DÂN PAHNINA 20 - Pathien Lekhabu Inthieng (BSI)

Indo thua dân siemhai

¹ “In hmêlmahai do dinga in suoka sakawrhai le tawlailîrhai dâm, mipuihai dâm, nangni nêka tam in hmuin, anni chu in ṭi ding a ni nawh; Aigupta rama inthawka ṭhuoi suoktu cheu Lalpa in Pathien chu in kuomah a um si a.

² Chun, in indo ding hnai chun thiempu chun mipuihai chu va pan sienla, be sienla,

³ an kuomah, ‘Aw Israel mihai, hre ro khai, tuhin chu in hmêlmahai in do ding a ni ta a, zâm naw unla, ṭi naw unla, inthin bawk naw ro, anni chu ṭi dêr naw ro;

⁴ nangni sandam ding cheu le, in hmêlmahai thawpêk ding cheuin in kuoma um pei chu Lalpa in Pathien a ni si a,’ ti raw se.

⁵ Chun, hotuhai chun mipuihai kuomah, ‘In thar bâwla lân hlân lo in um am? A inah kîr nâwk el raw se, indonaa chun thi hlau a ta, mi dangin inhlân rawi an tih.

⁶ Grêp huon siema a ra la sawr lo in um am? A in tieng kîr nâwk el raw se; indonaah thi hlau a ta, mi dangin sawr râwi an tih.

⁷ Nuhmei huola la neilo in um am? A in tieng kîr nâwk el raw se, indonaah thi hlau a ta, mi dangin nei râwi an tih,’ ti raw hai se.

⁸ Hotuhai chun mipuihai kuoma chun, ‘Ṭi le zâm in um am? A in tieng kîr el raw se, a unauhai lungril chu ama lungril ang chun intuihmang ve râwi a tih,’ la ti pei raw se.

⁹ Chun, hotuhaiin mihai kuoma thu an hril zo chun mipuihai hmaṭhuoitu ding sipai hotuhai an ruot ding a nih.

¹⁰ “Thaw dinga khuo in va hnai pha chun inremna thu hang hril phawt unla.

¹¹ An lo inrempui cheu a, an lo inpêk el chun chutaka mi umhai po po chu sinthawa in ruoi ding nîng an ta, in rawng bâwl an tih.

¹² An lo inrempui nuom naw cheu a, an lo do cheu ruok chun inhuol in ta;

¹³ Lalpa in Pathienin in kuta a pêk pha cheu chun chutaka pasal po po chu kâwlhnâmin in sukhlum vawng ding a nih.

¹⁴ Nuhmei le an nauhai, ranhai le khuoa thil um hrim hrim hai ruok chu chutaka râllâk thilhaiah in chanpuol dingin lâng in tih; chun, Lalpa in Pathienin a pêk cheu in hmêlmahaia inthawka râllâk thilhai chu neiin sawr in tih.

¹⁵ “Hi laia hnamhai khuohai ni lo, in umnaa inthawka khaw hlahai po po chu chuong ang chun in thaw pei ding a nih.

¹⁶ Lalpa in Pathienin hluo dinga a pêk cheu laia hnamhai khuohaia ruok hin chu hring taphawt chu iengkhawm in hla ding a ni naw a,

¹⁷ Hit mihai, Amor mihai, Kanaan mihai, Periz mihai, Hiv mihai, Jebus mihai dâm chu Lalpa in Pathienin thu a pêk cheu angin in sukbohmang vawng ding a nih;

¹⁸ an pathienhai chunga an thaw hlak thil tirdakumhai po po chu an inchûktir nawna ding cheuin; chuong naw chun Lalpa in Pathien chungah thil suksuol râwi in tih.

¹⁹ “Lâk tuma in thaw khuo chu sâwttak in inhuol khawmin chuong laia thinghai chu hreipuiin in phûr ding a ni nawh. A rahai chu fa thei in ta, in phûr ding a ni nawh. Loa thinghai chu mihriem am an ni, in inhuol ding chu?

²⁰ A ra fâk naw mi a nih ti in hriet thing ruok chu suksein phûr in ta, a dotuhai cheu khuo chu a siet hmakhat chu kulin in inhuon khum ding a nih.