2 LALHAI 14 - Pathien Lekhabu Inthieng (BSI)

Amazia inlal thu

¹ Israel lal Jehoahaz naupa Joas kum hni ân lal kum chun Juda lal Joas naupa Amazia ân lal ṭan a.

² Ân lal ṭantir chun kum sâwmhni le kum nga mi a na, Jerusalemah kum sâwmhni le kum kuo ân lal a, a nu hming chu Jehoadin, Jerusalem mi a nih.

³ Lalpa mithmuah thil feltak a thaw hlak a, a pu David ruok chu a tluk naw a; a pa Joas thilthaw ang po chu a thaw ve hlak a.

⁴ Amiruokchu, bâwlhmunhai ruok chu sukbo a ni chuong nawh; bâwlhmunahai chun mihai chu an lân thâwiin, riminhnik an la raw zing hlak a.

⁵ Chun, a ram chu a hang indin nghet phingleh, a mihai a pa lal thattuhai kha a that ve thung a;

⁶ amiruokchu, chuong tuolthattuhai nauhai ruok chu a that naw a; Mosie dân bua, “Nauhai leiin pahai sukhlum ding a ni naw a, pahai leiin nauhai sukhlum ding a ni bawk naw a, mi tin chu mâni suol leiin an thi ding a nih,” tia Lalpa thupêk dân ziek ang khan.

⁷ Edom mihai chu Machi Ruomah sîng khat a that a, Sela khuo chu a thaw a, a lâk a, a hming dingin Joktheel ân bûk a, tu chen hin an la ti a nih.

⁸ Chuongchun, Amazia chun Israel lal Jehu naupa Jehoahaz nau Jehoas kuoma chun, “Thaw ta, hmai sanah inentuong ei tih khai,” tiin mi a tir a.

⁹ Chun, Israel lal Jehoas chun, Juda lal Amazia kuomah, “Lebanon tlânga hlingin Lebanon tlânga Sidar thing kuomah ‘I naunu kha ka naupa nuhmeiah inneitir ta khai,’ tiin ân cha a; chun, Lebanon tlânga ramsa a hung a, hling chu a hung chîl thlûk dêr el ta a.

¹⁰ Nang hin Edom mihai chu i hne ngei luo a, i lungril a hung chapo tah a ni hi, i chapona kha intawmpui ṭawk ṭawk el rawh, nang le Juda ram puma sietna, i ta dinga thil ṭha naw ding iengdingin am i cho suok ding an leh,” tiin mi a tir ve a.

¹¹ Nisienlakhawm, Amazia chun a lo ngai nuom naw a. Chuongchun, Israel lal Jehoas chu a hang fe a, Juda lal Amazia le chun Juda ram Bethsemes khuoa chun hmai sanah an inen ta ngei a.

¹² Chun, Juda chu Israelhai hmaa chun a lo tlâwm ta a, mi tin chu mâni in tieng an fe ta seng a.

¹³ Chun, Israel lal Jehoas chun Juda lal Ahazia naupa Jehoas nau Amazia chu Bethsemesa chun a man a, Jerusalem khuoah a fe a, Jerusalem kul chu Ephraim kul kawtkhâra inthawka kul kil kawtkhâr chenin tawng za li zet a sukchim a.

¹⁴ Chun, Lalpa ina mi le, lal ina ro siekhâwmnaa mi, rângkachak le tangka le bûr le bêlhai a um taphawt chu a lâk a, hrêna intâng dinghai leh; chun, Samari khuo tieng chun a fe nâwk ta a.

¹⁵ Chuongchun, Jehoas thilthaw chanchin danghai, a thilthawtheiziehai, Juda lal Amazia a thaw thu dâm chu Israel lalhai inlal lai thu ziekna bua chun a chuong a ni naw am a nih?

¹⁶ Chun, Jehoas chu a pi le puhai kuomah a in a, Samari khuoah Israel lalhai lai an phûm a; chun, a naupa Jeroboam chu ama aiawin ân lal ta a.

¹⁷ Chun, Juda lal Joas naupa Amazia chu Israelhai lal Jehoahaz naupa Jehoas thi hnungin kum sâwm le kum nga a la dam a.

¹⁸ Chuongchun, Amazia chanchin danghai chu Juda lalhai inlal lai thu ziekna buah a chuong a ni naw am a nih?

¹⁹ Chun, Jerusalem khuoah ama chu an phier rûk a, chuongchun, Lakis khuoah a tlân a; nisienlakhawm, Lakis khuoa chun mi an inhnawttir a, chutaka chun an that ta a.

²⁰ Chun, a ruong chu sakawrin an fepui a, a pi le puhai lai David khawpui Jerusalema chun an phûm ta a.

²¹ Chun, Juda mi po pohaiin kum sâwm le kum ruk mi Azaria chu an ṭhuoi a, a pa Amazia aiah lalin an siem ta a.

²² Ama chun Elath khuo chu a siemṭha nâwk a, Juda ramah an bel nâwk a, chu hnunga chun lal chu a pi le puhai kuomah a in ta a.

Jeroboam inlal thu

²³ Juda lal Joas naupa Amazia kum sâwm le kum nga ân lal kum chun Israel lal Joas naupa Jeroboam chu Samari khuoah ân lal ṭan a, kum sâwmli le kum khat ân lal a.

²⁴ Chun, Lalpa mithmuah thil ṭha nawtak a thaw hlak a, Israelhai thil insuksuoltira a thaw Nebat naupa Jeroboam suolnahai po po kha mâksan hrim hrim a nei naw a.

²⁵ Lalpa Israelhai Pathien a siehlaw, Gath-hepher mi Amittai naupa zâwlnei Jona hmanga a thuhril ang khan, Hamath lûtnaa inthawka Araba tuipui chenin Israel ramah a bel nâwk a.

²⁶ Lalpain Israelhai rinumzie chu a nasa êm êm a nih ti a hriet si a; khuokhir le khir nawhai khawm an um chuong si naw a; Israelhai ṭhangpuitu ding tukhawm an um bawk nawh.

²⁷ Lalpain Israelhai hming hi vânkhuphnuoia hin a sukchimit dêr ding a nih ti chu a lo hril naw hrim a. Joas naupa Jeroboam hmangin a sandam ta lem a nih.

²⁸ Chuongchun, Jeroboam chan-chin danghai, a thilthaw po pohai, a thilthawtheizie dâm, a râl do thu dâm, kha hmaa Juda ram chan ni hlak Damaska le Hamath khuo Israelhai ta dinga a hung lâkpêk nâwk thuhai chu Israel lalhai inlal lai thu ziekna buah a chuong a ni naw am a nih?

²⁹ Chun, Jeroboam chu a pi le pu, Israel lalhai kuoma chun a in ve a; chuongchun, a naupa Zekaria chu ama aiawin ân lal ta a.