Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 LALHAI 12 - Pathien Lekhabu Inthieng (BSI)


Judai rama Jehoas ân lal
( 2 Chr 24.1-27 )

1 Jehu kum sari ân lal kum chun Jehoas chu ân lal ṭan a; Jerusalem khuoah kum sâwmli ân lal a; a nu hming chu Zibia, Beer-seba khuoa mi a nih.

2 Chun, thiempu Jehoiadain Jehoas chu ân chûktir sûng po chu Lalpa mithmua thil ṭha a thaw hlak a.

3 Amiruokchu, bâwlhmunhai chu sukbohmang a ni chuong nawh; bâwlhmunahai chun mihai chu an inthâwiin riminhnik an la raw zing tho a.

4 Chun, Jehoas chun thiempuhai kuomah, “Lalpa ina lâklût, thil ser intlanna sum po po tiem sa tahai laia fe taphawthai ta dinga tuk, an hringna intlanna sum dâm, tukhawma Lalpa ina lâk lût an phal sum po pohai chu,

5 thiempuhaiin an hmêlhriethaia inthawkin lo la seng hai sienla, chuongchu, in sie siemṭhat ṭûlna lai hai siemṭhatnain hmang raw hai se,” a ta.

6 Nisienlakhawm, lal Jehoas chu kum sâwmhni le kum thum ân lal hnung khawmin thiempuhai chun in sie chu an la siem naw rawp a.

7 Chuongchun, lal Jehoas chun thiempu Jehoiada le thiempu danghai chu a ko a, an kuomah, “Iengdinga in sietna laihai hi in siem naw am? Tuhin chu in hmêlhriethai laia inthawkin tangka chu la ta naw unla, in se siemna dingin pe suok lem ta ro,” a ta.

8 Chun, thiempuhai chun mihai kuoma inthawka tangka lâk ta lo le, in sietna lai siemtu ni lo chu an remti a.

9 Amiruokchu, thiempu Jehoiada chun bâwm a lâk a, a sîn a verpawp a, Lalpa ina lût changtieng panga, maichâm bula chun ân ṭhut a, chutaka chun Lalpa ina tangka hung lâklût po po chu kawtkhâr vêngtu thiempuhai chun an lo sie pei a.

10 Chun, bâwma chun tangka a tam ta hle ti an hriet po leh lal lekhaziektu le thiempu laltak chu an hang fe a, an fûn a, Lalpa ina tangka um zât chu an tiem a.

11 Chun, an tangka tiem chu sinthawhai, Lalpa in bâwltuhai chunga hotuhai chu an pêk a; anni chun Lalpa in bâwltu, themthiemhai le in bâwltuhai hlawa dâm, lung suttuhai le, lung cho suoktuhai hlawa dâm;

12 Lalpa in sietna lai siemna ding thinghai le lung sutnaa dâm, in siemna dinga a pawimawnaa pohai chun an hmang hlak a.

13 Amiruokchu, Lalpa in sûnga an tangka hung lâk chun Lalpa in ta dinga tangkaruo nohai, khâwnvar puon chepnahai, maihûnhai, tawtawrâwthai, rângkachak bûr le bêlhai, tangkaruo bûr le bêlhai an siem naw a;

14 sinthawtuhai an pêk hlak a; Lalpa in siemna dingin an hmang lem a nih.

15 Chun, sinthawtuhai an pêk dinga tangka an inkawltirhai khawm kha an enzuipui chuong naw a, anni chun ringumtakin an thaw hlak si a.

16 Bawsietna inthâwina thilinhlân tangka le, suol inthâwina thilinhlân tangkahai chu Lalpa ina chun a lâklût nawh; thiempuhai chanpuol a nih.

17 Chun, Suria lal Hazael chun Gath khuo a hang rûn a, a hang lâk a; chun, Hazael chu Jerusalema fe pei a tum a.

18 Chun, Juda lal Jehoas chun Juda lal a puhai Jehosaphat hai dâm, Jehoram hai dâm, Ahazia hai dâm, lo inhlân tah thil serhai po po le, ama thil serhai le Lalpa ina mi le lal ina ro siekhâwmnaa mi rângkachak um po pohai chu a lâk vawng a; Suria lal Hazael chu a thawn a; chuongchun, Jerusalem chu a nghatsan nâwk ta a.

19 Chuongchun, Joas chanchin danghai, a thilthawhai po po chu Juda lalhai inlal lai thu ziekna buah a chuong a ni naw am a nih?

20 Chun, a mihai chu an tho a, ama an phier rûk a, Joas chu Silla pan thlâkna lampuiah Millo inah an thaw a, an sukhlum a.

21 Ama mi Shimeath naupa Zozakar le Somer naupa Jehozabad chun an that a nih; chuongchun, a pi le puhai lai David khawpuia chun an phûm a; chun, a naupa Amazia chu a aiawin ân lal ta a.

Hmar OV (Re-edited) Bible (Millennium) - Pathien Lekhabu Inthieng 

Copyright © Bible Society of India, 2016.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