AMOS 4 - Pathien Lekhabu Inthieng (BSI)

¹ Nangni Basan hmun sebâwngpui, Samari tlâng chunga um, rimsihai nêksâwr a, tlasamhai nêk a, an lalhai kuomah, “Hung la unla, dâwn ei tiu,” tituhai, hi thu hi lo hre ro.

² Lalpa Pathien chun ama inthiengna sâlin ṭawng ân khâm a: “Ngai ta u, thîrkuoiin a lâk hmang cheu a, nangni laia a la um sun ngakuoia a lâk hmang ni cheu a hung tlung ding a nih.

³ Chun, bang âwngahai fe suok in ta, mi tin chu tlûntakin fêng an tih, Harmon hmuna chun inpeihâwn in tih,” Lalpa chun a tih.

Pathien hremnaa inthawka hlâwkna Israelin a lo hmu ṭhelzie

⁴ “Bethela chun hung unla, bawse ro, Gilgala chun hung unla, bawsietna chu sukpung ro; chun, in inthâwinahai chu tûk tin hung la unla, in sâwma pakhathai chu ni thum dan peiah hung la ro,

⁵ chawl ṭhang lâwmthu hrilna inthâwina chu inhlân unla, mâni nuomzâwnga inhlânhai chu hril unla, puong ro; Aw Israel nauhai, hi hi in nuom sih a,” Lalpa Pathien chun a tih.

⁶ “Chun, kei khawma in khawpui po pohaia ha faina le in hmun po pohaia tlâksamna ka pêk cheu a, chuong sa khawm chun ka kuomah in hung kîr naw a,” Lalpa chun a tih.

⁷ “Chun, bu sîk hun ding thla thum a la ni laiin in chunga ruo sûr ding khawm ka chel a, khawpui pakhat chungah kân sûrtir a, khawpui dang chungah kân sûrtir naw a; hmun khat chungah a sûr hlak a, a sûr nawna hmun chu a ṭâwl hlak.

⁸ Chuongchun, khawpui pahni amanih, pathum amani chu khawpui pakhatah tui dâwn dingin an invâk a, an khawp naw a, chuong sa khawm chun ka kuomah an hung kîr nawh,” Lalpa chun a tih.

⁹ “Ṭâwlna le apnain ka hrem cheu a, in huonhai, in grêp huonhai, in theichang kûnghai, in oliv thinghai zozai chu thingnge tuktulung chun a fâk zo vawng tah a nih; chuong khawm chun ka kuomah in hung kîr nawh,” Lalpain a tih.

¹⁰ “Aigupta ram angin nangni lai hripui ka tir a, kâwlhnâmin in tlangvâlhai chu ka that ta a, in sakawrhai ka ṭhuoi hmang tah a nih; chun, in sipai hmun rimsie chu hnâra innam khawpin kân umtir a, chuong khawm chun ka kuomah in hung kîr nawh,” Lalpa chun a tih.

¹¹ “Sodom le Gomorra khuo chu Pathienin a sukchim lai angin nangni lai mi ṭhenkhat ka sukchim a, thing kâng ût lâk suok ang in na; chuong khawm chun ka kuomah in hung kîr nawh,” Lalpa chun a tih.

¹² “Chuleiin, aw Israel, i chungah hieng ang hin ka thaw ding a nih; i chungah hi hi ka thaw ding a ni leiin, aw Israel, i Pathien chu tuok dingin insiem zo rawh”.

¹³ Ngai ta, tlânghai inngîr suok a, thli siem a, mihriem kuoma chun a ngaituona chu ieng am a na ti hrilsuokpêk a, zîngkâr chu sukthim a, hnuoi hmun insâng sirtu chu a hming Lalpa, sipaihai Pathien chu a ni si a.