AMOS 9 - Pathien Lekhabu Inthieng (BSI)

Pumpel thei dêrlo Lalpa rorêlnahai chu

¹ Maichâm bula ngîrin Lalpa chu ka hmu a, chun, ama chun, “Kawtkhâr bulhai an inhnîng theina dingin a sîp bâwkhai chu vaw la, an rênga lu chungah suknâwi vawng rawh; chun, a thi mahlahai chu kâwlhnâmin that ka ta, pakhat khawm tlân hmang naw ni hai a, pakhat khawma pumpel naw bawk an tih.

² Mithi khuo chenin cho tlang hai sien khawm, chutaka inthawk chun ka kutin la suok ka ta, vânah lâwn hai sien khawm, chutaka inthawk chun hnûk thlâng ka tih.

³ Karmel tlâng sîpah inbihmang hai sien khawm, zawng suok ka ta, chutaka inthawk chun anni chu la thlâng ka tih; chun, tuisuoriet mawngah ka mithmu nawah inbihmang hai sien khawm, chutaka rûl chu thu pêng ka ta, anni chu chuk a tih.

⁴ An hmêlmahai hmaah salah fe hai sien khawm, chutaka kâwlhnâm chu thu pêng ka ta, anni chu sât hlum a tih, ṭhatna ni lovin, ṭhat nawna dingin an chungah ka mit infûktir ka tih,”

⁵ Ram chu tâwk a, suktuiraltu chu Lalpa, sipaihai Pathien chu a ni si a; chun, chutaka um po pohai chu lungngai an tih; chun, Vadung angin hung lien a ta, Aigupta Vadung angin kang nâwk a tih;

⁶ vâna a pindanhai siem a, hnuoi chunga pindan inkuol siem a, tuisuoriet tuihai ko a, hnuoi chunga bunthlatu, a hming chu Lalpa a nih.

⁷ Lalpa chun, “Aw Israel nauhai, ka chungah Ethiopia nauhai angin in um naw am a nih? Aigupta rama inthawka Israel le Kaphtor rama inthawk Philistin mihai le Kir rama inthawka Suria mihai ka ṭhuoi suok nâwm a nih?

⁸ Ngai ta u, Lalpa Pathien mit chu ram suol chungah a fu a; chun, hnuoi chunga inthawkin sukbo ka ta; amiruokchu, Jakob sûngkuohai chu sukse vawng naw ning,” a ta.

⁹ “Ngai ta u, thu ka pêk ding a ni si a, chun, sihria bu an rel angin, Israel sûngkuohai chu hnam po po lai chun rel ka tih; nisienlakhawm, a mal chîn tak khawm hnuoi chungah tla naw ni.

¹⁰ Ka mihai mi suol po po, ‘Sietna chun mi hnawt phâk naw ni a, mi nang bawk naw ni,’ tihai chu kâwlhnâmin thîng an tih.

Israel tungding nâwk ding thu

¹¹ “Chu nia chun David bâwktê chim chu inngîr ka ta, a âwnghai chu phâwk ka ta, a sietnahai chu rem nâwk ka ta; tienlaia a um ang khan bâwl ka tih,

¹² Edom hmuna la umhai le ka hminga ko hnam po po hai chu an nei theina dingin,” Lalpa hi thil thawtu hin a tih.

¹³ Lalpa chun, “Ngai ta u, nihai chu a hung tlung a ni tah, chuong nihaia chun hnuoi inlettu chun bu âttu chu hnawt phâk a ta, grêp chîltu chun chi thetu chu la hnawt phâk a ta; tlâng insâng chun uoin thlum infartir a ta, tlâng po po chu intui an tih.

¹⁴ Chun, ka mi Israelhai chu sala inthawkin ṭhuoi kîr nâwk ka ta; khaw ṭâwphai chu siem nâwk an ta, hluong an tih; chun, grêp huonhai siem an ta, a uoin dâwn an tih; huonhai khawm siem an ta, a ra chu fâng an tih.

¹⁵ An ramah anni chu phun ka ta, an kuoma ka pêk an rama inthawk phawidawkin um nâwk ta naw ni hai,” Lalpa i Pathien chun a tih.