirhak inhnâk lovin an bel a;

¹¹ chuong chirhak inhnâk lova beltuhai kuoma chun, a tla nâwk el ding a nih ti hril rawh, ruo a hrâta hrât hung sûr a ta, riel nasatak tlâng a ta, thlipui nasatakin nuoi a tih.

¹² Ngai ta u, bang chu a tla pha chun in kuomah, ‘In ibelna chu khâwlai am a um leh?’ an ti naw ding cheu maw?

¹³ Chuleiin, Lalpa Pathien chun a tih; Ka lunginsenin thlipui hrângin suksieng ka tih; ka lunginsennaa chun ruopui nasatakin sûr a ta, a suksetu ding lunginsena riel nasatak leh.

¹⁴ Chuongchun, bang chirhak inhnâk lova in bel kha suksieng ka ta, hnuoiah hung la thlâng ka tih; chuongchun, a lung phûm chu inlang tâng a ta, tlûng a ta, chu sûnga chun sukbohmangin um in tih; chun, Lalpa ka ni mi hre tâng in tih.

¹⁵ Chuong ang chun ka lunginsenna chu bang chunga le chirhak inhnâk lova beltuhai chunga chun sukpuitling ka ta; in kuoma chun, ‘Bang chu a um ta naw a, a beltuhai khawm,’ tîng an tih.

¹⁶ Zâwlneihai Jerusalem chungthu hrillâwktu le inremna um silo inremna dinga thilhmulâwk hmuhai chunga chun, Lalpa Pathien chun a tih.

¹⁷ “Chun, nang mihriem naupa, an lungrila inthawka thu hriltuhai, i mihai naunuhai tieng chu ngha rawh; anni kalin thu hril la,

¹⁸ Lalpa Pathien chun, ‘Nuhmei, kutrîng tina inbuntir ding ṭhuitu le, thlahai pêl dinga mi saput ieng ang po el lua dinga rawmawl siem chu a chung a rik de! a tih,’ ti rawh. Ka mihai thlahai chu pêlin nangni ta ding chauin thla chu in sandam ding maw?

¹⁹ Buṭei vei khat le bei hlek hmu dingin ka mihai lai chun, mi thi lo dinghai chu that ding le, mi hring lo dinghai chu sandam dingin, thu khêl ngai hlak ka mihai chu hlêmin, ka mihai lai chun i mi lo sukhmingsiet ta a.

²⁰ Chuleiin, Lalpa Pathien chun hieng hin a tih, Ngai ta u, vate anga manna dinga in thil inbuntirhai chu ka dodâl a nih; in kuthaia inthawkin ka keithlêr ding a nih; in man tumhai chu infetir ka ta, vate anga in ipêlhai ngei chu.

²¹ In rawmawlhai chu keithlêr ka ta, ka mihai chu in kuta inthawkin sansuok ka tih; chun, pêl dingin in kuta chun um ta naw ni hai; chun, Lalpa chu ka nih ti mi hre tâng in tih.

²² Mi fel lungril ka suklungngai naw chu thukhêla in suklungzîng tâk leiin mi rilo kuthai khawm in lo sukhrât ta a, a lampui rilova inthawka a kîr nâwk nawna dingin hringna thu in tiem a;

²³ chuleichun, teplo chu hmu nâwk ta naw ti niu a, vântieng thilhmulâwkhai khawm chu; chun, ka mihai chu in kuta inthawkin sansuok ka ta, Lalpa chu ka ni ti mi hre tâng in tih,” tiin.