1 LALHAI 22 - Pathien Lekhabu Inthieng (BSI)

Ahab le Jehosaphat tlâwm ding thu Mikaiain a hrillâwk

¹ Chun, kum thum sûng chu Suriahai le Israelhai chu indo lovin an um a.

² Chun, a kum thum kum chun Juda lal Jehosaphat chu Israel lal kuomah a zu fe a.

³ Israel lal chun a siehlawhai kuomah, “Ramoth-gilead khuo hi eini ta a nih ti hre zing si a, iengtiziea Suria lal hi lâkpêk lova um am ei ni aw?” a ta. Chun, Jehosaphat kuoma chun, “Ramoth-gilead khuo hi mi hang thawpui ve nuom i tim chu?” a ta.

⁴ Chun, Jehosaphat chun Israel lal kuoma chun, “Kei le nang, i mihai le ka mihai chu pumkhat ei na, ka sakawrhai le i sakawrhai chu pumkhat an nih annâwm,” a ta.

⁵ Chun, Jehosaphat chun Israel lal kuoma chun, “Lalpa thu chu la ngai hri phawt la tie,” a ta.

⁶ Chuongchun, Israel lal chun zâwlneihai mi za li lai a ko khâwm a, an kuomah, “Ramoth-gilead khuo hi thaw dingin ka hang inthawk ding am inthawk lo ding?” a ta. Anni chun, “Hang inthawk rawh, Lalpain lal kuta hin a pêk ding a nih,” an ta.

⁷ Nisienlakhawm, Jehosaphat chun, “Hitaka hin Lalpa zâwlnei dang tu amani bêk ka hang râwn ding hi an um naw am a ni aw?” a ta.

⁸ Chun, Israel lal chun Jehosaphat kuoma chun, “Lalpa mi râwnpêk ding Imla naupa Mikaia kha chu a la um kha maw, nisienlakhawm, ama hi chu ka theida zâwngtak a nih; ka chungchâng thu hi a se tieng ngawt naw chu a ṭha tieng a hril hrim hrim ngai nawh,” a ta. Chun, Jehosaphat chun, “Lal hin chuong ang chun chu ti naw raw se khai,” a ta.

⁹ Chuongchun, Israel lal chun hotu pakhat a hang ko a, “Imla naupa Mikaia kha hung ṭhuoi vak ta,” a ta.

¹⁰ Chun, Israel lal le Juda lal Jehosaphat chu Samari khaw kul kawtkhâr lûtna bula hrizâwla chun an lal puona inthuomin an lalṭhungpha ve vea chun an ṭhung a; chun, zâwlneihai po po chun an hmaa chun thu an hril a.

¹¹ Chun, Kenaan naupa Zedekia chun thîr kihai a siempêk a, “Lalpa chun hieng ang hin a tih, ‘Hienghai hin Suria mihai chu chimit dêr khawpin sik i tih,’ tiin,” a ta.

¹² Chuong ang bawkin zâwlnei po pohai chun, “Ramoth-gileada chun hang fe la, hang hlawtling raw khai, Lalpa chun lal kuta hin a pêk ding a nih,” tiin an hril a.

¹³ Chun, Mikaia va ko dinga an tir chun a kuomah, “Ngai ta khai, zâwlneihai hin thu inang vawngin a ṭha tiengin lal kuoma hin thu an hril seng a, an hril ta ang seng chun hang hril ve la, a ṭha tiengin hang hril ve raw aw,” tiin a hril a.

¹⁴ Mikaia ruok chun, “Lalpa hringna sâlin ka hril a nih, Lalpain ka kuoma a hril chu a nih ka hang hril ding chu,” a ta.

¹⁵ Chun, lal kuoma a hang tlung chun, lal chun a kuomah, “Mikaia, Ramoth-gilead khuo thaw dingin ka hang inthawk ding am a ni, hang inthawk lo ding?” a ta. Chun, ama chun a dawn a, “Hang inthawk la, hang hlawtling raw khai, Lalpa chun lal kutah a pêk ding a nih,” a ta.

¹⁶ Chun, lal chun a kuomah, “Thutak ngawt naw chu Lalpa hminga ka kuoma hril lo dingin vawi iengzât rau am ṭawng kân khâmtir ding che a ni leh?” a ta.

