2 LALHAI 23 - Pathien Lekhabu Inthieng (BSI)

Josia thil siemṭhathai

¹ Chun, lal chun mi a tir a, Judai ram le Jerusalema upahai po po a kuomah an ko khâwm ṭeu a.

² Chun, lal chu Judai rama mi po po leh, Jerusalem khuoa mi po po leh, thiempuhai le zâwlneihai leh, mipuihai po po le chun, a chîn a lienin Lalpa ina chun an hang fe a; chun Lalpa ina an lekhabu hmua thuthlung bua chuong po po chu an na hrieta chun a tiem a.

³ Chun, lal chu ban hrûlah a ngîr a, chu lekhabua chuong thuthlung thu chu sukdet dingin lungril po po le thlarau po poa Lalpa zui ding le a thupêkhai, a thu inhriettirhai, a thuruothai pawm dingin Lalpa hmaa chun thu a thlung a;

⁴ chun, mipui po po khawm chun an thlungpui a. Chun, lalin thiempu laltak Hilkia hai, a dawttu thiempu hai, kawtkhâr vêngtuhai chu Lalpa biek in sûnga Baal le Asera le, vâna thil umhai po po ta dinga siem bûr le bêlhai po po chu la suok vawng dingin thu a pêk a; chuongchun, Jerusalem puotieng Kidron phûlah a raw a, a vâmhai chu Bethelah a fepui a.

⁵ Chun, milim betuhai thiempuhai, Juda lalhaiin Judai ram khawpui bâwlhmunahai, Jerusalem vêla riminhnik raw dinga an lo ruothai khawm chu ân bântir a; Baal ta ding dâm, nisa ta ding dâm, thla ta ding dâm, arasi ta ding dâm, vâna umhai po po ta dinga riminhnik rawtuhai khawm chu.

⁶ Chun, Lalpa ina Asera chu Jerusalem puotieng, Kidron vadungah a lâk suok a, Kidron vadunga chun a raw a, a sir nawi dap a, a nawi chu mi narânhai thlânah a the a.

⁷ Chun, Asera puon khâwngtuhai nuhmei umna Lalpa ina pasal inzawrhai umna in chu a ṭhiekpêk a.

⁸ Chun, Juda khawpuihaia inthawk chun thiempu po po a ṭhuoi suok a, thiempuhai riminhnik rawna bâwlhmunhai chu Gebaa inthawka Beer-seba chenin a sukbohmang vawng a; khawpui kawtkhâr lûta vawitieng panga, khawpui awptu Josua kawtkhâr lûta kawtkhârhaia bâwlhmunhai chu a sukchim a.

⁹ Bâwlhmun thiempuhai chu Jerusalema Lalpa maichâmah an hang fe ve naw a chu, an unauhai lai chun bei chawl ṭhanglo chu an fâk ve hlak a.

¹⁰ Chun, tukhawma an naunu amanih, an naupa amanih Molek puola meia an inlûttir ta nawna dingin Hinnom thlahai ruoma Topheth chu a sukbo ta bawk a.

¹¹ Chun, Lalpa in lûtnaa a in inhuonna sûnga lal in vêngtu Nathan-melek pindan bula Juda lalhaiin nisa ta dinga sakawr an pêkhai chu a sawn hmang vawng a; nisa tawlailîrhai chu a raw a.

¹² Chun, Ahaz in sâwng chunga Juda lalhaiin maichâm an siemhai le Manassein Lalpa in inhuonna tuol sûnglai pahnia maichâm a siemhai chu lal chun a sukchim a, a suknâwi vawng a, a nâwihai chu Kidron vadungah a pei a.

¹³ Chun, Jerusalem bul sietna tlâng changtieng panga Zidonhai pathien tirdakumtak Astoreth ta ding dâm, Moabhai pathien tirdakumtak Kemos ta ding dâm, Ammon thlahai pathien tirdakumtak Milkom ta ding dâm, Israel lal Solomonin bâwlhmun a siemhai chu lal chun a sukbo vawng a.

¹⁴ Chun, lungphunhai chu a suknâwi vawng a, Aserahai chu a phûrthlûk a, chuong hmunhaia chun mihriem ru a sie ta a.

¹⁵ Chu naw khawm chu Israelhai thil insuksuoltirtu Nebat naupa Jeroboamin Bethela maichâm le bâwlhmun a siem chu, chu maichâm le bâwlhmun chen khawm chun a sukchim bawk a; chuongchun, bâwlhmun chu a raw a, a sir nâwi dap a, Asera chu a raw ta a.

¹⁶ Chun, Josia chu a hei ngha a, tlânga thlânhai chu a hei hmu a; chuongchun, thlâna ruhai chu a vân lâktir a, chuong thu lo hriltu Pathien miin a lo hril, Lalpa thu ang ngeiin maichâma chun a raw a, a suksiet ta a.

¹⁷ Chun, ama chun, “Saw ka hmu saw tu lungphûm am a ni a?” a ta. Khuoa mihai chun, “Pathien mi, Judai rama inthawka hung, Bethela maichâm chunga i thilthawhai lo hrillâwktu thlân a ni saw,” an ta.

