DANIEL 6 - Pathien Lekhabu Inthieng (BSI)

Sakeibaknei pûka Daniel chanchin

¹ Daria chun, ram sûng po poa chun biel awptu za sâwmhni sie ding ti le

² an chunga chun hotu pathum, a pakhat chu Daniel chu ni dingin ti chu ṭha a ti a; chun, hieng biel awptuhai hin anni kuoma chun sum sêng dân chanchin chu pêng an ta; chuongchun, lal chun sietna a tuok nawna dingin.

³ Chun, hi Daniel hi amaa chun lungvar ṭha bîk a um leiin biel awptuhai le an hotuhai nêk chun a danglam bîk rieu a; chuongchun, lal chun a ram po po chunga hotua siem a lungril a.

⁴ Chun, hotuhai le biel awptuhai chun ram chungthuah Daniel chunga chun remchâng an zawng ta a; nisienlakhawm, ama chu ring a um a, amaa chun indiknawna le suksuolna hrim hmu a ni naw leiin a suksuolna le hêkna remchâng chu an hmu thei dêr naw a.

⁵ Chun, chuong mihai chun, “A Pathien dân chung thuah ama kalna ei hmu ti ngawt naw chu, Daniel chunga hin remchâng ei hmu thei ngai âwm nawh,” an ta.

⁶ Chun, hieng hotuhai le biel awptuhai hi lal kuoma chun an hung inkhâwm a, a kuomah, “Lal Daria, kumkhuoin dam rawh.

⁷ Hi rama hotuhai, ram awptuhai, biel awptuhai, sipai hotuhai le rorêltuhai po po kan inkhâwm a, aw lalpa, ni sâwmthum sûng chu nangma kuoma chau naw chu tukhawmin mi dang amanih, pathien amani kuoma hnina a siem hrim hrim chu, ama chu sakeibakneihai pûka pei lût ni raw se tia dân dettak siem dingin kan inbiekthlûk tah a nih.

⁸ Tuhin, aw lalpa, chu dân chu sukdet la, Media le Persia mihai dâna sukdanglam a ni nâwk nawna dingin i hming ziek rawh,” an ta.

⁹ Chuongchun, lal Daria chun chu lekhaziek le thupêka chun a hming a ziek ta a.

¹⁰ Daniel chun chu lekhazieka chun hming ziek a ni tah ti a hriet phingleh a inah a fe ta a; (a pindana a tukverhai chu Jerusalem khuo tienga hawng zing a na) chun, a khûpin ni khatah vawi thum pei a dingṭhaṭhuon a, a Pathien hmaa chun, a hmaa a lo thaw rawp tah angin a ṭawngṭai a, lâwmthu a hril ta a.

¹¹ Chun, chuong mihai chu an in- khâwm a, Daniel chu a Pathien hmaa hnina siema ṭawngṭaiin an hmu ta a.

¹² Chun, an hung hnai a, lal hmaa chun lal thupêk chungchang thu chu an hril ta a; “Aw lalpa, nangma kuomah ti chau lo chu, ni sâwmthum sûng mi tukhawmin mi dang amani, pathien kuoma mani hnina siem chu sakeibakneihai pûka pei lût ding ti thupêka khan i hming i ziek an nâwm a nih?” an ta. Lal chun a dawn a, “Media mihai le Persia mihai dân sukdanglam thieng lo ang tak chun chu chu ân dik a nih,” a ta.

¹³ Chun, an dawn a, lal kuoma chun, “Kha Daniel Juda ram mi salintângpa khan, aw lalpa, nang a pawisa naw che a, i thupêk i hming ziek khawm kha a pawisa naw a, ni tin hnina vawi thum a siem zie a nih,” an ta.

¹⁴ Chun, lal chun hieng thu hi a hriet phingleh nasatakin a lungni ta naw a, Daniel chu sansuok dingin a lungril chu a fu ta tlat a; nisa tlâk hmakhat chun sansuok thei dan ding nasatakin a ngaituo a.

