1 LALHAI 14 - Pathien Lekhabu Inthieng (BSI)

Jeroboam chunga Ahijah thu hrillâwk

¹ Chuong lai chun Jeroboam naupa Abija chu a damnaw a.

² Chun, Jeroboam chun a nuhmei kuomah, “Tho la, Jeroboam nuhmei a nih ti an hriet nawna ding chein insukdanglam la, Silo-ah va fe ta khai; ngai ta, chutaka chun zâwlnei Ahija, hieng mihai chunga lala ka la um dingzie, ka chungchâng thu hriltu kha a um ie.

³ Beiphêk sâwm le, bei tlang chitê tê, khuoizu bûr khat leh chawi la, a kuomah va fe ta, naupang um dân ding chu lo hril a ti che,” a ta.

⁴ Chun, Jeroboam nuhmei chun chuong ang chun a thaw a, a tho a, Silo-a chun a fe a, Ahija ina chun a va fe ta a, Ahija chun khuo khawm a hmu thei ta naw a, a upat leiin a mit ân thim si a.

⁵ Chun, Lalpain Ahija kuomah, “Ngai ta, Jeroboam nuhmei a naupa chungchâng thua râwn ding chein a hung a; a damnaw a na, hieng ang hin lo hril rawh; hieng ang hi nîng a ta, a hung lût pha chun, nuhmei dang ni âwmtakin a hung insiem ding a nih,” a ta.

⁶ Chun, Ahija chun chuonga kawtkhâra a hung lût laia a ke sir ri a hei hriet phing chun, “Nang Jeroboam nuhmei, hung lût raw khai, iengtiziea mi danga insiem am i ni a? Chanchin ṭha nawtak hril ding chea hril ka nih i sawnnaw.

⁷ Fe nâwk ta la, Jeroboam kuomah, ‘Lalpa Israelhai Pathienin hieng ang hin a tih, Mipuihaia inthawk hin ka dawmsâng che a, ka mi Israelhai chunga hin hotuah ka siem che a,

⁸ David sûnghai ram ka lâkpêk a, chu chu ka pêk che a; nisienlakhawm, nang chu ka siehlaw David angin i um ve naw a; ama chun chu ka thupêkhai a pawm a, ka mithmua thilṭha chau thaw tumin a lungril po poin a mi zui hlak a;

⁹ nang ruok chun chu i hmaa mihai po po nêkin thil i suksuol nasa bîk a, mi suklunginsenna dingin pathien danghai le milim sunghai i siem a, hnung i mîn nghatsan ta a,

¹⁰ chuleiin, ngai ta, Jeroboam sûngkuo chunga hin thil ṭha naw hung intlungtir ka ta. Jeroboama inthawk hin naupasal taphawt chu Israel rama mi khuokhira um le, khuokhir naw khawm sukbohmang ka ta, miin êk a phît fai rêt ang hin Jeroboam sûngkuo hi a mang dêr hmakhat chun ka phît fai rêt ding a nih.

¹¹ Jeroboam sûngkuo laia mi, khawpuia thi taphawthai chu uiin fâng an ta; rama thi taphawthai chu chunglêng vatehaiin fâng an tih; chu chu Lalpain a hril tah a nih,’ ti rawh.

¹² Chuongchun, tho la, i in tieng fe nâwk el rawh, khawpui sûng i sir pha leh naupang chu a thi ding a nih.

¹³ Chuongchun, Israelhai po po chun sûn an ta, vui an tih; Jeroboam sûngkuo lai chun ama chau chu thlâna sie ding a ni ding a ni si a; Jeroboam sûngkuo lai hin ama chaua hin Lalpa Israelhai Pathien chunga ṭhatna ieng amanih ân lang leiin.

¹⁴ Chun, Lalpain tu ela Jeroboam sûngkuo hung sukbohmangtu ding Israelhai chunga lal siem a ta; tuta inthawk ngei hin.

¹⁵ Lalpa chun tuia phairuong kûng inhnîng inhnîng angin Israelhai chu hung vaw hnîng a ta; chuongchun, Lalpa lung suksena an Aserahai chu an siem leiin, an puhai a lo pêk tah, hi ram ṭhataka inthawk hin Israelhai chu la keidawk fai vawng a ta, vadung khêl tienga chun la sukdar vawng a tih.

¹⁶ Chun, Israelhai chu thil insuksuoltira a thaw Jeroboam suolnahai leiin Israelhai chu nghatsan a tih,” a ta.

¹⁷ Chun, Jeroboam nuhmei chu a tho a, a suok ta a, Tirza khuo chu a va tlung a, chun, in kawtkhâr bul a va tlung phingle chun naupang chu a thi ta a.

¹⁸ Chun, Lalpain a siehlaw zâwlnei Ahija hmanga thu a lo hril ta ang ngei khan Israelhai po po chun an sûn a, an vui ta a.

¹⁹ Jeroboam chanchin dang, a râl do thu le a rorêl thu chu, ngai ta, Israelhai lalhai inlal lai thu ziekna bua chun a chuong a.

²⁰ Chuongchun, Jeroboam rorêl sûng chu kum sâwmhni le kum hni a na; chun, a puhai kuoma chun a in ta a, a naupa Nadab chu a aiawin ân lal ta a.

Rehoboam inlal thu

²¹ Chun, Solomon naupa Rehoboam chu Judai ramah ân lal a. An lal tîr lai chun Rehoboam chu kum sâwmli le kum khat mi a na, Lalpain a hming inumtirna dinga Israel hnam po pohai laia a thlang khawpui Jerusalema chun kum sâwm le kum sari ân lal a; a nu hming chu Naama, Ammon mi a nih.

²² Judahai chun Lalpa mithmua chun thil suol an thaw a; an puhai thilthaw po po khûma an suolnahai chun a thîkthu a chawktho pêk a.

²³ Tlâng insâng tina le thing hring tin hmuna hin lungphunhai phunin bâwlhmunhai le Aserahai chenin an siem bawk si a,

²⁴ chu rama chun pasal mâni inzawrhai khawm an um a, Israel thlahai hmaah Lalpain a hnawtsuok tah hnamhai thilthaw tirdakum tinrêng ang chu an thaw ve a.

²⁵ Chun, lal Rehoboam inlal kum nga kum chun Aigupta ram lal Sisak chun Jerusalem khuo chu a hang rûn a.

²⁶ Lalpa ina rohai le lal rohai chu a lâk a, a rêng el chun a lâk fai vawng a; Solomon rângkachak phaw siem po po khawm kha a lâksa vawng a.

²⁷ Chun, lal Rehoboam chun chuong aia chun dâr phawhai a siem a, lal in kawtkhâr vêngtu hotuhai ân kawltir a.

²⁸ Chun, lal chu Lalpa ina a lût po leh vêngtuhai chun an chawi a; chun, vêngtuhai pindana chun an sie nâwk pei hlak a.

²⁹ Rehoboam chanchin le a thilthaw danghai po po chu Juda lalhai inlal lai thu ziekna buah a chuong a ni naw am a nih?

³⁰ Chun, Jeroboam le Rehoboam chu indo zing zingin an um hlak a.

³¹ Chun, Rehoboam chu a puhai kuomah a in ta a, David khawpuia a puhai kuoma chun an phûm ta a; a nu hming chu Naama, Ammon mi a nih. Chun, a naupa Abijam chu ama aiawin ân lal ta a.