¹⁷ Chun, ama chun, “Israelhai po po vêngtu neilo berâm angin tlânga an indar vawng ka hmu a, Lalpain, ‘Hienghai hin hotu an nei ta naw a, mi tin mâni in tieng seng lungmuongtakin fe diel el ta raw hai se,’ a ti a nih,” a ta.

¹⁸ Chun, Israel lal chun Jehosaphat kuomah, “Ka chungchâng thu hi a se tieng ngawt naw chu a ṭha tieng hrim hrim chu hril naw ni ti ka hril che a ni naw am a ni kha?” a ta.

¹⁹ Chun, Mikaia chun, “Chuleiin, Lalpa thu hi lo ngai ta u, Lalpa chu a lalṭhungphaa ṭhung ka hmu a, vâna mipuihai po po, a changtieng le vawitienga ngîrhai leh.

²⁰ Chun, Lalpain, ‘Ahab hi Ramoth-gilead khuoa hang fe a, râla thi dingin tuin am thlêm an ta?’ a ti a. Chun, pakhatin thil pakhat a hril a, mi dangin a dang an hril a.

²¹ Chuongchun, thlarau pakhat hi a hung suok a, Lalpa hmaa chun a ngîr a, ‘Keiin thlêm ka tih,’ a ta.

²² Chun, Lalpain a kuomah, ‘Iengtin am ie?’ a ta. Chun, ama chun, ‘Va fêng ka ta, zâwlnei po pohai hmûra chun thlarau khêlinhlipah vân chang ka tih,’ a ta. Chun, ama chun, ‘Thlêm ngei i ta, hlaw khawm hlawtling ngei i tih, va fe la, chuong ang chun va thaw raw leh,’ a ta.

²³ Chuongchun, ngai ta, Lalpain hieng i zâwlneihai po po hmûra hin thlarau khêlinhlip a sie a, i chungchâng thu hi a ṭha naw tiengin Lalpain a hril tah a nih,” a ta.

²⁴ Chuongchun, Kenaan naupa Zedekia chun a hung hnai a, Mikaia bienga chun a hung ben a, “Lalpa thlarau chun i kuoma thu hril dingin khawtieng am a mi mâksan leh?” a ta.

²⁵ Mikaia chun, “Ngai rawh, pindan sûngrila inbi dinga i lût ni chun la hrieng i tih,” a ta.

²⁶ Chun, Israel lal chun, “Mikaia hi ṭhuoi unla, khawpui awptu Amon le lal naupa Joas kuomah fepui ta u;

²⁷ chun, lalin hieng ang hin a tih, ‘Hi mipa hi lung inah khum unla, lungmuongtaka ka hung nâwk hmakhat chun rinumna tui lo pe ro,’ tiin, ti ro,” a ta.

²⁸ Chun, Mikaia chun, “Lungmuongtaka i hung nâwk tâk leh, Lalpain kei mi hmang hin thu a hril naw nîng a tih,” a ta. Chun, ama ma chun, “Nangni mipuihai, in rêngin lo hre seng ro,” a ta.

²⁹ Chuongchun, Israel lal le Juda lal Jehosaphat chu Ramoth-gileada chun an hang fe a.

³⁰ Chun, Israel lal chun Jehosaphat kuomah, “Insiem danglam ka ta, indonaa chun hang fe vêng ka ti a, nang ruok chun chu i lal puon sil la,” a ta. Chuongchun, Israel lal chu ân siem danglam a, indonaa chun a hang fe a.

³¹ Chun, Suria lal chun a tawlailîr chunga hotu sâwmthum le pahnihai kuoma chun, “Israel lal ngawt naw chu, mi lien khawm, mi chîn khawm a tu tukhawm thaw naw ro,” tiin thu a pêk a.

³² Chun, tawlailîr chunga hotuhai chun Jehosaphat an hei hmu chun, “Israel lal a ni ngei el leh,” an ta; chuongchun, thaw tum chun an inhuol ta a; chun, Jehosaphat chu a khêk suok a.

³³ Chun, tawlailîr chunga hotuhai chun Israel lal a ni nawh ti an hriet chun, an hnawt lai chu an lêt nâwk ta a.

³⁴ Chun, mi pakhat hin tum bîk neilo hin a thalngul a kuoi a, Israel lal chu âwmphaw le âwmphaw inkârah a kâp a, chuongchun, a tawlailîr khaltu kuoma chun, “Kei her la, sipaihai laia inthawk hi mi suokpui raw khai, hliemna natak ka tuok ta hi,” a ta.