¹⁵ Chun, chuong mihai chu lal kuomah an hung inkhâwm a, lal kuoma chun, “Aw lalpa, thupêk amanih, dân amanih lalin a siem ta chu sukdanglam thieng lo a nih ti hi Media le Persia mihai dân a nih ti hi hre rawh,” an ta.

¹⁶ Chun, lal chun thu a pêk a, Daniel chu an hung ṭhuoi a, sakeibakneihai pûka chun an pei lût ta a. Lal chun a hril a, Daniel kuoma chun, “I Pathien a rawng i bâwl zing hlak chun sansuok a ti che, ” a ta.

¹⁷ Chun, lung chu an hung lâk a, a pûk baua chun an indel tah a; chuongchun, lal chun ama hming namna le a rorêltuhai hming namna chu Daniel chungchâng thua chun thil sukdanglam hrim hrim um lo dingin a nam ta a.

¹⁸ Chun, lal chu a lal ina chun a fe a, chu zân chu bungheiin a hmang zo tah a; a hmaa chun thil rimawihai hung lâkin a um ta naw a, a imu chu amaa inthawkin a zâm hmang ta a.

¹⁹ Chun, lal chu zîngkâr inhmatakin a tho a, sakeibakneihai pûka chun inhmatakin a va fe ta a.

²⁰ Daniel kuomah, sakeibakneihai pûk kâwl chu a hung tlung hnai chun, ṭap râwlin a khêk a; lal chun Daniel kuoma chun, “Aw Daniel, Pathien hring siehlawpa, i Pathien a rawng i bâwl zing zing hlak chun sakeibakneihaia inthawkin a sansuok thei che am a nih?” a ta.

²¹ Daniel chun lal kuoma chun, “Aw lalpa, kumkhuoin dam rawh.

²² Ka Pathien chun a vântirko a hungtir a, sakeibakneihai bau chu a hung sukchîp a, an mi sukna hrim hrim nawh; a hmaa chun keimaa indik nawna um lo chu hmuin a um a; aw lalpa nanga hmaa khawm iengkhawm ka sukpawi nawh,” a ta.

²³ Chun, lal chu nasatakin a lâwm tah a, Daniel chu pûka inthawka la suok ding chun anni chu thu a pêk tah a, chuongchun, Daniel chu pûka inthawk chu lâk suokin a um a, ama chun Pathien chu a ring tlat leiin amaa chun suknatna iengkhawm hmuin a um naw a.

²⁴ Chun, lal chun thu a pêk a, chuong Daniel hêktuhai chu an hung ṭhuoi a; anni leh, an nauhai leh, an nuhmeihai le chun sakeibakneihai pûka chun an pei tah a; anni chu sakeibakneihai chun an lo thaw tah a, an ruhai chu a nawi nawiin an suktliek vawng a, pûk ṭuong chu an tlung hman naw hiel lem a nih.

²⁵ Chun, lal Daria chun hnuoi chung po poa chêng mi po po le ṭawng tinrênghai kuoma chun lekha a ziek tah a, “In kuomah inremna sukpungin um raw se.

²⁶ Thupêk chu ka siem a; ka ram leilunga mi po pohai chun Daniel Pathien chu ṭiin a hmaa chun inthin raw hai se. Ama chu Pathien hring, chatuona pângngai zing a ni si a, A ram khawm chu suksiet ni ngai naw ni a, A rorêlna chu chatuonin um zing lem a tih.

²⁷ Ama chun a sansuokin a sanhim a, Hnuoi le vâna khawm thilmakhai le inchiknahai a thaw a, Ama chu sakeibakneihai thilthawtheinaa inthawka Daniel sanhimtu chu a nih,” tiin.

²⁸ Chuongchun, Daniel chu Daria rorêl sûng le Persia mi Kura rorêl sûng po chu a hung hlawtling ta hle a.