1 PETER 3 - Pathien Lekhabu Inthieng (BSI)

Nuhmeihai le Pasalhai

¹ Chuong ang bawkin nangni nuhmeihai, mâni pasalhai thu thuin um ro; chuongchun, anni laia tûkhawmin thu chu awi naw sien khawm, thu ni lovin, an nuhmeihai chângziea hnein um thei an tih,

² in chângze inthieng le inzaumtak an hmu pha chun.

³ In incheina chu puotieng incheina sam phier dâm, rângkachak ṭhi hli dâm, silfêna inthuom dâm chu ni lovin,

⁴ lungrila mihriem thupa um, lungril thuhnuoirawl le nuninnêm silfên se thei lova inthuom ni lem raw se, chu chu Pathien mithmu chun a hlu bêk bêk a nih.

⁵ Chuong ang bawkin, inhmaa nuhmei inthieng Pathien ringtuhai khawm kha mâni pasalhai thu thua umin an inchei hlak si a.

⁶ Sarain Abraham chu, “Lalpa,” tiin a thu a awi ang khan, thil ṭha thawin, ṭitna ding hrim nei lova in um chun, Sara nauhai nîng in tih.

⁷ Nangni pasalhai, chuong ang bawkin, nuhmei hi bêl kawi awl lem an ni lei le, lunginsietna hringna chu changpuitu an ni hre zingin, chawimawi pumin in nuhmeihai kuomah um ro, in ṭawngṭainahai hluoa a um nâwna dingin.

Felna leia tuorna

⁸ A tâwp taka chun, in rêngin lungril hmunkhatin um unla, inlainat tuo unla, unau angin inhmangai unla, lunginsietna nei unla, thuhnuoirawlin um ro.

⁹ Suol suolin thung naw unla, halna halna vêkin thung naw ro; malsâwm hlau lem ro. Hi hi lei hin ko in ni si, malsâwmna chang dingin.

¹⁰ “Hringna hmangai nuom le, Ni ṭhahai hmu nuom chun, Suola inthawkin a lei vêng ṭha sienla, A hmûr khawm zâwrna thu hril lo dingin, Vêng ṭha raw se.

¹¹ Suol nghatsanin, Thil ṭha thaw raw se; Inremna zawngin, Hnawt pei raw se.

¹² Lalpa mit chu mi felhai chungah a fu a, A na khawm an ṭawngṭaina tieng a sit hlak si a, Amiruokchu, Lalpa hmêl chu, Thil suksuoltuhai chungah a um hlak,” ti a ni si a.

¹³ Thil ṭha tienga ṭhahnem in ngai chun in pawi tâwk ding tu am um an ta?

¹⁴ Nisienlakhawm, felna leia lo tuor ta dâm in ni chun, hamṭhâng in tih. An ṭitumna chu ṭi naw unla, lunginzîng bawk naw ro.

¹⁵ Amiruokchu, in lungrilah Krista chu Lalah ruot ro; nangnia um in beiseina san chu ân dawn taphawt cheu chu dawn dingin inzosa rawp ro.

¹⁶ Nisienlakhawm, thuhnuoirawltak le ṭi dêk pumin, sie le ṭha hrietna inthiengtak nei unla, chuongchun, an hrilsietna cheu kawnga chun, Kristaa in um dân ṭhatak hrilsetuhai chu sukmuolphoin um thei an tih.

¹⁷ Thil suol thaw leia tuor nêk chun, Pathien remti zâwng a ni chun thil ṭha thaw leia tuor hi a ṭha lem si a.

¹⁸ Pathien kuoma a mi ṭhuoi theina dingin Krista chun suolhai leiin vawikhat a tuor bawk si a, mi fel chun mi fel naw aiin a tuor a, taksaa sukhlumin a um a, thlaraua ruok chun sukhringin a um tah.

¹⁹ Chu chun, intângna ina thlarau umhai kuoma chun thu a zu khêkpui a.

²⁰ Chuonghai chun, inhmaa Noa dam laia lawng siem sûng poa, Pathien dâwtheinain a nghâk lai khan an awi naw a; chu lawnga chun, mi tlâwmtê (chu chu pariet tina a nih) tuia inthawka sandamin an um tah.

²¹ Chu angpui Baptisma chun, Isu Krista thonâwkna leiin tuhin a sandam cheu a nih. (Chu chu tisa inthieng naw sukfai el ni lovin, sie le ṭha hrietna inthienga Pathien lamna hi a ni lem).

²² Isu Krista chu vâna fein, Pathien chang tieng a um a, vântirkohai dâm, thuneina dâm, thilthawtheina dâm, ama thu thua inumtirin a um.