³⁵ Chun, chu ni chun inthawna chu a nasa ta hle el a, lal chu a tawlailîra chun Suria mihai hmua chun an inngîrtir a, chun, zântieng chun a thi ta a; ama inhliemnaa inthawk chun thisen chu tawlailîr sûnga chun a luong dup dup a.

³⁶ Chun, nisa tlâk tâwm lai vêl chun, sipaihai lai chun, “Mi tin mâni in tieng seng, mi tin mâni ram tieng seng fe vawng ta raw hai se,” tiin an khêk vêl ta rak el a.

³⁷ Chuongchun, lal chu a thi ta a, Samari khuoa chun an lûtpui a; Samari khuoa chun lal chu an phûm ta a.

³⁸ Chun, Samari khaw dil panga chun tawlailîr chu an sâwp a; chun, Lalpa thu hril ta ang ngei khan a thisen chu uiin an liek ta a; (chutaka chun nawchizawrhai chu an insâwp hlak).

³⁹ Chuongchun, Ahab chanchin danghai, a thilthaw po pohai, a saiha in bâwl dâm, a khaw siemhai po po chu Israel lalhai inlal lai thu ziekna buah a chuong a ni naw am a nih?

⁴⁰ Chuongchun, Ahab chu a puhai kuoma chun a in ta a; chun, a naupa Ahazia chu ama aiawin ân lal ta a.

Jehosaphat inlal thu

⁴¹ Chun, Israel lal Ahab inlal kum linaah Asa naupa Jehosaphat chu Judahai chunga chun ân lal ṭan a.

⁴² Jehosaphat chu ân lal ṭan lai chun kum sâwmthum le kum nga a na; Jerusalem khuoa chun kum sâwmhni le kum nga ro a rêl a. A nu hming chu Azuba, Silhi naunu a nih.

⁴³ A pa Asa lampui hraw po po chu a hraw ve a; pêtsan dêr lovin Lalpa mithmuah thilṭha a thaw hlak a, bâwlhmunhai chu a sukbo vawng naw a, bâwlhmunahai chun mihai chu an inthâwiin riminhnikhai chu an la raw zing hlak a.

⁴⁴ Chun, Jehosaphat chun Israel lal le inremna a siem a.

⁴⁵ Chuongchun, Jehosaphat chanchin danghai dâm, a thilthawtheizie a suklang thuhai dâm, a râl do thuhai chu Juda lalhai inlal lai thu ziekna buah a chuong a ni naw am a nih?

⁴⁶ Chun, a pa Asa dam laia pasal inzawrhai a la umhai kha a rama inthawkin a hnawt suok vawng a.

⁴⁷ Chun, Edom rama chun lal an um naw a, lal aiawtu chun ro a rêl a.

⁴⁸ Jehosaphat chun Ophira rângkachak phur ding Tarsis lawnghai a tuk a, nisienlakhawm, an fe ta naw a; Ezion-geber hmuna chun lawnghai chu a se ta vawng si a.

⁴⁹ Chuongchun, Ahab naupa Ahazia chun Jehosaphat kuomah, “Ka mihai hi i mihai leh lawngah fe hmunkhat raw hai se chu,” a ta. Nisienlakhawm, Jehosaphat chun a remti naw a.

⁵⁰ Chun, Jehosaphat chu a puhai kuomah a in ta a, a puhai lai, a pu David khawpuia chun an phûm ta a; chun, a naupa Jehoram chu ama aiawin ân lal ta a.

Israel rama Ahazia inlal thu

⁵¹ Chun, Juda lal Jehosaphat inlal kum sâwm le kum sari kum chun Ahab naupa Ahazia chu Samari khuoa chun Israelhai chungah ân lal ṭan a; Israelhai chunga chun kum hni ân lal a.

⁵² Chun, Lalpa mithmua chun thil ṭhanaw a thaw hlak a, a nu le a pa lampui hrawhai, Nebat naupa Israelhai thil insuksuoltirtu Jeroboam lampui hrawhai chu a hraw ve hlak a.

⁵³ Chun, a pa thaw ang taphawt thawin Baal rawng a bâwl a, a biek hlak a, Lalpa Israelhai Pathien chu a suklungsen ta a.