2 LALHAI 24 - Pathien Lekhabu Inthieng (BSI)

¹ Ân lal lai chun Babulon lal Nebukadnezzar a hung lien a, Jehoiakim chu a siehlawah kum thum a um a; chu hnunga chun a nghatsan a, a chungah a hel ta a.

² Chun, Lalpain Kaldai pâwlhai, Suria pâwlhai, Moab pâwlhai, Ammon thla pâwlhai ama thaw dingin a tir suok ta a; a siehlaw zâwlneihai hmanga a hril Lalpa thu anga Juda ram chu insuksiettir dingin.

³ A hmu phâk nawa sawn ding thu chu Lalpa thuin Juda ram chungah a hung tlung ta ngei a. Manasse suolnahai le a thilthaw po po le,

⁴ pawitâwklo thisen an suo a, Jerusalem chu pawitâwklo thisena a suksip leiin, Lalpain a ngaidam nuom naw a nih.

⁵ Chuongchun, Jehoiakim chan-chin danghai le a thilthaw po po chu Juda lalhai inlal lai chanchin ziekna bua chun a chuong a ni naw am a nih?

⁶ Chuongchun, Jehoiakim chu a pi le puhai kuomah a in a, chun, a naupa Jehoiakin chu ama aiawiin ân lal ta a.

⁷ Chun, Aigupta lal chu a rama inthawkin a hung suok nâwk ta naw a; Babulon lal chun Aigupta ram vadungtêa inthawka Euphrates vadung chena Aigupta lal ram huop po po a lâk ta si a.

Jehoiakin le a mi lienhai Babulon sala ṭhuoia an um thu

⁸ Jehoiakin chu ân lal ṭantirin kum sâwm le kum riet a na, Jerusalema chun thla thum ân lal a; a nu hming chu Nehusta, Jerusalema Elnathan naunu a nih.

⁹ Chun, a pa thaw dân ang po po thawin, Lalpa mithmua thil ṭha nawtak a thaw hlak a.

¹⁰ Chuong lai chun Babulon lal Nebukadnezzar mihai chu Jerusalema chun an hang fe a, khuo chu an hang inhuol ta a.

¹¹ Chun, chuonga a mihaiin an inhuol lai chun Babulon lal Nebukadnezzar chu khuoa chun a hang fe a;

¹² chuongchun, Juda lal Jehoiakin chu a nu hai dâm, a mihai dâm, a milienhai dâm, a upahai le chun Babulon lal kuomah an va suok a, chun, ân lal kum riet kumin Babulon lal chun a man ta a.

¹³ Chun, Lalpa hril ang khan, Lalpa ina ro po po le lal ina ro po po chu a lâk suok a, Lalpa biek ina Israel lal Solomonin rângkachak bûr le bêl a siemhai po po chu a sâtnawi vawng a.

¹⁴ Chun, Jerusalema mi po po, mi lien po pohai, mi hrât huoisen ṭha po pohai dâm, sing khat zet, themthiem le thirsu po po salah a ṭhuoi vawng a; chu rama mi a pasie sie ti lo chu tukhawm an um ta naw a.

¹⁵ Chun, Jehoiakin chu Babulonah a ṭhuoi a; chun, lal nu hai, lal nuhmei hai, a upahai dâm, chu rama mihrâthai chu Jerusalema inthawkin Babulonah salah a ṭhuoi a.

¹⁶ Chun, Babulon lal chun pasalṭha po po sâng sari zet le, themthiem le thirsu sâng khat, mi hrât ṭha indo thei mi ṭhieu chu Babulonah salah a ṭhuoi vawng a.

¹⁷ Chun, a pa unau Mattania chu Babulon lal chun ama aiin ân laltir a, a hming chu Zedekia tiin a thlengpêk a.

Zedekia inlal thu

¹⁸ Zedekia chu ân lal ṭantirin kum sâwmhni le kum khat a na, Jerusalemah kum sâwm le kum khat ân lal a, a nu hming chu Hamutal, Libna khuoa Jeremia naunu a nih.

¹⁹ Chun, Jehoiakim thaw dân ang po po thawin Lalpa mithmua thil ṭha nawtak a thaw hlak a.

²⁰ Lalpa lunginsenna leia a hmu phâk nawa a hnawthmang dai chenin Jerusalem le Juda chungah thil a hung tlung pei a nih; chun, Zedekia chu Babulon lal chunga chun a hel ta a.