Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

DÂN PAHNINA 28 - Pathien Lekhabu Inthieng (BSI)


Thuâwina leia Malsâwmna
( Lev 26.3-13 ; Dt 7.12-24 )

1 “Lalpa in Pathien râwl chu nguntaka in ngai a, vawisûna thu ka pêk cheu thupêk po pohai fîmkhurtaka in zâwm chun, Lalpa in Pathien chun khawvêl hnam po poa chunghnung takah siem a ti cheu.

2 Lalpa in Pathien thu in pawm phawt chun hieng malsâwmna po po hi in chungah um a ta, zui pei a ti cheu.

3 In tieng le ram tienga khawm chun malsâwmin um in tih.

4 In rîla rahai, in hnuoi rahai, in ran ruol pung, in bâwngpui le berâm ruol pung dâm chu malsâwmin um a tih.

5 In bâwm le in bei hmetna thlênghai malsâwmin um an tih,

6 in invâk suok chu malsâwmin um in ta, in hung kîr khawm chu malsâwmin um in tih.

7 In hmêlma nangni thawtuhai cheu chu Lalpain suktlâwmpêk a ti cheu a, a thaw ding cheuin lampui pakhatah hung lût an ta, lampui pasariah tlânsieng an tih.

8 Lalpain in bu in chunga dâm, in kutsuok chung po poa dâm, malsâwmna thu pêng a ta, Lalpa in Pathienin ram a pêk cheua chun malsâwm a ti cheu.

9 “In kuomah ṭawng a lo inkhâm ta angin Lalpa chun ama ta dingin hnam inthiengah sukdet a ti cheu, Lalpa in Pathien thupêkhai in zâwm a, a lampuihai chu in hraw phawt chun.

10 Chuongchun, khawvêl hnam tinin Lalpain a ta dinga a thlang cheu a nih ti hrieng an ta, ṭîng an ti cheu.

11 Chun, nangni pêk dinga in pi le puhai kuoma Lalpain a lo tiem rama chun in rîla rahai, in ran ruol punghai, in hnuoi rahaia dâm, Lalpain nasatakin sukpung a ti cheu.

12 Lalpa chun a huntaka in ram châwm ding ruotui pe ding cheu le, in kutsuok po po malsâwm dingin vân, a robâwm ṭha chu hawngpêk a ti cheu a; chuongchun, hnam tamtak inpûktir in ta, nangni ruok chun pûk naw ti niu.

13 Lalpain mei ni lovin, luah siem a ti cheu a, a hnuoihnung ni lovin a chunghnung pei nîng in tih; Lalpa in Pathien thupêk in awi a, tuta ka pêk cheu hi fîmkhurtaka pawm a, vawisûna thu ka pêk cheu,

14 a thuhai hi a ieng khawm hi changtienga manih, vawitieng amanih pathien danghai zui le rawngbâwl dinga in pêtsan naw phawt chun.


Thuâwi nawna Hnungzui
( Lev 26.14-46 )

15 “Amiruokchu, Lalpa in Pathien râwl chu nguntaka in ngai a, vawisûna thu ka pêk cheu thupêk po pohai hi fîmkhurtaka in zâwm naw chun hieng ṭawngsie po pohai hi in chungah hung um a ta, nangchîng an ti cheu.

16 In tienga le ram tienga khawm chun ṭawngsie phur in tih.

17 In bâwm le in bei hmetna thlêng chu ṭawngsephurin um a tih.

18 In rila ra dâm, in hnuoi ra dâm, in bâwngpui le in berâm ruol punghai chu ṭawngsephurin um an tih.

19 In invâk suok chu ṭawngsephurin um in ta, in hung nâwk khawm chu ṭawngsephurin um in tih.

20 Lalpain in chunga in thilthaw taphawt chungah ṭawngsie dâm, buoina dâm, kâwkna dâm, hung tir a tih, tlâwm in ta, bohmang vak el in tih; in thilthawhai a suol a, in mi hnungnghat leiin.

21 “Hluo dinga in lûtna rama inthawka a sukbohmang vawng hmakhat cheu chun Lalpain hri inkawltir tlat a ti cheu.

22 Lalpain ngawrna dâm, khawsik dâm, invûngna dâm, pang satna dâm, kâwlhnâm dâm, ṭâwlna dâm, hmawnna dâmin hrem a ti cheu a, in bohmang hmakhat chun hnawt pei a ti cheu.

23 In chung tienga in vân chu dârsen nîng a ta, in hnuoi chu thîr nîng a tih.

24 In ram hluo chu pilvut le pilvut khuah Lalpain inchangtir a ta; in bohmang hmakhat chun in chunga vâna inthawkin hung tlâng a tih.

