2 LALHAI 19 - Pathien Lekhabu Inthieng (BSI)

Sennakerib kuta inthawka Juda sansuoka a um thu

¹ Chun, lal Hezekia chun chu chu a hriet chun a silfênhai a keithlêr a, saiip puon ân bel a, Lalpa ina chun a lût ta a.

² Chun, insûng tieng hotu Eliakim le, lekhaziektu Sebna hai, thiempu upahai chu saiip puon inbelin Amoz naupa zâwlnei Isai kuomah a tir a.

³ Anni chun a kuomah, “Hezekia chun hieng ang hin a tih, ‘Vawisûn ni hi lunginzîngna ni le, halna ni le hmingsietna ni a nih; nauhai chu an pieng a hun ta si a, nei dingin hrâtna a um ta si nawh.

⁴ A pu Assuria lalin Pathien hring hming hrilse dinga a tir Rabsake thuhrilhai po po chu, Lalpa i Pathien chun hrieng a ta, a thuhril, Lalpa i Pathienin a thu hriet chu a la kâwk rawi mawh; chu chu lei chun a la um sunhai chu ṭawngṭaipêk rawh,’ a ti che,” an ta.

⁵ Chuongchun, lal Hezekia mihai chu Isai kuomah an fe a.

⁶ Isai chun an kuomah, “In lalpa kuomah hieng ang hin hril ro,’ Lalpa chun hieng ang hin a tih, i thu hriet, Assuria lal mihaiin an mi hrilsietna kha ṭi naw rawh.

⁷ Ngai ta, a sûnga chun thlarau inumtir ka ta, thuthang hrieng a ta, ama ramah fe nâwk a tih; chuongchun, ama ram ngeia chun kâwlhnâma sukthlûkin inumtir ka tih, a tih,’ tiin,” a ta.

⁸ Chuongchun, Rabsake chu a kîr nâwk a, Assuria lal chun Libna khuo a lo thaw lai chu a va hmu a; Lakis khuoa inthawk chun a suok tah ti a hriet hrim a na.

⁹ Chun, “Ngai ta, nangma chu thaw dingin a suok tah,” tia Tirhaka, Ethiopia ram lal chungchâng thu Assuria lal Sennakerib mi hril a lo hriet chun, Hezekia kuomah mihai a tir a,

¹⁰ “Hieng ang hin Juda lal Hezekia kuoma chun hril ro, ‘I Pathien i ring chun Jerusalem khuo Assuria lal kuta pêk ni naw nih tiin hlêm naw raw se che.

¹¹ Ngai ta, Assuria lalhaiin ram po po sukse vawnga, a chunga an thilthawhai kha i hriet a; nang hi sanhim i ni bîk ding am a nih?

¹² Hnam tin pathienhai chun ka pi le puhaiin an sukbohmanghai kha an sanhim hlak am a nih? Gozan dâm, Haran dâm, Rezeph dâm, Eden nau hai Telassar khuoa umhai,

¹³ Hammath lal hai, Arpad lal hai, Sepharvaim khawpui lal hai, Hena lal dâm, Ivva lal dâm kha khâwlai am an um ta leh?’ tiin,” a ta.

¹⁴ Chun, Hezekia chun a mitirhai kuta inthawk chun lekha a hmu a, a hang tiem a: chuongchun, Hezekia chu Lalpa ina chun a hang lût a, Lalpa hmaa chun a phar a.

¹⁵ Chun, Hezekia chu Lalpa hmaah a ṭawngṭai a, “Aw Lalpa, cherubhai chunga ṭhung, Israel Pathien, nang, nang chau hi hnuoi chung ram po po Pathien chu i nih; hnuoi le vân hi nangma siem a nih.

¹⁶ Aw Lalpa, i na lo sit la, ngai ta, Aw Lalpa i mit meng la, en ta; Pathien hring chu hrilse dinga Sennakeribin thu a hung hril hi ngai ta;

¹⁷ Lalpa, Assuria lalhaiin hnamhai le an ramhai chu an suksiet hlak luo a;

¹⁸ an pathienhai chu meiah an pei bawk hlak a; chuonghai chu pathien an ni naw hrim a, mihriem kuta siem, thing le lung an ni lem a nih; chu lei chun an sukbohmang a nih.

¹⁹ Chuleiin, aw Lalpa kan Pathien, nang, nangma chau hi Lalpa Pathien i nih ti hnuoi chung ram po po hin an hriet theina dingin amaa inthawk hin mi sanhim ngei ngei rawh,” tiin.

