2 LALHAI 21 - Pathien Lekhabu Inthieng (BSI)

Manasse inlal thu

¹ Manasse chu ân lal ṭantir chun kum sâwm le kum hni mi a nih; Jerusalemah kum sâwmnga le kum nga ân lal a, a nu hming chu Hephziba a nih.

² Chun, Lalpain Israel thlahai hmaa a hnawtsuok tah, hnamhaiin thil tirdakumtak an thaw hlak ang, Lalpa mithmuah thil ṭha nawtakhai chu a thaw hlak a.

³ A pa Hezekiain a suksiet tah bâwlhmunhai chu a siem ṭha nâwk a; Israel lal Ahab thaw angin Baal maichâmhai a siem a, Aserahai a siem a, vâna um po po khi a biek a, an rawng a bâwl a.

⁴ Lalpain⁠, “Jerusalemah ka hming inumtir ka tih,” a tina, Lalpa ina chun maichâmhai a siem a.

⁵ Lalpa in inhuonna sûng pahnia chun vâna um po pohai ta dingin maichâm a siem a.

⁶ Chun, a naupa chu meiah ân lûttir a, aisân dâm a chîng a, dawi dâm a hmang a, khawhri aisân thiem zâwlhai le dawithiemhai a ruoi hlak a; Lalpa mithmuah thil ṭha nawtak ama suklungsen dingin a thaw hlak a.

⁷ Chun, Lalpain David le a naupa Solomon kuoma, “Hi in le Jerusalem khuo, Israel chihai po po laia ka ithlanga hin, ka hming chu kumkhuoin inumtir ka ta;

⁸ thu ka pêk ang po le, ka siehlaw Mosiein dân a pêk ang po po kha an pawm phawt chun an pi le puhai ka pêk tah rama inthawkin Israelhai kehai khawm hi inpên suoktir ta bawk naw ning,” a lo ti tah ina chun Asera lim a siem chu a sie a.

⁹ Nisienlakhawm, an pawm nuom naw a, Lalpain Israel thlahai hmaa a hnawt suok tah hnamhai thaw nêk hmana nasa lem thil suksuol dingin Manasse chun mihai a thlêm thlûk hlak a.

¹⁰ Chun, Lalpain a siehlaw zâwlneihai hmangin thu a hril a,

¹¹ “Juda lal Manasse hin hieng thil tirdakumtakhai hi a thaw a, a hmaa Amor mihai nêk hmanin a suksuol nasa a, Judahai hi a milimhaiin thil ân suksuoltir leiin:

¹² Lalpa, Israelhai Pathienin hieng ang hin a tih, ‘Ngai ta u, Jerusalem le Juda chunga hin a hre taphawthai na khing hni ṭhâwng khawp thil ṭha naw ka hung intlungtir ding a nih.

¹³ Samari inkhina hrui le Ahab sûngkuo dârmûmkhai chu Jerusalem chungah keimar ka tih; chun, miin thlêng a hrûk a, ân let vêl angin Jerusalem chu hrûng ka tih.

¹⁴ Chun, ka rochan a la um sunhai chu pei thlâng ka ta, an hmêlmahai kutah pêng ka ta; an hmêlmahai po po man ding le râllâk ding nîng an tih,

¹⁵ an pi le puhai Aigupta rama an hung suoka inthawka vawisûn ni chen hin ka mithmuah thil ṭha nawtak an thaw a, an mi suklungsen lei hin,’ tiin,” a ta.

¹⁶ Lalpa mithmua thil ṭha nawtak thawa Judahai thil ân suksuoltir a suolna tiem lovin, Manasse chun pawi tâwklo thisen nasatakin ân suo bawk a, Jerusalem dung le khang chu a sip a.

¹⁷ Chuongchun, Manasse chanchin danghai a thilthaw po pohai, a thil suksuolhai chu Juda lalhai inlal lai thu ziekna buah a chuong a ni naw am a nih?

¹⁸ Chun, Manasse chu a pi le puhai kuoma chun a in a, Uzza huona ama in bul huonah an phûm ta a; chuongchun, a naupa Amon chu ama aiawin ân lal ta a.

Amon inlal thu

¹⁹ Amon chu ân lal ṭantir chun kum sâwmhni le kum hni a na; Jerusalema chun kum hni ân lal a; a nu hming chu Mesullemet, Jotba khuoa Haruz naunu a nih.

²⁰ Chun, a pa Manasse thaw ang bawkin Lalpa mithmuah thil ṭha nawtak a thaw hlak a.

²¹ A pa lampui hraw po po chu a hraw ve a, a pain milim rawng a bâwlhai chu a bâwl ve a, chibai a bûk a;

²² chuongchun, Lalpa, a pi le puhai Pathien chu a mâksan a, Lalpa lampui chu a hraw naw a.

²³ Chun, a mihaiin Amon chu an phier rûk a, lal chu ama in ngeia chun an that a.

²⁴ Nisienlakhawm, chu rama mihai chun lal Amon phier rutuhai po po chu an sukhlum ve ta vawng a; chu rama mihai chun a naupa Josia chu a aiawin lalah an siem ta a.

²⁵ Chun, Amon thilthaw danghai chu Juda lalhai inlal lai thu ziekna bua chun a chuong a ni naw am a nih?

²⁶ Chun, Uzza huonah ama thlânah an phûm a, chun, a naupa Josia chu ama aiawin ân lal ta a.