25 Lalpain in hmêlmahai hmaa chun suktlâwm a ti cheu a; anni thaw dingin lampui pakhatah suok in ta, lampui pasariah tlânsieng in tih; khawvêl hnam tin laia chun kil tin kil tangah invâk in tih.

26 In ruong chu chunglêng vate po po le ramsa po pohai bu nîng a ta, a hnawthmangtu um dêr naw ni hai.

27 “Sukdam ruollo, Aigupta khuoihli dâm, pânsie dâm, invûngna dâm, uithak dâmin Lalpain hrem a ti cheu.

28 Invêtna dâm, mit indelna dâm, ṭitna dâmin Lalpain hrem a ti cheu;

29 mitdelin thimthama a dap a dap angin sûn vara khawm dap dap in ta, in khawsak thua chun tluongtlung ta naw ti niu; chun, nêksâwr ding le râllâk ding ringawt ni zawmzat in ta; sansuok ding cheu tukhawm um naw ni hai.

30 Nuhmei huol in ta, mi dangin zâlpui an tih; in bâwl in ta, hluo ruok chu hluo naw ti niu; grêp huon siem in ta, a ra chu sawr naw ti niu.

31 In mithmuah in bâwngchalhai chu that nîng an ta, a sa chu fa naw ti niu; in sabengtunghai chu la luipêk an ti cheu a, pe nâwk naw ni hai cheu; in berâmhai khawm chu in hmêlmahai pêk nîng an tih; santu ding cheu tukhawm nei naw ti niu.

32 In naunuhmeihai, in naupasalhai chu hnam danghai pêk nîng an ta, sûnnithlâkin anni chu ngaiin thlîr zing hlak in tih, in thlîrnân in mithai chu châu a tih; iengkhawm thaw thei in nei âwm si nawh.

33 In hnuoi râhai le in sin inrim râhai chu in hriet ngai naw hnamin fa zo an tih, nêksâwr ding le suknawmnat ni zawmzat in tih,

34 chuongchun, chuong thil chu in hmu chun invêt phâng in tih.

35 Lalpain in khûpahai, in kea dâm, sukdam theilo khuoihli na chi invawitir a ti cheu a, in kephaa inthawka in lusîp chenin.

36 “Nangni le in lal leh, in pi le pu chena in hriet ngai naw hnam kuomah Lalpa chun ṭhuoi a ti cheu a, chutaka chun thing le lunga siem pathien dang rawng chu bâwl in tih.

37 Chuongchun, Lalpain a la ṭhuoi hmangna ding cheu hnam po po lai chun makti le sehnâwkna le a se tieng hrilhmêna nîng in tih.

38 Loah bu chi tamtak fe suokpui in ta, tlâwmte bak sîk in tih, khâuin an fâk zo vawng ding a nih.

39 Grêp huon siem in ta, enkawl in ta, nisienlakhawm, a uoin chu dâwn naw ti niu a, grêp chu lo bawk naw ti niu, a ngêin a fâk zo ding a nih.

40 In ram po poa chun oliv thing chîng in ta, nisienlakhawm, a hriek chu nâl naw ti niu, in oliv rahai chu hrût zo a tih.

41 Naupasalhai, naunuhmeihai nei in ta, nisienlakhawm, in ta ni zing naw ni hai, sala ṭhuoiin an la um ding a nih.

42 In thei kûng po po le in hnuoi râ chu khâu chan nîng a tih.

43 Ram dang mi nangni laia umhai chun insâng khal tiel tiel an ti cheu a, nangni ruok chu inhnuoi tiel tiel in tih.

44 Inpûktir an ti cheu a, nangni ruok chun inpûktir ve naw ti niu. Anni chu lu nîng an ta, nangni ruok chu mei nîng in tih.

45 Hieng ṭawngsie po po hi in chungah la hung um a ta, hnawt an ti cheu a, nangchîng an ti cheu a, an sukbohmang vawng cheu chenin; a thupêk cheu le a dân a pêk cheu zâwm dinga Lalpa in Pathien râwl chu in ngai naw leiin,

46 in chunga le in thlahai chunga kumkhuoa inchikna ding le makti dingin la um a tih.

47 “Thil iengkima in hung burip khawma Lalpa in Pathien chu lungril lâwmtak le hlimtaka a rawng in bâwl naw leiin,

48 nangni thaw dinga Lalpain a la hung tir ding in hmêlmahai rawng chu, phîngṭâm pum dâm, dangchâr pum dâm, saruok pum dâm, thil iengkim tlasam pum dâmin la bâwl in tih; an sukbohmang hmakhat cheu chun in rîngah thîr rîngkawl inbâttir an tih.