²⁰ Chuong lai chun Amoz naupa Isai chun Hezekia kuomah, “Lalpa Israel Pathien chun hieng ang hin a ti a nih ‘Assuria lal Sennakerib sietna ding tienga ka kuoma i ṭawngṭai kha ka lo hriet,’ tiin, mi a tir a.

²¹ Hi hi a chungchâng thu Lalpain a hril chu a nih, ‘Zion naunu nunghâk chun a hmusit che a, a nuisan che a nih; Jerusalem naunu chun a lu a thin khum bawk che a.

²² Tu am i sukhmingsiet a, i hrilsiet? Tu chung âm i râwl i sukpuom a, i mit i meng insâng? Israel Mi Inthieng chunga hin annâwm.

²³ I mitirhai hmangin Lalpa chu i sukhmingsiet a. Ka tawlailîr tamtak leh Lebanon ramril tlâng insânghai ka hung tlung ta a; chutaka Sidar thing insângtakhai le fâr thing ṭha ṭhahai chu phûr ka ta; a hnuoi ṭhatna hmun rampui umna hmuna chun lût ka tih.

²⁴ Ram dang tui ka cho suok a, ka tlân hlak a, ka kepha hnuoi hin Aigupta vadunghai po po chu sukkang vawng ka tih, i ti a.

²⁵ Keimain inhmaa inthawka chuong chu ka thaw a nizie dâm, inhma laia chuong chu ka siem a nizie dâm chu i hriet naw am a nih? Khaw kul neihai chu in chim khâwm el anga suksetu dingin ka ruot ta che a ni hi.

²⁶ Chuleiin, a sûnga umhai chun hrâtna an nei naw a, an zâm a, an hung muolpho ta kha; phûl hlobet ang le hna hring ang le, in chunga hlobet ang le, bu lien hmaa a hrîin a sukvuoi ang an ni kha.

²⁷ Kei chun i ṭhung dâm, i lût le i suok dâm, ka chunga i lunginsen hi ka hriet i sawnnaw.

²⁸ Ka chunga i lunginsen lei le, i ṭawng uong chu ka naa a hung lût tâk leiin ka hnâr inbûk chu i hnârah inbûk ka ta, ka thîrse chu i hmûrah, i hungna lampuia ngei khan inkîrtir nâwk ka ti che,’ tiin.

²⁹ Chun, hi hi i ta dinga inchikna nîng a ta, tu kum hin bu inhli ring in ta, kum nâwk khawm bu inhli bawk; chun, a kum thumnaa chun buhai tu unla, sîk unla, grêp huonhai siem unla, a rahai fa ro.

³⁰ Chuongchun, Juda sûnghai laia a la dam sunhai chun a suktiengin zung kei an ta, a tung zâwngin ra nâwk an tih.

³¹ Jerusalema inthawkin a la um sunhai, Zion tlânga inthawkin a la damhai chu an suok ding a nih: Lalpa ṭhahnemngaina chun chuong chu thâwng a tih.

³² Chuleiin, Lalpa chun Assuria lal chungchâng thu chu hieng ang hin a hril: ‘Hi khawpui hi hung tlung naw ni a, hitaka hin thal kâp bawk naw nih; phaw leh a kâwla hin hung bawk naw ni a, a khaw hrûla hin hnuoi dêng pâwng bawk naw ni hai.

³³ An hungna lampuiah, chutaka ngei chun lêt nâwk a ta, hi khawpui hi hung tlung naw nih,’ Lalpain a tih.

³⁴ Keima lei le ka siehlaw David leiin hi khawpui hi sanhim dingin ka vêng ding a nih,” tiin.

³⁵ Chuongchun, chu zân chun hieng ang hi a hung na, Lalpa vântirko chu ân thawk suok a, Assuria mihai riekhmuna chun mi nuoi khât le sîng riet le sâng nga a sukhlum a; chun, zîngkâra an hang tho chun, ngai ta, mithi ruong khât el a lo ni tah el a.

³⁶ Chuongchun, Assuria lal Sennakerib chu a suok a, a kîr nâwk a, a fe nâwk ta pei a, Ninevi khuoa chun a um ta a.

³⁷ Chun, a pathien Nisrok ina chun ama a biek laiin hieng ang hi a hung na, Adrammelek le Sarezer hai chun ama chu kâwlhnâmin an sukhlum ta a; chuongchun, Ararat rama chun an tlân lût ta a. Chun, a naupa Esar-haddon chu ama aiawin ân lal ta a.