THUVARHAI 6 - Pathien Lekhabu Inthieng (BSI)

Thabona le khêlhlipna kal dinga inchûktirna

¹ Ka naupa, i tuolbâwm ta dinga aiawtu i nih a, Hmêlmak mi ta dinga i kuthai i ben chun,

² I baua thuhai ngei chun âwk i na; I baua thuhai ngei chun man i ni tah.

³ Tuhin hi hi thaw la, ka naupa, nangma le nangma chu insansuok rawh, I tuolbâwm kuta chun i lût a ni ta sih a; Fe la, nang le nang chu insukhnuoi la, i tuolbâwm chu ngên rawh.

⁴ I mithai chu inna inhmutir naw la, I mitkhohai chu ininnghiltir bawk naw rawh.

⁵ Ramsuoktu kuta sakhi a suok angin le, Vate vêtua inthawka vate a suok ang elin, Nang le nangma chu insansuok rawh.

⁶ Nang thabo, phaivâng kuomah fe la, A lampuihai ngaituo la, var rawh.

⁷ Chu chun lal a nei nawh a, Enkawltu amanih, rorêltu amani khawm a nei nawh.

⁸ Nipui lai a bu a siekhâwl a, Busîk hunah a bu a lâk khâwm hlak.

⁹ Aw thabo, ieng chen am i zâl ding a na? I zâlnaa inthawkin iengtik âm i tho ding a na?

¹⁰ Zâl dep bêk, in dep bêk, Zâla kuthai hang thlep dep bêk.

¹¹ Chuongchun, inru angin i pasietna chu hung a ta, I tlâksamna chu mi râlthuoma inthuom angin hung a tih.

¹² Mi hmangna bo, mi khawhlo, Bau chapotakin a lêng a.

¹³ A mithai a sêp a, a kehaiin thu a hril a, A kuthaiin inchiknahai ân chûktir a.

¹⁴ A lungrila chun kâwmâwna a um a, thilsuol a rawt suok rawp a, Indarna a tu hlak.

¹⁵ Chuleiin, a lungzîngna chu hung thut a ta, Thâwk le khatin kawidar a ta, dam nâwkna boin.

¹⁶ Thil paruk LALPAIN a theidahai chu a um a, Anih, pasari, chuong chu ama ta dingin tirdakum an nih;

¹⁷ Mit mengsânghai, lei khêlhlip, Pawitâwklo thisen insuoktir hlak kuthai le chun,

¹⁸ Ngaituona suol ngairuot hlak lungril le, Pawi tâwk dinga ke tlân hrât hlakhai leh;

¹⁹ Hrietpuitu indiklo khêlthu sâksuok hlaktu, Unauhai laia indarna tu hlaktu le chun.

Uiretnaa inthawka fîmkhur dinga zillâwkna

²⁰ Ka naupa, i pa thupêk hi kawl tlat la, I nu inchûktirna hi nghatsan bawk naw rawh.

²¹ I lungrila chun khuopde tlat zing la, I rîng vêla chun zem tlat rawh.

²² I fe pha chun nang chu ṭhuoi a ti cheh a; I in pha chun nang chu vêng a ti cheh a; Chun, i hung meng pha khawm chun inbiekpui a ti che.

²³ Thupêk chu khâwnvar a na, inchûktirna chu var a ni sih a; Inchûktirna thununnahai chu hringna lampui a nih;

²⁴ Nuhmei riloa inthawka hum ding chein le, Hmêlmak baua inpâk tehlêmnaa inthawka vêng ding chein.

²⁵ I lungrila chun a mawina chu châk naw la, A mitsîrhai chun nang chu kuoi bawk naw raw se che.

²⁶ Nuhmei hur lei hin pasal chu bei hlekah siem a ni hlak a nih, Chun, uirenu chun hringna hlu chu a pêlin a pêl hlak.

²⁷ Miin a kalakah a puonhai kâng loin, Mei a chepdê thei am a nih?

²⁸ Annawleh, mi a ke kâng loin, Meiling chungah a lâwn thei am a nih?

²⁹ Mi a tuolbâwm nuhmei kuoma lût chu chuong ang bawk chu a na; Amanu va tâwk taphawt chu hrem naw ni naw nih.

³⁰ Inruin a phîngṭâm laiin ân sukkhawpna dinga ân rûk chun mihaiin an hmusit ngai nawh a.

³¹ Amiruokchu ama chu hmu suok a ni chun a lêt sariin thung a ta; A ina thuomhnaw po po chu pe vawng a tih.

³² Nuhmei le uiretna thil thawtu chu lungril bo a na, Ama lungril ngei sukse dingin thil a thaw a nih.

³³ Inhliemna le hmaimâwkna hmûng a ta, A hmaimâwkna chu hrûk hmang ni naw nih.

³⁴ Itthîkna hi mihriem lungsenna a na, Phubalâk ni chun hla naw nih.

³⁵ Intlanna hrim hrim ngaisak naw nih a, Thilpêk tamtakhai chu pe la khawm, lungawi el chuong naw nih.