49 Hlataka inthawk, kâwlkawdawnga inthawkin nangni thaw ding hnam Lalpain mupui bir angin hung tir a ta, an ṭawng khawm in hriet naw hnam;

50 upahai khawm pawisa lo le ṭhalaihai khawm ditsak chuong lo hnam nunrâwngtak el chu.

51 “Chun, in ran ruol punghai, in hnuoi rahai dâm, sukram in ni hmakhat chu fâng an ta, bu dâm, uoin dâm, hriek dâm, in bâwng punghai dâm, in berâm ruol têhai chu hlapêk naw ni hai cheu; in siet letdêr chenin.

52 In ram po poa in ringpui, in kul insânghai a chim chenin in kul kawtkhâr po poah inhuol an ti cheu, Lalpa in Pathienin a pêk cheu in ram po poa in kul kawtkhâr po poah inhuol an ti cheu.

53 In hmêlmahaiin an dang chêpna cheu leiin an inhuolna cheu le an dang chêpna cheu chun in rila ra, Lalpain a pêk cheu in naunuhmeihai le in naupasalhai sa fâng in tih.

54 Nangni laia mi nun ṭha mi tlangtakhai khawmin an unaupahai dâm, an nuhmei dittakhai dâm, an la umpui an nauhai takngiel khawm hmu nuom naw ni hai a,

55 iengkhawm an nei ta naw leiin an nauhai sa an fâk ding chu an tuhai khawm pe naw ni hai, an inhuolna cheu le an dang chêpna, in hmêlmahaiin in kul kawtkhâra an dang chêpna cheu leiin.

56 Nangni laia nuhmei um inno le innêmhai an innêm le an um inno leia hnuoi khawm sir ngai lohai chun an pasal dittakhai dâm, an naunuhmeihai dâm, an naupasalhai dâm, huphur an ta,

57 an pawm lai nautesen le an nau la pieng dinghai khawm chu inhnar an ta, iengkim an tlâksam ta leiin arûkin fâng an tih; an inhuolna cheu le an dang chêpna cheu, in hmêlmahaiin kul kawtkhâra an dang chêpna cheu leiin.

58 “Lalpa in Pathien hming ropuitak le ṭiumtak hi in ṭi theina dinga hi lekhabua chuong thil po po hi fîmkhurtaka in zâwm naw chun.

59 Lalpain nangni le in thlahai chungah hri maktak, hripui inlêng zing, natna rinumtak inlêng zing chi inlêngtir a tih.

60 In ṭi hle hlak Aigupta ram hrihai dâm kha in chungah inlêngtir nâwk a ta, hri chun chel tlat a ti cheu a.

61 Hi dân lekhabua chuonglo, natna le hri tinrêng khawm in bohmang hmakhat chun Lalpain in chungah inlêngtir a tih.

62 Vâna arasi zât hiel ni hlak kha tlâwmte bak hung ni tâng in ta, Lalpa in Pathien râwl chu in zâwm naw leiin.

63 A thaw ṭha ding cheu le a sukpung ding cheua Lalpa chu a thafân ang khan a sukbohmang ding cheu le a sukse ding cheuin Lalpa chu thafân a ta, in va hluo ding in va lûtna rama inthawk chun sawn hmang nîng in tih.

64 “Chun, Lalpa chun kâwlkila inthawka kâwlkil khing tieng chenin chi tin laia chun sukdar a ti cheu a, chutaka chun thing le lunga siem, in pi le puhai chena in hriet ngai naw pathien dang rawng bâwl in tih.

65 Chuong hnamhaia inthawk chun sâwldamna hrim hrim hmu naw ti niu a, in ke ta dingin châwlna hrim hrim um naw bawk a tih; chutaka chun Lalpain inthinna lungril dâm, mit châuna dâm, ngûina lungril dâm pe lem a ti cheu a,

66 in hringna chu ṭi dawr dawrin um zing zing a tih; sûn le zânah ṭi zing zingin um in ta, in hringna chun ngaimuong taka um ni nei naw nih.

67 Zîngtieng chun, ‘Zântieng ni ta sien aw,’ tîng in ta, zântieng chun, ‘Zîngtieng ni ta sien aw,’ tîng in tih; thil ṭium in lungrilin a ṭi ding le in mita in thil hmu ding lei chun.

68 ‘Hmu nâwk ta naw ti niu,’ in kuoma ka ti lampuia chun lawngin Aigupta ramah Lalpain ṭhuoi nâwk a ti cheu; chun, chutaka chun in hmêlmahai suokpa ni ding dâmin, suoknu ni ding dâmin inzawr in ta, tukhawmin an dit naw ding cheu a nih,” tiin.

Hmar OV (Re-edited) Bible (Millennium) - Pathien Lekhabu Inthieng 

Copyright © Bible Society of India, 2016.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