1 LALHAI 20 - Pathien Lekhabu Inthieng (BSI)

Ahabin Suria mihai a tukdei

¹ Suria lal Benhadad chun sipaihai po po chu ân khâwm vawng a, lal sâwmthum le pahni an ṭhang a, sakawr le tawlailîrhai leh a hang fe a, Samari khuo chu a hang inhuol a, a hang thaw a.

² Israel lal Ahab kuoma chun khawpui sûngah mi a tir a, a kuomah, “Benhadad chun hieng ang hin a tih,

³ ‘I tangka le i rângkachakhai kha ka ta a nih, i nuhmeihai le, i nauhai laia a ṭha ṭhahai kha ka ta vawng a nih,’ tiin,” a ta.

⁴ Chun, Israel lal chun a lo dawn a, “Aw laltak ka pu, i hril ang chu a ni annâwm, keima le ka nei po po chu i ta a nih,” a ta.

⁵ Chun, a mi tirhai chu an fe nâwk a, “Benhadad chun hieng ang hin a tih, ‘I kuomah, i tangkahai, i rângkachakhai, i nuhmeihai le i nauhai leh i mi pêk ding a nih, tiin mi ka hung tir luo a;

⁶ amiruokchu, zîngah hi pha vêla hin ka mihai i kuomah hung tir ka ta, i in le i mihai inhai chu an hung dap ding a nih; chun, i thil ngainat zâwnghai chu lâng an ta, hung pui vawng an tih,’ tiin,” an ta.

⁷ Chuongchun, Israel lal chun a rama upahai po po chu a ko a, “Lo hre ta u khai, hi mipa hin thil ṭha nawtak thaw a tumzie hi; ka kuomah mi a hung tir a, ka nuhmeihai, ka nauhai, ka tangka dâm, ka rângkachak dâm a hung ngên a, ka lo sêl hlak khawm ni si lovin,” a ta.

⁸ Chun, upahai po po le mipuihai po po chun a kuomah, “Lo bengkhawn nuom naw rawh, rem khawm lo tipêk naw rawh,” an ta.

⁹ Chuongchun, Benhadad mitirhai kuoma chun, “Laltak ka pu kuoma chun, ‘I siehlaw kuoma mi tira i hung ngên hmasak ang po po khan chu thâwng ka ta, amiruokchu, hi hi chu chu thaw thei naw ning, a tih,’ ti ro,” a ta. Chun, a mitirhai chu an fe nâwk ta a, chu thu chu an vân tlun nâwk a.

¹⁰ Chun, Benhadad chun a kuomah mi a tir nâwk a, “Ka hnungzuituhai po po hin Samari khaw pilvut veikhat chau khawm an changkim thei ding chun pathienhaiin an law law mi law hai sienla, chu nêka nasa khawm a,” a ta.

¹¹ Chun, Israel lal chun a dawn a, “‘Mi ân râlthuom zing laiin, ân râlthuomna hlîp thla ta ang elin an uong ngai nawh ie,’ tiin va hril ro khai,” a ta.

¹² Chun, ama le a lalhaiin bûktêah zu an lo dâwn laiin, chu thu chu Benhadad chun a lo hriet a, a mihai kuoma chun, “Insiem ro khai,” a ta. Chuongchun, khuo chu do ding chun an insiem ta a.

¹³ Chun, ngai ta, zâwlnei pakhat hin Israel lal Ahab chu a va hnai a, “Lalpain hieng ang hin a tih, ‘Hieng mipui tamtak hi i hmu am? ngai ta, vawisûn hin i kutah ka pêk ding a nih; chuongchun, kei hi Lalpa chu ka nih ti hrieng i tih,’ tiin,” a ta.

¹⁴ Chun, Ahab chun, “Tu hmangin am ie?” a ta. Ama chun, “Lalpain hieng ang hin a tih, ‘Ram bunghaia tlangvâl hotuhai hmang hin,’ tiin,” a ta. Chun, ama chun, “Tuin am râlrêl a ta?” a ta. Ama chun a dawn a, “Nangin teh,” a ta.

