DÂN PAHNINA 32 - Pathien Lekhabu Inthieng (BSI)

¹ “Na lo sit ro, vânhai ka hril ding a nih; Ka ṭawngbau suok leihnuoi hin lo ngai raw se,

² Ruotui angin ka thu chu sûr a ta, Dâidâw angin ka thu chu far a tih; Hlobet innotak chunga ruo ang le, Hlohna chunga ruomuolkhawi angin.

³ Lalpa hming chu ka puong ding a nih, Ropuina chu ei Pathien pe ro.

⁴ “Lungpui chu, a thilthaw chu a fel famkim a; A lampui po po chu ân dik a nih. Pathien ringum, rîtlona nei lo, Fel le ṭha a nih.

⁵ Ṭha nawtakin a chungah an thaw a, a nauhai an ni ta naw an demkaina leiin, Suon bengtlanaw le kâwmaw an nih.

⁶ Aw mi invêt le var nawhai, Chuong ang chun maw Lalpa chu in thung ding chu? Ama chu ân dintu che i pa, Siemtu che le inngîr dettu che ni lo am a nih?

⁷ Kha hma nihai kha hre zing la, Suon tamtak kumhai chu ngaituo ro: I pa indawn la, khîkhmûng a che; I upahai khawm, hril an ti che.

⁸ A Chunghnungtak chun hnamhai ram a pêk laia, Mihriem nauhai a ṭhe lai khan, Hnamhai ramri chu a khang a, Israel mihai zât ang peiin.

⁹ Lalpa chanvo chu a mihai an na, Jakob rawi chu a rochan an nih.

¹⁰ “Thlalêr ram ruok inrûm vung vunga chun; A vêla umnghain a enkawl a, A mitnaulêng angin a kawl a.

¹¹ Mupuiin a bua a te a chawktho a, A te chungah thla a zâp a, A thlahai a zâr a, a lâk a, A thlaa a dawm hlak angin,

¹² Lalpa chauin a ṭhuoi hlak a, Ram dang pathien ni lovin.

¹³ Hnuoi hmun insângahai chun ân chuongtir a, Loa thil rasuok chu a fâk hlak a; Lungpuia inthawka khuoizu ân dâwntir hlak a, Lung changa inthawka hriek leh.

¹⁴ Bâwng nênetui inkhal, berâm nênetui, Berâmte thâuhai leh, Basan ram berâmchal le kêlhai, Bu inhniktak chihai leh; Grêp tui uoin i dâwn a.

¹⁵ “Jakobin khawptakin a fâk a, Jesurun chu a hung hausa a, a hung hel ta a. A hung thâu a, a hung inchawm a, a hung nâm ta a; A siemtu Pathien a nghatsan a, A sandamna Lungpui chu a ngainêp a.

¹⁶ Ram dang pathienhai bein a thîkthu an chawktho a, Thil tirdakumin a lungsenna an chawktho a.

¹⁷ Pathien ni lo, khawhrihai kuomah an inthâwi a, An hriet ngai naw pathienhai kuomah, Vaihnurama um chau pathien tharhai, In thlatuhai iṭi ngai lohai kuoma chun.

¹⁸ A thlatu che Lungpui chu i ngaisâng naw a, A siemtu che Pathien i theinghil bawk.

¹⁹ “Chu chu Lalpain a hmu a, a theida a, A naunu le naupasalhai isuklungsenna leiin.

²⁰ ‘Inbîk hmangsan ka ta, Iengtin am an um hrim hrim,’ a ta. Suon rilo an nih, Ringum lo nauhai.

²¹ Pathien ni lo thilin ka thîkthu an chawktho a, An milimhaiin an mi suklungsen a; Chia hril khawp lohai leh inthîktir ka ta, Hnam invêthai hmangin suklungsen ka tih.

²² Ka lunginsen a chawk a, Seol mawng chenin a kâng a, Leihnuoi, a rasuok pumin a kâng zo, Tlâng innghatna dâm a kâng a.

²³ “An chungah sietna intieng khâwm ka ta, An chungah thal inthlâng ka tih.

²⁴ Phîngṭamin inrâwp an ta, meipui le sietna namên lovin kâng hmang an tih; An chungah ramsa hahai tir ka ta. Pilvuta invâk mihai tûr leh.

²⁵ Puotiengah kâwlhnâmin thîng an ta, Sûngtienga chun thlabârin, Nunghâk, tlangvâl, nêne ne lai, Lua kêlsam ṭohai chenin.

²⁶ ‘Sukdar vawng ka ta, Mihriem laia anni hrietzingna chu sukbohmang dai ka tih,’ lo ti hiel tâng ka tih.

