DÂN PAHNINA 19 - Pathien Lekhabu Inthieng (BSI)

Insanhimna khawpui, ramri hluihai

¹ “Lalpa in Pathienin an ram a pêk cheu hnam Lalpain a sukboa, in hluo a, an khuohaia dâm, an inhaia dâm in um pha chun,

² Lalpa in Pathienin hluo dinga a pêk cheu rama chun khuo pathum in ruot ding a nih.

³ Tuolthat taphawt an tlânlûtna dingin, Lalpain ân hluotir ding cheu ram chu hmun thumah ṭhêng in ta, in ramrihai siem in ta, lampuihai in buotsai ding a nih.

⁴ Tuolthathai chutaka tlânlûta him theihai chu hienghai hi an nih; mîn a tuolbâwm kha hmaa theidâna khawm nei chuong lova that paltu hai,

⁵ mi a tuolbâwm leh thing phûr dinga rama fea thing phûr dinga hrei a hang inlet a, hreipui tlawngin a tuolbâwm chu dênghlum el ta ang sien, chu mi chu chuong khuohai laia pakhata chun tlânlût a ta, him a tih;

⁶ chuong naw chun, thisen phuba latu chun a lungsen nasat zuol laiin tuolthattu chu hnawt a ta, lampui kâr a hla vieu chun a tlung hmain hnawtphâk a ta, thina khawp a ni naw sa khawmin thi hlau rawi a tih, a hmain intheidâna nei a ni si naw a.

⁷ Chuleiin, ‘Khuo pathum in ta dingin in ruot ding a nih,’ tiin thu ka pêk cheu a nih.

⁸ “Chun, Lalpa in Pathienin in pi le puhai kuoma ṭawng a lo inkhâm anga in pi le puhai pêk a lo tiem ram chu a pêk cheu a,

⁹ Lalpa in Pathien chu hmangai ding le a lampui hraw rawp dinga a thupêk po po, tuta thu ka pêk cheu hi in pawm a, in ram chu a suklien chun khuo pathum bâka hin in ta dingin khuo pathum dang belsa nâwk in tih;

¹⁰ Lalpain hluo dinga a pêk cheu in ram sûnga pawitâwklo thisen insuo a um naw a, in chunga thisen a um nawna dingin.

¹¹ Amiruokchu, miin a tuolbâwm chu a theida a, ân chân a, a thaw a, thi khawp raka a vuok a, chu khuo laia pakhata chun a tlân chun,

¹² an khuo upahaiin mi tir sienla, chutaka inthawk chun va ṭhuoi hai sienla, sukhlum dingin thisen phuba latu kutah inhlân raw se.

¹³ In lunginsiet ding a ni naw a, in ta dinga ṭha dingin Israel rama inthawka pawitâwklo thisen insuona chu in sukbo ding a nih.

¹⁴ “Lalpa in Pathienin in hluo dinga a pêk cheu ram, in hluo ding rama a hmaa an lo phun tah in inripui in tuolbâwm ramri chu in sawn ding a ni nawh.

Hrepuitu chungchânga dân siem chu

¹⁵ “Mi a rîtlona amanih, a suolna hrim hrim amanih hretu pakhat chau chu huntâwk naw nih; hretu pahni bâu amanih, hretu pathum bâu amania sukdet ding a nih.

¹⁶ Hretu rilotakin thil indiknaw thawa mi ân tum chun,

¹⁷ an inkhingnaah an pahni chun Lalpa hmaah chu huna thiempuhai le rorêltuhai hmaa chun an ngîr ding a nih.

¹⁸ Rorêltuhai chun nguntakin dap an ta; thuhretu chu hretu tehlêm a ni a, a unau chu khêla intum a nih ti hriet suok a ni chun,

¹⁹ a unau chunga thaw a lo tum ang chun a chungah in thaw ding a nih; chuong ang chun nangni laia thil ṭha naw chu in sukbo ding a nih.

²⁰ Mi danghai chun hrieng an ta, ṭîng an ta, tuta hnung chuong ang thil ṭha naw hrim hrim chu nangni lai an thaw ta naw ding a nih.

²¹ In lunginsiet ding a ni naw a, hringna aiah hringna, mit aiah mit, ha aiah ha, kut aiah kut, ke aiah ke nîng a tih.