2 LALHAI 25 - Pathien Lekhabu Inthieng (BSI)

Jerusalem tlûk thu

¹ Chun, ân lal kum kuo kum, thla sâwmna, ni sâwm ni takin Babulon lal Nebukadnezzar chun a sipaihai po po leh Jerusalem khuo chu an hang do a, umhmun an hang khuor a; chun, kulin an inhuol vêl ta a.

² Chuongchun, lal Zedekia inlal kum sâwm le kum khatna chenin khuo chu an inhuol a.

³ Thla lina, ni kuo ni chun khuo chu an ṭâm ta êm êm el a, chutaka mihai ta ding chun fâk ding hrim hrim a um ta naw a.

⁴ Chun, khawpui kul chu a sukâwng a; chuongchun, zânah indo mi po po chu lal huon bul, kul bang pahni inkâra kul kawtkhârah an tlânse ta vawng a: (Kaldaihai chun khuo chu an inhuol vêl a nih:) chun, lal chu Araba lampui tieng a fe a.

⁵ Nisienlakhawm, Kaldai sipaihai chun lal chu an hnawt a, Jeriko phaiah an hnawt phâk a; a sipaihai po po chun an tlândarsan ta vawng a.

⁶ Chuongchun, lal chu an man a, Babulon lal kuomah Ribla khuoah an ṭhuoi a; chun, a chungchâng an rêl a.

⁷ Chun, Zedekia naupasalhai chu a mithmu ngeiah an that a, Zedekia mithai chu an khel dawk a, kawl an inbun a, Babulonah an fepui ta a.

Temple suksiet thu

⁸ Chuongchun, Babulon lal, lal Nebukadnezzar inlal kum sâwm le kum kuona, thla ngana, ni sari ni chun Babulon lal mi, vêngtu pâwl hotu Nebuzar-adan chu Jerusalemah a lût a;

⁹ Lalpa in le lal in chu a raw a; Jerusalem in po po, in ropui taktakhai chu a raw a.

¹⁰ Chun, vêngtu pâwl hotu kuoma um Kaldai sipaihai po po chun Jerusalem vêla kul chu an sukchim vawng a.

¹¹ Chun, khawpui sûnga mi la um, inpehai, mipui la umhai chu vêngtu pâwl hotu Nebuzar-adan chun salah a ṭhuoi vawng a.

¹² Chu rama pasie siehai ruok chu vêngtu pâwl hotu chun grêphrui enkawltu ding le lo neitu dingin a mâksan a.

¹³ Lalpa ina dâr banhai le, Lalpa ina inṭhutna le dâr tuizêng chu Kaldaihai chun an sukkawi vawng a, a dârhai chu Babulon tieng an fepui a.

¹⁴ Chun, bêlhai dâm, vutluohai dâm, khâwnvar enkawlna thilhai dâm, haihâwhai le dâr bûr le bêlhai po po, rawngbâwlna dinga an hmanghai chu an lâk a.

¹⁵ Chun, meilâknahai le maihûnhai le chun, vêngtu pâwl hotu chun rângkachaka siemhai chu a rângkachak chu a lâk a, tangkaruoa siemhai chu a tangkaruo chu a lâk a.

¹⁶ Solomonin Lalpa in dinga a siem ban pahni le dâr tuizêng le inṭhutnahai chu; chuong hmangruohai po poa dâr bûk zât chu hriet ruol a ni nawh.

¹⁷ Ban pakhat insâng tieng chu tawng sâwm le tawng riet a na, a sîpa chun dâr sungbâwk a um a; chu bâwk insâng tieng chu tawng thum a nih; a bâwk vêla chun ṭiel chikchek le theibufai lim a chuong a, dâr vawng a nih; chuong ang bawk chun ban pakhat khawm chu ṭiel chikchek a nih.

Juda mipui Babulona ṭhuoia an um thu

¹⁸ Chun, vêngtu pâwl hotu chun thiempu lal Seraia le a dawttu Ze-phania le kawtkhâr vêngtu pathum a man a,

¹⁹ chun, indo mihai chunga hotu pakhat leh, lal hmêl hmu phâk hlak, khawpui sûnga la um panga leh, mipuihai hming ziektu sipai hotu lekhaziektu leh, khawpui sûnga la um chu rama mi sâwmruk leh khawpui sûnga chun a man bawk a.

²⁰ Chun, vêngtu pâwl hotu Nebuzaradan chun a ṭhuoi a, Babulon lal kuomah, Ribla khuoa chun a fepui a,

²¹ Chun, Babulon lal chun Hamath ram, Ribla khuoa chun a lo sukhlum a. Chuongchun, Juda chu a ram sûnga inthawka sala ṭhuoi suokin a lo um ta a.

Gedalia, Juda lal

²² Chun, Babulon lal Nebukadnezzar chun Judai rama mâksana umhai khawm chu an chunga chun Saphan naupa Ahikam naupa Gedalia chu awptu dingin a siem a.

²³ Chuongchun, sipai pâwl hotuhai po po le an rawihaiin Babulon lalin Gedalia chu awptu dingin a siem ti an hriet chun Mizpa khuoah Gedalia kuomah an fe a; chuonghai chu Nethania naupa Ismael hai, Karea naupa Johanan hai, Netophath mi Tanhumeth naupa Seraia hai, Maaka mi naupa Jaazania hai, an rawihai leh an nih.

²⁴ Chun, Gedalia chun chuonghai le, an rawihai kuoma chun ṭawng ân khâm a, an kuomah, “Kaldaihai siehlawa um hi ṭi naw ro; hi rama hin um zing el unla, Babulon lal thu hnuoiah um ro, chuongchun, in ta dingin ṭhâng a tih,” a ta.

²⁵ Nisienlakhawm, thla sarinaa chun lal thla, Elisama naupa, Nethania naupa Ismael chu mi sâwm ṭhuoiin a fe a, Gedalia chu Mizpa khuoah Judahai le Kaldaihai a kuoma umhai le chun an thaw a, an that ta vawng a.

²⁶ Chuongchun, mi po po a chîn a lienin sipai hotuhai leh an suok a; Aigupta ramah an fe ta a, Kaldaihai chu an ṭi a nih.

Jehoiakin insuoha a um thu le Babulona chawimawia a um

²⁷ Chun, Juda lal Jehoiakin sala ân tâng kum sâwmthum le kum sarina, thla sâwm le thla hnina, ni sâwmhni le ni sari niin Babulon lal Evil-merodakin ân lal ṭan kumin Juda lal Jehoiakin chu intângna ina inthawkin a ṭhuoi suok a,

²⁸ a kuomah ṭhatakin thu a hril a, Babulona lalruol um vehai lalṭhungpha chunga chun a lalṭhungpha chu a sie sâng ta bîk a.

²⁹ Ân tângna in silfênhai chu a thleng a, a dam sûng po chun a kuomah thlaithlêng a awt ve ta rawp a.

³⁰ Chuongchun, a châwmna dingin a hmu tâwk dingin lalin ni tin, a dam sûng po po chun chanvo a siempêk ta zing a.