¹⁸ Ama chun, “Tukhawma iengkhawm law naw ro,” a ta. Chuongchun, tukhawma a ruhai chu Samari rama inthawka zâwlnei hung ruhai le chun iengkhawm an law naw a.

¹⁹ Chun, Israel lalhaiin Lalpa suklungsena an bâwl Samari ram khuohaia bâwlhmun inhai po po khawm chu Josia chun a sawn hmang a, Bethel khuoa a thaw ang chiein a thawpêk ve a.

²⁰ Chuongchun, chutaka bâwl-hmun thiempu umhai po po chu maichâm chungah a that a; chuonga chun mihriem ruhai a raw a, Jerusalemah a kîr nâwk ta a.

Fekân Ruoiṭhe an nei

²¹ Chun, lalin mi po po kuomah, “Hi thuthlung bua chuong ang hin Lalpa in Pathien ta dingin Fekân Ruoiṭhe nei ro,” tiin thu a pêk a.

²² Israelhai chunga rorêltuhaiin ro an rêl chinah, Israel lalhai inlal sûng po po dâm, Juda lalhai inlal sûng po po khawma chuong angtaka Fekân Ruoiṭhe chu an la nei ngai nawh;

²³ lal Josia inlal kum sâwm le kum riet kuma chun chu Fekân Ruoiṭhe chu Jerusalem khuoah Lalpa ta dingin an nei ta chau a nih.

Judai ram chunga Lalpa lungsen chawk zingna

²⁴ Chun, Lalpa ina thiempu Hilkiain a hmu lekhabua dân thu chuonghai kha a sukdet theina dingin khawhri aisânthiem zâwlhai, dawithiem dâm, pathien lim dâm, milim dâm, Judai ram le Jerusalema thil tirdakum an hmu hlakhai po po chu Josia chun a sukbo vawng bawk a.

²⁵ Mosie dân ang po poa lungril po po le thlarau po po le hrâtna po poa Lalpa pawm ama ang hrim hrim a hmaa lal tukhawm an um naw a, a hnunga khawm ama ang chu tukhawm an um nâwk ta bawk nawh.

²⁶ Chuong sa khawm chun Lalpa chun a lunginsenna nasatak Manassein a lo suklungsenna po po leia Juda chunga a lunginsenna chawk chu a la sukbo chuong naw a.

²⁷ Chun, Lalpain, “Israel ka sawn hmang ang hin Juda khawm hi ka hmu phâk lovah sawn hmang vêng ka ta, hi khuo ka thlang Jerusalem ngei le, ‘Chutaka chun ka hming chu um a tih,’ ka tina in chu sukbo dai ka tih,” a ta.

Josia thi thu

²⁸ Chuongchun, Josia chanchin danghai, a thilthaw po pohai chu Juda lalhai inlal lai chanchin ziekna buah a chuong a ni naw am a nih?

²⁹ Ân lal lai chun Aigupta lal Pharao-Neko chu Assuria lal do dingin Euphrates vadungah a hang fe a; chun, lal Josia chun ama chu a hang thaw a; chun, Pharao-Neko chun ama chu a hmu phingleh Megiddo khuoah a that ta a.

³⁰ Chun, a mihai chun Megiddoa inthawk chun a ruong chu tawlailîrin an fepui a, Jerusalemah an lûtpui a, ama thlânah an phûm ta a. Chuongchun, chu rama mihai chun Josia naupa Jehoahaz chu an ṭhuoi a, hriek an nâl a, a pa aia chun lalah an siem ta a.

Jehoahaz inlal thu le lalṭhungpha lâkpêka a um thu

³¹ Jehoahaz chu ân lal ṭantîrin kum sâwmhni le kum thum a na; Jerusalemah thla thum ân lal a; a nu hming chu Hamutal, Libna khuoa Jeremia naunu a nih.

³² Chun, a pi le puhai thaw dân ang po po Lalpa mithmuah thil ṭha nawtak a thaw hlak a.

³³ Chun, Pharao-Neko chun Jerusalema rorêl thei ta lo dingin Hamath rama Ribla khuoah ân tângtir a; chun, an ram chu tangka talent za khat le rângkachak talent khat ân chawitir a.

³⁴ Chun, Pharao-Neko chun Josia nau Eliakim chu a pa Josia aia chun ân laltir a, a hming chu Jehoiakim tiin a thlengpêk a; Jehoahaz ruok chu a ṭhuoi dai a; Aigupta ramah a fe a, chutaka chun a thi ta a.

³⁵ Chun, Jehoiakim chun tangka le rângkachak chu Pharao chu a pêk phawt a, an ramhai chu Pharao thupêk angin a tangka pe dingin sie ân chawitir ve thung a; Pharao-Neko kuoma pêk dingin mi tin chawi ding tuk zât ang peiin chu rama mihai ta tangka le rângkachak ân chawitir a.

Jehoiakim inlal thu

³⁶ Jehoiakim chu ân lal ṭantirin kum sâwmhni le kum nga a na; Jerusalemah kum sâwm le kum khat ân lal a; a nu hming chu Zebida, Ruma khuoa Pedaia naunu a nih.

³⁷ Chun, a pi le puhai thaw dân ang po po Lalpa mithmuah thil ṭha nawtak a thaw hlak a.