2 LALHAI 11 - Pathien Lekhabu Inthieng (BSI)

Athaliain lalṭhungpha ân chu

¹ Chun, Ahazia nu Athalia chun a naupa a thi ti a lo hriet chun, a tho a, lal nauhai po po chu a that vawng a.

² Ahazia naupa Joas ruok chu lal Joram naunu, Ahazia farnu Jehoseba chun lal naupasal an thathai laia inthawk chun a ṭhuoi hmang a, a enkawltu leh khum pindanah ân umtir a. Athalia hmu thei lo dingin an thuphmang a; chuongchun, that a ni ve ta naw a.

³ Chun, ama chu amanu le chun Lalpa inah kum ruk an inbihmang a, chuongchun, Athalia chun chu rama chun ro a rêl ta a.

⁴ Chun, a kum sarinaa chun Jehoiadain Kereth mihai le vêngtu sipaihai laia mi sipai za hotuhai chu ân kotir a, Lalpa inah a kuomah ân ṭhuoi lûttir a; chun, an kuomah thu a thlung a, Lalpa ina chun ṭawng ân khâmtir a; lal naupa chu ân entir tâwl a.

⁵ Chun, ama chun, “In thaw ding chu hieng ang hi a nih; nangni laia châwlnia hung dinghai hi hmun thuma ṭhea hmun khatin lal in chu vêng in ta;

⁶ chun, hmun thuma ṭhea hmun khat chu Sur kul kawtkhârah um in ta; chun, hmun thuma ṭhea hmun khat chu vêngtuhai hnungtienga kul kawtkhâra chun um in tih; chuong ang chun in chu vêng in ta, a dangtuah in um ding a nih.

⁷ Chun, nangni laia pâwl hni, châwlnia ṭîn dinghai po po chun lal kâwl vêla Lalpa in chu vêng in ta.

⁸ Chun, mi tinin hriemhrei chawiin lal chu inhuol vêl in ta; tukhawm huol sûnga hung lût taphawt chu lo that pei ding a nih; chuongchun, lal chu a lût le suok chu zui pei unla,” tiin thu a pêk a.

⁹ Chun, sipai za hotuhai chun thiempu Jehoiada thupêk ang po po chun an thaw vawng a; chun, mâni rawihai seng châwlnia hung dinghai le; châwlnia ṭîn dinghai chu an ṭhuoi a, thiempu Jehoiada kuomah an fe a.

¹⁰ Chun, thiempu chun sipai za hotuhai chu Lalpa ina um, lal David fei le phawhai chu a pêk a.

¹¹ Chun, vêngtu sipaihai chun hriemhrei chawi sengin, in changtieng panga inthawk vawitieng chenin, maichâm le in hrûla chun lal chu an ngîr huol tuou a.

¹² Chuongchun, lal naupa chu a hung ṭhuoi suok a, lallukhum ân khumtir a, inhriettirna thu chu a pêk a, lalah an siem a, hriek an nâl a; chun, an kut an ben a, “Pathienin laltak humhim raw se,” an ta.

¹³ Chun, vêngtu sipaihai le mipuihai ri chu Athaliain a lo hriet chun, Lalpa ina mipuihai lai chun a va fe a;

¹⁴ chun, a hang en a, ngai ta, lal chu dân angin ban hrûla hin a lo ngîr a, sipai hotuhai le tawtawrâwt mûttuhai chu lal kâwlah an ngîr a; chun, chu rama mi po po chu an hlim êm êm a, tawtawrâwt dâm an mût an mût a. Chuongchun, Athalia chun a puonhai a keithlêr a, “Phier rûkna! Phier rûkna a ni tah ie,” tiin a khêk a.

¹⁵ Chun, thiempu Jehoiada chun sipai chunga hotua ruot sipai za hotuhai chu thu a pêk a, an kuomah, “Sipaihai kâra khan amanu kha insuoktir ro, tukhawm ama zui taphawt chu kâwlhnâma sât hlum ding nîng a tih,” a ta; thiempu chun, “Lalpa ina chu that ding a ni nawh,” a lo ti ta si a.

¹⁶ Chuongchun, lampui an inâwng a; chun, sakawr lûtna lampuiah lal inah a fe a; chutaka chun a nih an that chu.

¹⁷ Chun, Jehoiada chun Lalpa le lal le mipuihai kâra chun Lalpa mihai an hung nina dingin thu a thlung ta a; lal le mipuihai kâra khawm chun.

¹⁸ Chun, chu rama mi po pohai chu Baal inah an fe a, an sukchim a; a maichâmhai le a limhai chu an suknâwi vawng a; Baal thiempu Mattan khawm chu maichâm bulah an that a. Chun, thiempu chun Lalpa in vêngtu hotuhai a ruot a.

¹⁹ Chun, sipai za hotuhai, Kereth mi dâm, vêngtu sipaihai le, chu rama mi po po chu a ṭhuoi a, Lalpa ina inthawkin lal chu an hung ṭhuoi thlâk a, vêngtuhai kawtkhâra lûtin lal ina chun an fe a. Chuongchun, lalhai lalṭhungphaa chun a ṭhung ta a.

²⁰ Chuongchun, chu rama mi po po chu an lâwm a, chun, khawpui chu buoi lovin a um ta a; chun Athalia chu kâwlhnâmin lal inah an that a.

²¹ Jehoasin ro a rêl ṭan lai chun kum sari mi a nih.