EZEKIEL 12 - Pathien Lekhabu Inthieng (BSI)

Ezekielin sala an lût dingzie ân entir lâwk

¹ Lalpa thu chu ka kuomah a hung nâwk a.

² “Mihriem naupa, nang sûngkaw hel hmang, hmûna dinga mithai nei si a, hmu lohai, hrietna dinga nahai nei si a, hre lohai laia chêng, sûngkaw hel hmang an ni si a.

³ Chuleiin, nang mihriem naupa, sal intâng ding angin thuomhnaw intêl la, sûnah an mithmu ngeiah fe suok rawh; chun, an mithmua chun i hmuna inthawkin hmun dangah insawn rawh; sûngkaw hel hmang an ni nâka chu an ngaituo thei rawi mawh.

⁴ Chun, i thuomhnaw chu sûnah an mithmuah hung la suok i ta, sal intâng ding angin; chun, sal intânga fe dinghai thaw angin zântieng hunah an mithmuah nang ngei chu fe suok i ta.

⁵ An mithmua chun bang chu ver âwng la, chutaka chun i thuomhnaw chu la suok rawh.

⁶ An mithmua chun i liengkoah phur i ta, inthima chun phur pei i ta; i hmai khawm hnuoi hmu lo dingin în khum ding a nih; Israel sûngkuohai ta dinga inchiknaah ka sie ta si che a,” tiin.

⁷ Chun, chuonga thu pêka ka um ang tak chun ka thaw ta a; ka thuomhnaw chu sûnah ka hung lâk suok a, sal intâng ding ang tak chun; chun, zântieng chun ka kutin bang chu ka ver âwng a; thuomhnaw chu inthima chun ka hung lâk suok a, an mithmua chun ka liengkoah ka phur ta a.

⁸ Chun, zîngkâr chun Lalpa thu chu ka kuomah a hung tlung a,

⁹ “Mihriem naupa, Israel sûngkuo, sûngkaw hel hmang chun i kuomah, ‘Ieng am i thaw a?’ an ti che a ni naw maw?

¹⁰ an kuoma chun hril la, Lalpa Pathien chun hieng hin a tih, ti rawh, Hi chungrikna hin Jerusalema lal le Israel sûngkuohai po po an umnahai chu a kâwk a nih.

¹¹ Hril la, in ta dinga inchikna ka na, ka thaw ta angin an kuoma chun hung tlung a tih, hnawt suoknaa chun, salah an fe ding a nih.

¹² Anni laia lal um chun inthim hnuoia chun a liengkoin phur a ta, fe suok a tih; chutaka phursuokna ding chun bang chu ver âwng an tih; a mithaia hnuoi a hmu nawna dingin a hmai chu inkhum tlat a tih.

¹³ Chun, ka lên khawm chu a chunga chun dêngkhum ka ta, ka chânga chun âwk a tih; chun, Kaldaihai ram Babulona chun ṭhuoi ka ta; chutaka chun thi naw ding ni sien khawm, hmu chu hmu naw ni.

¹⁴ Chun, a pâwlhai po po le, ama vêla ama ṭhangpuituhai ding po po chu kil tinah the dar ka ta; an hnunga kâwlhnâm chu phawi ka tih.

¹⁵ Chun, ramhaia ka hnawt dar pha le, hnamhai laia ka sukdar pha chu Lalpa kha ka ni ti mi hre tâng an tih.

¹⁶ Amiruokchu, anni laia mi tlâwmte chu kâwlhnâma manih, hripuia manih, ṭâmnaa inthawkin amani chun hlâng ka ta; an fena tieng tienga hnamhai kâwla chun an tirdakumna po po chu an phuongdar theina dingin; chun, Lalpa chu ka ni ti mi hre tâng an tih,” tiin.

¹⁷ Chu nawa khawm Lalpa thu chu ka kuomah a hung tlung a,

¹⁸ “Mihriem naupa, i bei kha inthin pumin fa la, i tui khawm kha inthin pum le ṭitak pumin dâwn rawh;

¹⁹ chun, kha rama mipuihai kuoma chun, Israel ram le Jerusalem hluotuhai chungthua chun Lalpa PATHIENIN hieng ang hin a tih; an bei chu ṭitumna leh fâng an ta, an tui chu maktina leh dâwn bawk an tih, chutaka chêngtuhai po po pâwngnêkna leiin, chutaka umhai po pohaia inthawka chu ram chu râusan a ni theina dingin.

²⁰ Chun, khawpui, hluoa umhai chu suksiet nîng a ta, ram chu râusan nîng a tih; chun, Lalpa chu ka nih ti mi hre tâng in tih,” tiin.

²¹ Chun, Lalpa thu chu ka kuomah a hung tlung a,

²² “Mihriem naupa, hi thuvar Israel rama in inei, ‘Nihai chu sukseiin a um a, thilhmulâwkhai tin chu a puitling ta nawh,’ ti hi ieng tina am a na?

²³ Chuleiin, an kuoma chun hril la, Lalpa Pathien chun hieng hin a tih, ‘Hi thuvar hi suktâwp ka ta, Israel rama chun thuvarah hmang ta naw ni hai; amiruokchu, an kuoma chun hril la; thilhmulâwk thu tin tlungna chu a hnai tah,’ tiin.

²⁴ Israel sûngkaw sûnga chun thilhmulâwk teplo amanih, aiena inhlêmna hrim hrim a um ta naw ding a ni si a.

²⁵ Lalpa chu ka ni si a: thu hril ka ta, chu ka thuhril chu thawin a um ngei ding a nih; sukbahla ni ta ngai naw ni; aw sûngkaw hel hmang, in nihaia chun thu hril ka ta, thaw ni bawk a tih, Lalpa Pathien chun a tih,” tiin.

²⁶ Lalpa thu chu ka kuomah a hung tlung nâwk a,

²⁷ “Mihriem naupa, ngai ta, Israel sûngkuohai chun hieng hin an ta, ‘Thil hmulâwk a hmuhai hi ni sâwttak la hung tlung dinghaia mi ding chu a na, hun la hlataka mi dinghai chu a lo hril a nih,’ tiin.

²⁸ Chuleiin, an kuoma chun, ‘Lalpa Pathien chun hieng hin a tih; ka thu hrim hrim chu sukbahla ni ta naw ni a, amiruokchu, thu ka ihril chu thawin a um lem ding a nih,’ Lalpa Pathien chun a tih,” tiin.