¹⁵ Chuongchun, ama chun ram bunghaia hotu tlangvâlhai chu a ko khâwm a, za hni le sâwmthum le pahni an na; chuhai zoa chun mi po po, Israel thlahai po po chu a ko khâwm a, sâng sari an nih.

¹⁶ Chun, sûnchang laitakin an va suok ta a. Benhadad le lalhai, ama ṭhangpuitu lal sâwmthum le pahnihai ruok chu an bûktêa chun an lo indâwn rui a.

¹⁷ Chun, ram bunghaia hotu tlangvâlhai chu an va suok hmasa a, chun, Benhadad chun mi a tir a, anni chun, “Samari khuoa inthawka hung suok an um,” tiin an hril a.

¹⁸ Ama chun, “Inrem tuma hung an ni chun a hringin lo man unla, indo tuma hung an ni chun a hring bawkin lo man ro,” a ta.

¹⁹ Chuongchun, chuonghai, ram bunga hotuhai tlangvâlhai chu a hung zuitu sipaihai le chun khuoa inthawk chu an suok a.

²⁰ Chun, an va bitum senghai chu an va that a, chuongchun, Suria mihai chu an tlânse ta a, Israelhai chun an hnawt a, chun, Suria lal Benhadad chu sakawr chunga chuongin sakawr chung chuong mihai leh an tlânsuok ta a.

²¹ Chun, Israel lal chu a va suok a, sakawr le tawlailîrhai chu a va thaw a, Suria mihai chu a va that rak el a.

²² Chun, zâwlnei chun Israel lal chu a va hnai a, a kuomah, “Insukhrât sau sau la, i thaw dân ding ngaituo raw khai, kum a hung invawi hin Suria lal chun a hung thaw nâwk ding che a nih,” a ta.

²³ Chun, Suria lalhai chun a kuomah, “An pathien hi tlâng pathien a na, chuleiin, eini nêkin an hrât a ni hi, phaizâwlah thaw ta inla, anni nêk chun hrât lem ngei ei tih.

²⁴ Chun, hieng ang hin thaw rawh, lalhai hi an rêngin thleng vawng la, an aia hin ram awptuhai sie lem la,

²⁵ chun, sipaihai tawlailîr dâm, sakawr dâm, i chân ta zât ang chie kha sipaihai siemṭha nâwk la; chuongchun, phaizâwla thâwng kan ta, anni nêk chun hrât lem ngei kan tih,” an ta. Chun, an thu chu a awi a, chuong ang chun a thaw ta a.

²⁶ Chun, a kum nâwka chun Benhadad chun Suria mihai chu a kei khâwm a, Israelhai chu thaw dingin Aphek khuoa chun a hang fe a.

²⁷ Chun, Israel mihai chu an pungkhâwm a, fâk dinghai an thak khâwm zet zet a, do dingin an inthawk ta a; chun, Israel mipuihai chun kêlte tlâwmte pawl hnia ṭhe ang chau tê hin an va ep ve a; Suria mihai ruok chu a ram sip hin an sip mup el a.

²⁸ Chun, Pathien mi chun Israel lal chu a va hnai a, a va biek a, a kuomah, “Lalpain hieng ang hin a tih, ‘Suria mihaiin Lalpa chu tlânghai pathien a na, ruom pathien chu a ni naw an ti a nih; chuleiin, hieng mipui tamtakhai hi i kutah ka pêk ding a nih; chuongchun, kei hi Lalpa chu ka nih ti hrieng in tih,’ tiin,” a ta.

²⁹ Chun, ni sari sûng zet chu an inep zing a. Chun, a ni sari ni chun an inthaw ta a; chun, Israel mihai chun Suria mihai chu ni khatah sipai nuoi khat an that a.

³⁰ Mi danghai ruok chu Aphekah khawpui sûnga chun an tlânlût a, a la umhai chu mi sîng hni le sâng sari kul chimin a delhlum a. Chun, Benhadad chu a tlânse a, khawpui sûnga pindan sûngrila a lût a.

