2 LALHAI 15 - Pathien Lekhabu Inthieng (BSI)

Azaria (Uzzia) inlal thu

¹ Israel lal Jeroboam kum sâwmhni le kum sari ân lal kum chun Juda lal Amazia naupa Azaria chu ân lal ṭan a.

² An lal ṭantir chun ama chu kum sâwm le kum ruk mi a na. Jerusalema chun kum sâwmnga le kum hni ân lal a; a nu hming chu Jekolia, Jerusalem mi a nih.

³ Chun, a pa Amazia thilthaw ang po thaw vein, Lalpa mithmuah thil ṭhatak a thaw hlak a.

⁴ Amiruokchu, bâwlhmunhai chu sukbo a ni chuong nawh, bâwlhmunahai chun mihai chu an lân thâwiin, riminhnik an la raw zing hlak.

⁵ Chun, Lalpain lal chu a hung hrem ta a, chuongchun, a thi ni chen chun ân phâr a, in tumah a um ta a. Chun, lal naupa Jotham chu an rama mihai rorêlpêkin insûng tieng hotuah a um ta a.

⁶ Chuongchun, Azaria chanchin dang a thilthawhai po po chu Juda lalhai inlal lai thu ziekna buah a chuong a ni naw am a nih?

⁷ Chun, Azaria chu a pi le puhai lai David khawpuia chun an phûm a; chun, a naupa Jotham chu ama aiawin ân lal ta a.

Zekaria inlal thu

⁸ Juda lal Azaria kum sâwmthum le kum riet ân lal kum chun Jeroboam naupa Zekaria chu Israelhai chungah Samari khuoah thla ruk sûng ân lal a.

⁹ Chun, a puhai thaw ang bawk, Lalpa mithmuah thil ṭha nawtak a thaw hlak a; Israelhai thil insuksuoltira a thaw Nebat naupa Jeroboam suolnahai kha a mâksan nawh.

¹⁰ Chun, Jabes naupa Sallum chun ama a phier rûk a, mipuihai hmaa chun a thaw a, a that a, a aiawin ân lal ta a.

¹¹ Chun, Zekaria chanchin danghai chu, ngai ta, Israel lalhai inlal lai thu ziekna bua chun a chuong a nih.

¹² Chu chu Lalpain Jehu kuomah, “I naupasalhai chu suon lina chenin Israelhai lalṭhungphaah ṭhung an tih,” ti thu a hril kha a nih. Chuongchun, chuong ang tak chu a hung ni ta hrim a.

Sallum inlal thu

¹³ Juda lal Uzzia kum sâwmthum le kum kuo ân lal kum chun Jabes naupa Sallum chu ân lal ṭan a; Samari khuoah thla khat sûng ân lal a.

¹⁴ Chun, Gadi naupa Menahem chu Tirza khuoa inthawkin a hang fe a, Samari khuoah a fe a; Jabes naupa Sallum chu Samari khuoa chun a thaw a, a that a, a aiawin ân lal ta a.

¹⁵ Chuongchun, Sallum chanchin danghai, a phier rûkna thuhai chu, ngai ta, Israel lalhai inlal lai thu ziekna buah a chuong a nih.

¹⁶ Chuongchun, Menahem chun Tirzaa inthawk chun Tipsa khuo le a sûnga um po pohai le a ramhai chu a thaw a, an inhawng naw leiin a do a nih; chuonga nau vawnlai nuhmeihai po po chu a phirthlêr a.

Menahem inlal thu

¹⁷ Juda lal Azaria kum sâwmthum le kum kuo ân lal kum chun Gadi naupa Menahem chu Israelhai chungah ân lal ṭan a; Samari khuoah kum sâwm ân lal a.

¹⁸ Chun, Lalpa mithmuah thil ṭha nawtak a thaw hlak a; Israelhai thil insuksuoltira a thaw Nebat naupa Jeroboam suolnahai kha a dam sûngin a mâksan nawh.

¹⁹ Assuria lal Pula chun an ram chu a hung thaw a; ram chu a nei nghetpui theina dingin Menahem chun Pula chu tangka talent sâng a pêk a.