²⁷ An hmêlmahai chu ngaisuolin, ‘Kan kut chu dawm sângin a um tah, Hieng po po hi Lalpa ithaw a ni tawp nawh,’ hmêlma lunginsen chun tîng an tih ti ṭi naw lang chu.

²⁸ Varna bo hnam an na, Annia chun hrietthiemna a um nawh.

²⁹ Var hai sien chu hieng hi hrethiem an ta, An tâwpna ding an ngaituo thiem ding bah.

³⁰ Iengtin am pakhatin sâng hnawt a ta, Pahniin sîng intlânsiettir an ta, An Lungpuiin anni a zawr a, Lalpain anni ân hlân a ni si naw chun?

³¹ An lungpui chu ei Lungpui ang a ni naw a, Ei hmêlmahai ngei ngaidân khawma.

³² An grêphrui chu Sodom grêphrui, Gomorra rama mi a nih; An grêphai chu tûr grêp a nih. A bâwrhai chu a khâ.

³³ An uoinhai chu drakon tûr le, Rûlriel tûr hrâttak a nih.

³⁴ “Chu chu kân khâwlkhâwm, Ka robâwma châr khum chie a ni naw am a nih?

³⁵ Phuba lâk le thung chu keima thaw ding a nih, An kalbi ân tleu pha chun, An sietna ni chu a hung hnai an ta a, An chunga thil tlung dinghai chu hung tlung vak a tih.

³⁶ Lalpa chun a mihai ro a rêl ding a na, A siehlawhai khawm thawpêk a tih; An thilthawtheina inhmang a, Khuokhir le khir naw tukhawm um dêr lova a hmu pha chun.

³⁷ Hieng ang hin tîng a tih, ‘Khâwlai am an pathien, An inhumhimna lungpui chu,

³⁸ An inthawina thâu fatu, An dâwn ding thilinhlân uoin dâwntuhai chu tuhâm an na? Hung thoin hung ṭhangpui hai sienla cheu, Nangni humtu ni raw hai se chu!

³⁹ “Kei, keima ngei ka ni hre unla, Pathien dang an um nawh; Ka sukhlum hlak a, ka sukhring bawk hlak; Ka sukhliem hlak a, ka sukdam bawk hlak; Ka kuta inthawka mi lapêk thei hrim hrim an um nawh.

⁴⁰ Vân tieng ka kut ka phar a, Ka hringna sâlin ka hril a,

⁴¹ Ka kâwlhnâm tle ka tâtngei a, Ka kutin rorêlna ka kawl chun, Ka hmêlmahai chungah phuba lâng ka ta; A mi theidatuhai chu thung ka tih.

⁴² Ka thalhai chu thisenin sukrui ka ta, Ka kâwlhnâm chun thisen lem a tih; Thathai le salhai thisen le Hmêlma hotuhai lu chenin,” tiin.

⁴³ “Aw, nangni hnam tinhai, A siehlawhai thisen phuba chu a lâk ding a nih; Ama dotuhai chungah phuba a lâk ding a nih, A ram le a mihai ta dingin inremna famkim siem a tih,”

⁴⁴ Mipuihai na hrietah chuong hla thu po po chu Mosiein a hril vawng a, ama le Nun naupa Hosea leh.

⁴⁵ Chun, Mosiein chuong thu po po chu Israel mi po po kuoma a hril zo chun, an kuomah,

⁴⁶ “Tuta in kuoma ka thu inhriettira cheu hin, in lungril innghat tlat unla, hieng dân thuhai po po hi fîmkhurtaka zâwm dingin in nauhai chu thu pe ro.

⁴⁷ In ta dingin thil teplo mei mei a ni naw a, in hringna a ni si a; chun, hieng thil thaw hin, hluo ding Jordan in va kân rama chun in dam sâwt ding a nih,” a ta.

Mosie Kanaan thlîr phalpêk a nih

⁴⁸ Chun, chu ni vêk chun Lalpain Mosie a biek a,

⁴⁹ “Moab rama Jeriko zâwna Abarim tlângdung Nebo tlânga chun hang fe la, Israel mihai hluo dinga ka pêk Kanaan ram chu hang thlîr rawh.

⁵⁰ Chuongchun, i unaupa Aron Hor tlângah a thi a, a chihai kuoma ṭhuoi a ni ta ang bawk khan i hang lâwnna tlânga chun thîng i ta; i chihai kuoma ṭhuoi nîng i tih;

⁵¹ Zin thlalêra Kades-a Meriba tuia Israel mihai laia ka chunga in suol lei le Israel mihai laia in mi chawimawi naw lei khan.

⁵² Ram chu hang hmûng i ta, nisienlakhawm, Israel mihai ka pêk rama chun lût naw ti nih,” tiin.