1 LALHAI 21 - Pathien Lekhabu Inthieng (BSI)

Ahab le Naboth a grep huon thu

¹ Chun, Jezreel mi Naboth chun grêp huon a nei a, chu chu Jezreela Samari lal Ahab in bul ela um a nih.

² Chun, Ahab chun Naboth chu, “Ka in bul a ni lei hin i grêp huon hi thlai huon dingin mi pe raw khai, a aia chun grêp huon ṭha lem pêng ka ti che; annawleh i nuom lem chun a tangkain a man tâwk chu pêng ka ti che,” a ta, a biek a.

³ Chun, Naboth chun Ahab kuomah, “Ka puhai ro hang pêk che chu ka ta dingin a âwmin a âwm nawh ie,” a ti a.

⁴ Chun, Jezreel mi Naboth chun a kuoma chuong ang thu chu a hril lei chun Ahab chu ngûitak le lungâwi nawtakin a inah a lût ta a, “Ka puhai ro pe thei naw ning che,” a ti tlat si a. Chuongchun, a khuma chun a zâl a, khingtieng a ngha a, bu hrim hrim khawm a fâk nuom ta naw a.

⁵ Chuongchun, a nuhmei Jezebel chu a va fe a, a kuomah, “Iengtiziea i lungril chuong lâwma a lungngai a, bu khawm fa lova um am i na ?” a ta.

⁶ Ama chun a kuomah, “Jezreel mi Naboth chu ka va biek a, a kuomah, ‘I grêp huon hi min châwktir rawh, annawleh i dit lem chun a aiah grêp huon dang pêng ka ti che,’ ka ti a, ama chun, ‘Ka grêp huon chu pe thei naw ning che,’ tiin a mi dawna a nih,” a ta.

⁷ Chun, a nuhmei Jezebel chun a kuomah, “Israel ram lal hi i nih a ni naw am a nih? Tho la, bu fa la, lungril hlimtakin um raw khai, Jezreel mi Naboth grêp huon chu keiin pêng ka ti che,” a ta.

⁸ Chuongchun, Ahab hming chun lekha a ziek a, a namna chun a nam a; chun, lekha chu a umna khuoa Naboth tuolbâwm upahai le mi ṭhahai kuomah ân phur a.

⁹ Chun, lekhaa chun, “Bu nghei thu lo phuong unla, mipui lai Naboth chu inhmatâwngtir unla,

¹⁰ mi pahni Belial nauhai a hmaa chun inṭhungtir unla, ‘Pathien le lal i hrilsiet a nih,’ tia a hêktu dingin lo siem ro. Chun, ama chu ṭhuoi suok unla, lo dêng hlum ro,” a ta.

¹¹ Chun, a umna khuoa mi, a umna khuoa um upahai le mi ṭhahai chun Jezebelin ân phur lekhaa a ziek ang chun an thaw a.

¹² Bu nghei thu chu an phuong a, mipuihai lai Naboth chu an inhmatâwngtir a.

¹³ Chun, mi pahni Belial nauhai chu a hmaa chun an va ṭhung a; chun, Belial mihai chun mipuihai hmaa chun, “Naboth hin Pathien le lal a hrilsiet a nih,” tiin ama Naboth chu an hêk a. Chuongchun, khuoa inthawk chun an ṭhuoi suok a, lungin an dêng a, a thi ta a.

¹⁴ Chuongchun, Jezebel kuoma chun, “Naboth chu lungin an dêng a, a thi tah,” tiin mi an tir a.

¹⁵ Chun, Jezebelin Naboth chu lungin an dêng a, a thi tah ti a hrietin Jezebel chun Ahab kuoma chun, “Tho la, Jezreel mi Naboth grêp huon, ân châwktir phal naw che kha nei ta raw le, Naboth chu a dam ta naw a, a thi tah a nih,” a ta.

¹⁶ Chun, Ahab chun Naboth a thi tah ti a hrietin Jezreel mi Naboth grêp huon chu nei dinga fe thla dingin Ahab chu a tho ta a.

¹⁷ Chun, Lalpa thu chu Tisbe mi Elija kuoma chun a hung tlung ta a.

¹⁸ “Tho la, Samari khuoa um, Israel lal Ahab be dingin zu fe raw khai, ngai ta, Naboth grêp huona chun a um a; nei tumin chutaka chun a fe thla a nih.

¹⁹ A kuoma chun, ‘Lalpain hieng ang hin a tih, I that a, i neipêk nâwk nghâl a ni maw? tiin,’ ti la, a kuomah, ‘Lalpain hieng ang hin a tih, Uiin Naboth thisen an liekna hmun ngeia hin nanga thisen khawm hi an liek ve ding a nih, tiin,’ ti rawh,” a ti a.

²⁰ Chun, Ahab chun Elija kuomah, “I mi hung hmu ta maw, ka hmêlmapa?” a ta. Chun, ama chun a dawn a, “Ka hmu ta che a ni hi, Lalpa mithmua thil ṭha naw thaw dingin inzawr ta che chu.

²¹ Ngai ta, i chunga hin thil ṭhanaw hung intlungtir ka ta, hung sukbohmang ka ti che a, Ahaba inthawk hin naupasal taphawt chu Israel rama mi khuokhira um amanih, khuokhir naw amani khawm chu sukbohmang ka ta,

²² nangin i mi suklungsen lei le, Israelhai chu thil în suksuoltir leiin Nebat naupa Jeroboam sûnghai le Ahija naupa Baasa sûnghai ang elin i sûnghai hi siem ka tih,” a ta.

²³ Chun, Jezebel chungchâng thu khawm Lalpain a hril a, “Jezreel khaw kul bulah Jezebel hi uiin la fâng an tih.

²⁴ Ahab sûngkuohai laia mi khawpuia thihai po chu uiin fâng an ta; rama thihai po chu chunglêng vatehaiin fâng an tih,” tiin.

²⁵ (A nuhmei Jezebel infuipawr a, Lalpa mithmua thil ṭha naw thaw dinga inzawr Ahab ang hrim hrim hi tukhawm an um nawh.

²⁶ Lalpain Israel mihai hmaa a hnawtsuok Amor mihai thilthaw tinrêng ang, milimhai bein thil tirdakumtakin a thaw hlak a).

²⁷ Chun, Ahab chun chuong thu chu a hriet chun a puon a keithlêr a, saiip puon a sil a, bu a nghei a, saiip puon chungah a zâl a, ngûitakin ân lawn vêl a.

²⁸ Chun, Lalpa thu chu Tisbe mi Elija kuoma chun a hung tlung a,

²⁹ “Ahab ka hmaa an ngaitlâwmzie hi i hmu am? Ka hmaa an ngaitlâwm lei hin ama dam sûng hin chu a chungah thil ṭha naw intlungtir naw ning, a naupaa inthawk ruok chun a sûnghai chungah thil ṭha naw intlungtir ka tih,” tiin.