DÂN PAHNINA 34 - Pathien Lekhabu Inthieng (BSI)

Mosie thi thu

¹ Chun, Mosie chu Moab phaia inthawkin Jeriko zâwna Nebo tlâng, Pisga tlâng sîpa chun a hang lâwn a. Lalpa chun Gilead ram po po, Dan chenin ân entir a;

² Naphtali le Ephraim ram po po, Manasse le Juda ram po po, a thlangtieng tuisuoriet chen;

³ Sim ram le tûm khawpui, Jeriko phai ruom, Zoar chenin.

⁴ Chun, Lalpain a kuomah, “Hi ram hi a nih, Abraham hai, Isak hai, Jakob hai kuoma, ‘In thlahai la pêng ka tih,’ tia inkhâma ka lo tiem kha; a hmu chu kân hmutir phawt che a na; nisienlakhawm, chutaka chun fe naw ti ni,” a ta.

⁵ Chuongchun, Lalpa siehlaw Mosie chu Lalpa thu angin Moab rama chun a thi ta a.

⁶ Chun, Beth-peor zâwnah Moab rama ruomah a phûm a; nisienlakhawm, a thlân chu tu chen hin tukhawma an hriet nawh.

⁷ Mosie chu a thi chun kum za le sâwmhni mi a nih; a mit ân thim naw a, a tha khawm a ṭhum chuong nawh.

⁸ Israel mihai chun Mosie chu Moab phaia chun ni sâwmthum an sûn a; chuongchun, Mosie sûna ṭap nihai chu a hung tâwp ta a.

⁹ Chun, Nun naupa Josua chu varna thlarauin a sip a, Mosie chun a chungah a kut ân nghat leiin; chun, Israel mihai chun a thu an zâwm a, Lalpain Mosie thu a pêk ang chun an thaw a.

¹⁰ Chutaka inthawk chu Israelhai lai chun Mosie anga Lalpain hmaisan meua a biek zâwlnei hrim hrim an hung um ta naw a,

¹¹ inchiknahai po po le, thilmak po pohai, Pharao le a siehlawhai po po kuoma le Aigupta ram po poa inentira,

¹² kut hrâttak le ṭiumtak tak dâma Israel mi po pohai mithmua Mosiein a thaw ang thaw ve hlak chu.