DÂN PAHNINA 33 - Pathien Lekhabu Inthieng (BSI)

Mosiein Israel hnamhai mal a sâwm

¹ Hi malsâwmna hin a nih Pathien mi Mosie chun a thi hmaa Israel mihai mal a sâwm chu:

² “Sinaia inthawkin Lalpa chu a hung a, Seira inthawkin an kuomah a tho a, Paran tlânga inthawkin a var a suok a; Mi inthieng sângsâwm laia inthawkin a hung; A kut changtieng chun an ta dingin dân chawk thei a um a.

³ Anih, a mihai chu a hmangai a, A mi inthienghai po po chu a kutah an um a; I ke bulah an ṭhung a, I thu chu pawm peiin,

⁴ Mosie chun dân a mi pêk a; Jakob mipuihai ta dingin ro hluo ding,

⁵ Ama chu Jeshurunah ân lal a, Mipui ṭhuoituhai an pungkhâwm a, Israel chi inzawmkhâwmhai chu.

⁶ Reuben chu dam zing sienla, thi lovin, A mihai chu tlâwm hle hai sien khawm,” ti hi.

⁷ Chun, hi hi Juda mal a sâwmna a nih; “Lalpa, Juda râwl chu ngai la, A mihai kuomah ṭhuoi lût rawh; I kutin a ta dingin dopêk la, A hmêlmahai thawpuitu ni rawh,” ti hi.

⁸ Chun, Levi chungthua chun, “I Thummim le i Urim chu i mi inthieng kuomah pe la, Massaah i fie a, Meriba tuia i thaw pêkpa,

⁹ ‘Ka nu le ka pa ka hriet nawh,’ titu, A unauhai hre lo a, Ama nauhai ngei khawm hre bawk lotu kuoma chun, I thu chu an pawm a, I thuthlung chu an zâwm si a.

¹⁰ Jakob mihai chu i rorêlhai chu inchûktir an ta, Israelhai chu, i dân, I hmaah riminhnik sieng an ta, I maichâmah pumrawhmang thilinhlân inhlân an tih.

¹¹ Mal sâwm rawh, Lalpa, a sum a pai, A kutsuokhai chu lo pawm la, A thawtuhai kâwng chu vaw la; A theidatuhai kâwng leh, an châng nâwk ta nawna dingin,” a ta.

¹² Chun, Benjamin chungthua chun, “Lalpa dittak chu a kuomah himin um a tih; Sûnnithlâkin awp a ta, Paw hlak a tih,” a ta.

¹³ Chun, Josef chungthua chun, “A ram chu Lalpa malsâwmin um raw se, Vân thil hlu dâidâw le, Tui inthûktak hnuoi tienga tuihai ichâwm;

¹⁴ Nisa lum huntâwkhai, Thlahaiin thil hlu ân suoktirin,

¹⁵ Kha hma tlânghaia thil ditumtakhaiin, Chatuon tlânga thil hluhai dâmin.

¹⁶ Leilung le a chung thil hluhaiin, Chîmbuka inlâr ditsaknain, Malsâwmna chu Josef lu chungah hung um raw se, A unauhai chunga hotua um lusîpa chun.

¹⁷ A ropuina chu a bâwngchal pieng hmasa ropuina ang a na, A ki chu ramsiel ki ang a nih. Chuhai chun, hnam tin sik a tih, kâwlkawdawng chenin, Chuonghai chu Ephraim sâng sâwmhai an na, Manasse sâng tamtak chu an nih,” a ta.

¹⁸ Chun, Zebulunhai chungthua chun, “Lâwm rawh, Zebulun, în vâksuoknaa dâm, Chun, Issakar, i puon ina dâm,

¹⁹ Tlângah chi tin ko an ta, Chutaka chun felna inthâwina dâm inhlân an tih; Tuipuihai hausakna an tlân ding a ni si a; Ṭieua ro inphûmhai leh,” a ta.

²⁰ Gad chungthua chun, “Gad mihai suklientu chu inpâkin um raw se, Gad chu sakeibaknei angin a um a, Bân a ham thlêr a, anih, lusîp chen khawmin.

²¹ A ram ṭha lai tak chu a ta dingin a thlang a, Rorêltu chanvoa chun inṭhungtirin a um si a. Ṭhuoituhai kuomah a fe a, Lalpa rorêlna fel a zui a Israelhai kuoma a rorêlna chu,” a ta.

²² Dan chungthua chun, “Dan chu sakeibakneite a nih, Basana inthawka hung inchâwm suok chu,” a ta.

²³ Naphtali chungthua chun, “Aw Naphtali, ditsaknaa lungâwi, Lalpa malsâwmnaa tlai, Sim le thlang, hluo rawh,” a ta.

²⁴ Aser mihai chungthua chun, “Aser chu nau le tea malsâwmin um sienla, A unauhai lai chun tlatlum sienla, Hriekah a ke inchie raw se.

²⁵ I kalnahai chu thîr le dârsen nîng a ta, I dam sûng poin i hrâtna khawm um zing a tih,” a ta.

²⁶ “Aw Jeshurun,i Pathien ang tukhawm an um dêr nawh, A ṭhangpui ding chea vânhaia inthawka hung a, A ropuinaa vân boruokhaia inthawka hung chu.

²⁷ Chatuon Pathien chu în humhimna a na, Hnuoi tienga chun chatuon bân a um, Hmêlmahai chu a vaikiengpêk hlak che a, ‘Sukbohmang rawh,’ a ti a.

²⁸ Chun, Israel chu râlmuongtakin a um a, Jakob tuisunsuo chu a pumbil a, Bu le uoin rama chun, Anih, a vânhaiin dâidâw an infartir a,

²⁹ I hamṭha de, aw Israel, Nang ang hrim tu am an um a, Lalpa sandam mihai? Nangma ṭhangpuitu phaw, I ropuina kâwlhnâm a nih, I hmêlmahai i kuomah intuklût an ta, An hmun insânghai chu chîl i tih,” a ta.