²⁰ Chun, Menahem chun Assuria lal pêk dingin Israel mi neinunghai po poa inthawk chun tangka shekel sâwmnga seng a dâwl a. Chuongchun, Assuria lal chu a kîr nâwk ta a, chu rama chun a um zing naw a.

²¹ Chuongchun, Menahem chan-chin danghai, a thilthaw po pohai chu Israel lalhai inlal lai thu ziekna bua a chuong a ni naw am a nih?

²² Chun, Menahem chu a pi le puhai kuomah a in ve a; chun, a naupa Pekahia chu ama aiawin ân lal ta a.

Pekahia inlal thu

²³ Juda lal Azaria kum sâwmnga ân lal kum chun Menahem naupa Pekahia chu Israelhai chungah Samari khuoah ân lal ṭan a, kum hni sûng ân lal a.

²⁴ Lalpa mithmuah thil ṭha nawtak a thaw hlak a; Israelhai thil insuksuoltira a thaw Nebat naupa Jeroboam suolnahai kha a mâksan nawh.

²⁵ A sipai hotu Remalia naupa Pekain ama chu a phier rûk a, a kuoma chun Gilead mi sâwmnga an um ve a; chuongchun, Pekahia chu Samari khuoa lal ina kulah Argob le Arie leh chun a that a; a aiawin ân lal ta a.

²⁶ Chuongchun, Pekahia chanchin danghai, a thilthaw po pohai chu, ngai ta, Israel lalhai inlal lai thu ziekna bua chun a chuong a nih.

Peka inlal thu

²⁷ Juda lal Azaria kum sâwmnga le kum hni ân lal kum chun Remalia naupa Peka chu Israelhai chungah Samari khuoa chun ân lal ṭan a; kum sâwmhni ân lal a.

²⁸ Chun, Lalpa mithmuah thil ṭha nawtak a thaw hlak a; Israelhai thil insuksuoltira a thaw Nebat naupa Jeroboam suolnahai kha a mâksan nawh.

²⁹ Israel lal Peka inlal laiin Assuria lal Tiglath-pileser chun Ijon khuo dâm, Abel-beth-maaka khuo dâm, Janoa khuo dâm, Kedes khuo dâm, Hazor khuo dâm, Gilead le Galili ram dâm, Naphtali ram po po chu a lâk a; chun, Assuria rama chun salah a ṭhuoi a.

³⁰ Chun, Ela naupa Hosea chun Remalia naupa Peka chu a phier rûk a, a thaw a, a that a. Uzzia naupa Jotham kum sâwmhni ân lal kum chun a aiawin ân lal ta a.

³¹ Chuongchun, Peka chanchin danghai, a thilthaw po pohai chu, ngai ta, Israel lalhai inlal lai thu ziekna bua chun a chuong a nih.

Jotham inlal thu

³² Israel lal Remalia naupa Peka kum hni ân lal kum chun Juda lal Uzzia naupa Jotham chu ân lal ṭan a.

³³ Ân lal ṭantir chun kum sâwmhni le kum nga mi a na; Jerusalemah kum sâwm le kum ruk ân lal a; a nu hming chu Jerusa, Zadok naunu a nih.

³⁴ Chun, a pa Uzzia thilthaw ang po thaw vein; Lalpa mithmuah thil ṭhatak a thaw hlak a.

³⁵ Amiruokchu, bâwlhmunhai chu sukbo a ni chuong nawh; bâwlhmunahai chun mihai chu an lân thâwiin, rim inhnik an la raw zing hlak. Lalpa in kawtkhâr sakhnung lem chu a siemṭha a.

³⁶ Chuongchun, Jotham chanchin danghai, a thilthaw po pohai chu Juda lalhai inlal lai thu ziekna buah a chuong a ni naw am a nih?

³⁷ Chuong lai chun Suria lal Rezin le, Remalia naupa Peka chu Judahai thaw dingin Lalpain a tir ṭan ta a.

³⁸ Chun, Jotham chu a pi le puhai kuomah a in ta a, a pi le puhai lai a pu David khawpuia chun an phûm ta a, a naupa Ahaz chu ama aiawin ân lal ta a.