DÂN PAHNINA 27 - Pathien Lekhabu Inthieng (BSI)

Ebal tlânga Dân inchik dinghai

¹ Chun, Mosie le Israel upahai chun mipuihai chu thu a pêk a, “Thupêk po po vawisûna ka pêk cheu hi pawm ro.

² Lalpa in Pathienin ram a pêk cheua fe dinga Jordan in kai ni chun lung lien tak tak phun in ta, lung chârnain in chârkhum ding a nih.

³ In kai hnung chun a chunga chun hi dân thu po po hi in ziek ding a nih; chuongchun, Lalpa, in pi le puhai Pathienin a lo tiem cheu ang khan nênetui le khuoizu luongna ram, Lalpa in Pathienin a pêk cheu rama chun fe thei in tih.

⁴ Jordan vadung in kai zo chun tlângah lunghai chu phun in ta, lung chârnain in chârkhum ding a nih.

⁵ Chutaka chun Lalpa in Pathien ta dingin maichâm, lung maichâm in siem ding a nih, thîr hmangruo chu in hmang ding a ni nawh.

⁶ Lalpa in Pathien maichâm chu lung sut lovin in siem ding a nih; chutaka chun Lalpa in Pathien ta dingin pumrawhmang thilinhlânhai dâm inhlân in ta; inremna thilinhlân dâmin inthâwi in tih;

⁷ chutaka chun fâng in ta, Lalpa in Pathien hmaa chun hlimtakin in um ding a nih.

⁸ Lung chunga dâm chun hi dân thu po pohai hi chiengtakin in ziek ding a nih,” tiin.

⁹ Chun, Mosie le thiempu Levi mihai chun Israel mi po pohai chu an biek a, “Aw Israel mihai, nguntakin lo ngai ta u, vawisûn hin Lalpa in Pathien mihai in hung ni ta a.

¹⁰ Chuleiin, Lalpa in Pathien thu chu in awi ding a nih; vawisûna thu ka ipêk cheua thupêkhai le dânhai chu in zâwm ding a nih,” tiin.

Ebal tlânga ṭawngsiehai

¹¹ Chu ni ma chun Mosiein mipuihai chu thu a pêk a,

¹² “Jordan vadung râl in kai hnung chun mipuihai mal sâwm dingin Gerizim tlângah hienghai hi an ngîr ding a nih: Simeon hnam le Levi hnamhai, Juda hnam le Issakar hnamhai, Josef hnam le Benjamin hnamhai.

¹³ Ṭawngsiea dingin hienghai hi Ebal tlângah an ngîr ding a nih; Reuben hnam dâm, Gad hnam dâm, Aser hnam dâm, Zebulun hnam dâm, Dan hnam dâm, Naphtali hnam dâm hi.

¹⁴ Chun, Levi mihai chun hang hril ṭan an ta, Israel mihai po po kuoma chun râwl inringtakin:

¹⁵ “‘Themthiemhai kutsuok Lalpa ta dinga tirdakum milim indin fâwm amanih, sung fâwm amanih kawltu taphawt chu ṭawngsephurin um raw se,’ tîng an ta, mipuihai po po chun, ‘Amen’ lo tîng an ta, an lo dawn ding a nih.

¹⁶ “‘A nu amanih, a pa amanih inza naw taphawt chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.

¹⁷ “‘A tuolbâwm ramri sawntu chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.

¹⁸ “‘Lampuia inthawka mitdel lampui nawa infetirtu chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.

¹⁹ “‘Ram dang mihai, pa nei naw hai, hmeithaihai ro indiknawtaka rêlpêktu chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.

²⁰ “‘A pa nuhmei zâlpuitu chu ṭawngsephurin um raw se, a pa dierkei hlîm a ni leiin,’ tîng an ta, mipui po po chun, ‘Amen’ an lo ti ding a nih.

²¹ “‘Tûkhawm ran hrim hrim rîmtu chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.

²² “‘A farnu, a pa naunu amanih, a nu naunu amanih zâlpuitu chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.

²³ “‘A tarpinu zâlpuitu chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.

²⁴ “ ‘A tuolbâwm arûka thattu chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.

²⁵ “‘Pawitâwklo thatna dinga thamna latu chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.

²⁶ “‘Hi dân thu pawm nghet lotu chu ṭawngsephurin um raw se,’ tîng an ta, mipui po po chun, ‘Amen’ an lo ti ding a nih.