2 KORINTH 13 - Pathien Lekhabu Inthieng (BSI)

Inṭhi lâwkna le chibai bûkna

¹ Hi hi in kuoma ka hung a vawi thumna ding a nih. Hretuhai pahni amanih, pathum amani baua chun thu tinrêng sukdetin um a tih.

² Ka hril lâwk ta a, vawi hninaa in kuoma ka um laia ka hril ang khan, tuhin in kuomah um naw lang khawm, kha hmaa thil suksuoltuhai kuoma le mi po po kuomah hril lâwk nâwk ka tih. “Ka hung nâwk chun hla naw ning ah,”

³ Krista chun keimaa thu a hril hlak ti hi infie in nuom leiin. Ama chu nangni tieng a hrâtnaw a ni naw a, thil thawtheitak a ni lem a nih.

⁴ Ama chu hrâtnawnaa hemdein a um a, nisienlakhawm, Pathien thilthawtheina leiin a hring ta zing a nih. Keini khawm amaa chun kan hrâtnaw a nih; nisienlakhawm, nangni tienga Pathien thilthawtheina leiin a kuomah hring vêng kan tih.

⁵ Ringnaa chun in um am, nangni insin hlak unla, nangni ngei infie hlak ro. Annawleh, nangniah Isu Krista chu a um ti nangni ngeiin in hriet chieng naw am a nih? dit naw in ni nghâl naw chun.

⁶ Keini ruok chu dit lovin kan um nawh ti la hung hre dingin ka ring cheu.

⁷ Chun, thil hrim hrim in suksuol nawna dingin Pathien kuomah kan hni hlak a, chu chu keini hi dituma kan inlang theina ding a ni naw a, nangniin a mawi mawi in thaw theina dingin a ni lem; keini chu dit naw angin um inlang khawm.

⁸ Thutak ṭan ding naw chun, thutak do ding chun iengkhawm kan thaw thei naw a nih.

⁹ Keini kan hrâtnaw lai khawma nangni in hrât hin kan lâwm hlak in sawnnaw; hi hi kan hni bawk hlak, nangni ṭhat famkimna ding hi.

¹⁰ Chuleiin, sukse ding ni lova, siem ṭha ding lema Lalpain thuneina a mi pêk ang pei khan, in kuoma ka um pha nataka ka kâwk nawna ding cheuin in kuoma ka um naw lai hin hieng thu hi ka ziek a nih.

¹¹ A tâwp taka chun, unauhai, lâwmtakin um ro. Sukṭhat famkimin um unla, lungmuongtakin um unla, lungril hmunkhat put unla, lunginruoltakin um ro; chuongchun, hmangaina le inremna Pathien chu in kuomah a um ding a nih.

¹² Fâwp inthiengin chibai inbûk ro.

¹³ Mi inthienghai po poin chibai an bûk cheu.

¹⁴ Lalpa Isu Krista lunginsietna dâm, Pathien hmangaina dâm, Thlarau Inthieng pâwlna dâm chu in rênga kuomah um raw se.