³¹ Chun, a rawihai chun a kuomah, “Ngai ta, Israel sûng kuohai laia lalhai hi mi lunginsietthei tak an nih ti thu kan hriet a, saiip puon bilin, ei lua hin hruia inkhitin Israel lal kuomah mi vân fetir raw khai; ama chun a hla nuom khiet rawi che mawh,” an ta.

³² Chuongchun, saiip puon chu an bil a, an lua chun hruiin an inkhit a, Israel lal kuoma chun an va fe a, “I siehlaw Benhadad chun, ‘Lunginsiettakin mi hla raw se,’ a ti che,” an ta. Ama chun, “A la dam a ni maw? Ka naupa a ni annâwm,” a ta.

³³ Chuong mihai chun ngaiṭhatakin, a lungril thu tak a hril a ni ringin, “I unaupa Benhadad kha a nih,” an lo ti var a. Chuongchun, ama chun, “Va fe unla, ama chu hung ṭhuoi ro,” a ta. Chuongchun, Benhadad chu a hung suok a, a kuomah a fe a; chun, ama chun tawlailîrah a lo inchuongtir a.

³⁴ Chun, Benhadad chun a kuomah, “Ka pain i pa kuoma inthawka khuo a lo lâkhai kha pe kîr nâwk ka ta; chun, ka pain Samari khuoa dâwrpui hmun a siem ang khan Damaska khuoah i dâwrpui hmun ding i siem ve ding annâwm,” a ta. Chun, Ahab chun, “Hi thuthlung le hin infetir ka ti che,” a ta. Chuongchun, a kuomah thu a thlung a, ân fetir ta a.

³⁵ Chun, zâwlnei naupahai laia mi pakhat hin Lalpa thuin a ruolpa kuomah, “Mi hang vaw ta khai,” a ta.

³⁶ Ama chun a vuok nuom naw a, Chuongchun, a kuomah, “Lalpa thu chu i awi naw leiin, ngai ta, nang hin i mi liemsan phingleh, sakeibakneiin lo sêng a ti che,” a ta. Chun, ama chu a liemsan phingle chun sakeibakneiin a lo hmu a, a se ta a.

³⁷ Chuongchun, mi dang a va hmu nâwk a, “Mi hang vaw ta khai,” a ta. Ama chun a hang vuok a, a vuok sil ta a.

³⁸ Chuongchun, zâwlnei chu a fe a, lampuia hin lal chu a lo inchân a, a chal khitnaa a mit inkhumin ân siem danglam a.

³⁹ Chun, lal a hung tlung chun lal chu a lo ko a, “I siehlaw hin indona rûnpui hmunah ka va fe a; chun, ngai ta, mi pakhat hi a hung ngha a, ka kuomah mi pakhat a hung ṭhuoi a, ‘Ama hi lo vêng tlat rawh, a tlânhmang hlau chun a hringna aiah i hringna chân i tih, annawleh tangka talent khat i pêk ding a nih,’ a ta.

⁴⁰ Chun, i siehlaw hi ka buoi êm kâr chun a lo fe hmang dai el ta a,” a ta. Chun, Israel lal chun a kuomah, “Chuong ang tak chu a nih, i chunga thu tlu chu, nangma ngeiin i sukthlûk diem ta chu teh,” a ta.

⁴¹ Chun, ama chun a mita inthawk chun a chal khitna chu a hlîp ta vak a; chun, Israel lal chun zâwlneihai laia mi a nih ti a hriet ta a.

⁴² Chun, ama chun a kuomah, “Lalpa chun hieng ang hin a tih, ‘Ṭawngsie ka înphur ta chu în suo ta leiin a hringna aiah i hringna; a mihai aiah i mihai chân i tih,’ tiin,” a ta.

⁴³ Chun, Israel lal chu ngûitak le lungâwi nawtakin a fe ta a; Samari khuoa chun a fe ta a.