DÂN PAHNINA 24 - Pathien Lekhabu Inthieng (BSI)

Inmâk thua dân siem

¹ “Miin nuhmei a nei a, a chunga thil mawilo ieng amanih a hriet leia a mit a tlung naw a, inmâkna lekha a ziekpêk a, a pêk a, a ina inthawka ân suoktir a,

² a ina inthawka a suok hnunga mi dang a va nei a,

³ a pasal nuhnung lem chun a theida a, inmâkna lekha a ziekpêk a, a pêk a, a ina inthawka ân suoktirin amanih, a pasal nuhnung lem nuhmeia neitu chu a thi amanih a ni chun,

⁴ a pasal hmasa ama infetirtu khan, sukpawrche tah a ni leiin nei nâwk thei ta naw ni; Lalpa ngaiin tirdakum a nih. Lalpain hluo dinga a pêk cheu rama chun suol in inlûttir ding a ni nawh.

Dân dang dang

⁵ “Chun, nuhmei nei hlim chu sipaiah a fe ding a ni naw a, ieng sin thaw ding khawma phût ding a ni nawh; a in tieng kum khat sûng chu a nuom ang angin um a ta, a nuhmei le chun hlimtakin an um ding a nih.

⁶ Bu râwtnawina amanih, a chungtieng lung amanih siekhamin tukhawm in hrênpêk ding a ni nawh, mi hringna hrênpêk a ni ding a ni si a.

⁷ “Tukhawm Israel mi, a unauhai laia mi inru a, sal sawisaka sawisa amanih, a zawra zawr amanih hriet suok a ni chun, chu inrupa chu sukhlum ding a nih; chuong ang chun nangni laia inthawkin chu thil ṭha naw chu in sukbo ding a nih.

⁸ “Phâr hri chungchâng thua chun, nguntaka dap suok a, thiempu Levi mihai inchûktir dân ang peia thaw dingin fîmkhur ro; anni thu ka pêk angin fîmkhurtakin in thaw ding a nih.

⁹ Aigupta rama inthawka in hung suokna lampuia Lalpa in Pathienin Miriam chunga a thaw kha hre zing ro.

¹⁰ “Iengkhawm in tuolbâwm in inpûktirin a thil siekham chu la dingin a inah in lût ding a ni nawh.

¹¹ Tuolah ngîr in ta, a pûktu chun a thil siekham chu tuola chun a hung lâkpêk ding cheu a nih.

¹² Mi rimsi a ni chun a thil siekham chu i riekpui ding a ni naw a,

¹³ a silfêna chun a zâl a, ân pâk theina ding cheuin a thil siekham chu nisa tlâkah in pêk kîr nâwk ngei ding a nih; chuongchun, Lalpa in Pathien ngaiin in ta dingin thil fel nîng a tih.

¹⁴ “In mi ruoi, mi rimsi le tlasamhai chu in unau amanih, in ram in umnaa um ram dang mi amani khawm ni sienla, in nêksâwr ding a ni nawh.

¹⁵ A thaw ni chun a hlaw chu in pêk ding a nih, nisain a tlâk nel ding a ni nawh; mi rimsi a na, chutaka chun a lungril a sie hlak a nih; chuong naw chun, in chungchâng thuah Lalpa ko a ta, in ta dingin suol hung ni râwi a tih.

¹⁶ “Nauhai leiin pahai chu sukhlum ding a ni naw a, pahai leiin nauhai khawm sukhlum ding a ni bawk nawh; mi tin mâni suol lei chaua sukhlum ding a nih.

¹⁷ Ram dang mihai le pa nei lohai ro chu indik nawtakin in rêlpêk ding a ni naw a, hmeithai puon chu banda dingin in lâkpêk ding a ni bawk nawh.

¹⁸ Nangni khawm Aiguptaa khan suok in ni ta a, Lalpa in Pathienin chutaka inthawk chu ân tlan cheu a nih ti in hriet zing ding a nih; chuong lei chun a nih hieng thil hi thaw dinga thu ka pêk cheu chu.

¹⁹ “In loa bu chu in sîk a, buphal chu in inkhâwm ṭhel chun in lâk nâwk ding a ni nawh, ram dang mihai dâm, pa nei lohai dâm, hmeithaihai ta ding a nih; chuongchun, Lalpa in Pathien chun in kutsuok po poah mal a sâwm ding cheu a nih.

²⁰ “In oliv thing chu in vuokin a kâuhai chu in vuok nawn ding a ni nawh; ram dang mihai, pa nei lohai, hmeithaihai ta ding a nih.

²¹ In grêp huona mi in lo pha chun a hnung in zawng ding a ni nawh; ram dang mihai, pa nei lohai, hmeithaihai ta ding a nih.

²² Chun, Aigupta rama khan suok in ni tah ti in hriet zing ding a nih; chuong lei chun a nih, hieng thil hi thaw dinga thu ka pêk cheu chu.